نيۋ-يورك فەدەرالدىق رەزەرۆتىك بانكىنىڭ پرەزيدەنتى دجون ۋيليامس ەكونوميكانى قالپىنا كەلتىرۋ مۇمكىن دەپ ەسەپتەيدى. نيۋ-يورك فەدەرالدىق رەزەرۆتىك بانكىنىڭ پرەزيدەنتى كوروناۆيرۋستىڭ سالدارىنان بولعان ەكونوميكالىق قيىندىقتىڭ اياقتالۋى ىقتيمال دەگەن پىكىرىن «Bloomberg» تەلەارناسىنا ايتىپ بەردى.
ۋيليامس مىرزا ەكونوميكانى قايتا قالپىنا كەلتىرۋگە بولاتىنىنا سەنىمدى. سەبەبى ورتالىق بانكتىڭ قازىرگى ساياساتى ەل ەكونوميكاسىن جىل باسىنداعى كورسەتكىشكە قايتا جەتكىزۋگە باعىتتالعان. اشىق نارىقتاعى وپەراتسيالار جونىندەگى فەدەرالدىق كوميتەتتىڭ ۆيتسە-توراعاسى قىزمەتىن قوسا اتقاراتىن ۋيليامس مىرزا فەدەرالدىق رەزەرۆتىك جۇيەنىڭ ەل ەكونوميكاسىن قالپىنا كەلتىرۋدىڭ بارلىق قولجەتىمدى قۇرالدارىن قاراستىراتىنىن ايتتى. ول سونداي-اق ۇكىمەت تاراپىنان تۇراقتى قولداۋ قازىرگى شارالاردىڭ تيىمدىلىگىن ودان ءارى ارتتىراتىنىنا سەنىمدى. داعدارىسپەن كۇرەستە فەدەرالدىق رەزەرۆتىك جۇيە ماقساتتى مولشەرلەمەنى نولگە دەيىن تومەندەتىپ, نەسيە قۇنىنىڭ ءبىراز ۋاقىت تومەن بولاتىنىن مالىمدەدى. بانك ودان بولەك وبليگاتسيالاردى كوپتەپ ساتىپ الا باستاعان جانە ەكونوميكانىڭ ءىرى سەكتورلارىنا نەسيە بەرۋدى قولعا العان.
ال وتكەن سارسەنبى كۇنى ونلاين كەزدەسۋدە فەدەرالدىق رەزەرۆتىك جۇيەنىڭ باسشىسى سەنت-لۋيسا دجەيمس بۋللارد بۇل ەكونوميكالىق قيىندىق ءارى قاراي جالعاسا بەرەتىن بولسا, سالدارى اۋىر بولۋى مۇمكىن ەكەنىن ايتتى. ول سونىمەن بىرگە ينفلياتسيانىڭ وسۋىنە كۇمانمەن قارايدى. بۋللارد مىرزا فەدەرالدىق رەزەرۆتىك جۇيەنىڭ شارالارى مەن قىسقا جانە ۇزاق مەرزىمدى نەسيەلەردى باقىلاۋ شەشىمىنە دە باعا بەردى. ول ساراپشىلاردىڭ مولشەرلەمەلەر ءالى دە ۇزاق ۋاقىت بويى تومەن بولاتىنىنا سەنىمدىلىگىن العا تارتا وتىرىپ, ورتالىق بانكتىڭ ستاۆكالاردىڭ بولجامىن باسشىلىققا الۋى ءۇشىن ەش نەگىزدىڭ جوقتىعىن اتاپ ءوتتى. ول ءوز سوزىنەن كەيىن قويىلعان سۇراقتاردىڭ بىرىنە قىسقا جانە ۇزاق مەرزىمدى نەسيەلەردى باقىلاۋ ماسەلەسى ءالى دە زەرتتەۋدى تالاپ ەتەتىنىن ايتىپ, ءدال قازىر بۇل ستراتەگيانى جۇزەگە اسىرۋدى قيسىندى دەپ ەسەپتەمەيتىنىن جەتكىزدى.