جۋىردا ريو وليمپياداسىنىڭ چەمپيونى نيجات راحيموۆ باستاعان ءبىر توپ قازاقستاندىق اۋىر اتلەتتەر فەدەراتسياعا رەنىشىن ايتىپ, الەۋمەتتىك جەلىدە جىل باسىنان بەرى جالاقى الا الماي كەلە جاتقانىن مالىمدەگەن ەدى.
اتاپ ايتار بولساق, ولاردىڭ ىشىندە نيجات راحيموۆتان بولەك, ريو وليمپياداسىنىڭ قولا جۇلدەگەرلەرى كارينا گوريچەۆا مەن دەنيس ۋلانوۆ, 2019 جىلعى الەم چەمپيوناتىنىڭ كۇمىس مەدال يەگەرى يگور سون, ەلىشىلىك جانە حالىقارالىق دودالاردا ۇزدىكتەر قاتارىنان كورىنىپ جۇرگەن يبراگيم بەرسانوۆ, ايدار قازوۆ پەن رۇستەم سىباي بار. وسى ماسەلەگە سپورت جانە دەنە- شىنىقتىرۋ ىستەرى كوميتەتى پىكىر ءبىلدىرىپ, اتلەتتەر داۋلاعان قارجى جالاقى ەمەس دەمەۋشىلەر تاراپىنان بەرىلەتىن قوسىمشا سىياقى ەكەنىن ايتتى. ال ۇلتتىق وليمپيادا كوميتەتى تاراپىنان سپورتشىلارعا تۇراقتى جالاقى بەرىلىپ كەلگەنى بەلگىلى بولدى.
مىسالى, 2020 جىلدىڭ 1 قاڭتار مەن 31 مامىر ارالىعىندا نيجات راحيموۆ – 4 250 000 تەڭگە (ورتا ەسەپپەن ايلىق جالاقىسى 850 مىڭ تەڭگە), دەنيس ۋلانوۆ – 2 250 000 تەڭگە (ايىنا 450 مىڭ تەڭگە), يگور سون – 1 250 000 تەڭگە (ايىنا 250 مىڭ تەڭگە), كارينا گوريچەۆا – 1 000 000 تەڭگە (ايىنا 200 مىڭ تەڭگە), يبراگيم بەرسانوۆ – 823 868 تەڭگە (ايىنا 164 773 تەڭگە), ايدار قازوۆ – 795 701 تەڭگە (ايىنا 159 140 تەڭگە), رۇستەم سىباي – 778 801 تەڭگە (ايىنا 155 760 تەڭگە) جالاقى العان.