ازەربايجان ۇكىمەتى ەلدەگى كارانتين رەجيمىن 1 شىلدەگە دەيىن ۇزارتىپ, 14-15 ماۋسىم كۇندەرى تۇرعىندارعا ۇيدەن شىعۋعا تىيىم سالدى. بۇل تۋرالى اتالعان ەلدىڭ كوروناۆيرۋستىڭ تارالۋىنا جول بەرمەۋ جونىندەگى جەدەل شتابى حابارلادى.
"سانيتارلىق-ەپيدەميولوگيالىق جاعدايدى تالداۋ جانە دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىستارى بويىنشا, ەلىمىزدە ارنايى كارانتيندىك رەجيم 2020 جىلدىڭ 1 شىلدەسى ساعات 00:00-گە دەيىن ۇزارتىلادى", - دەلىنگەن جەدەل شتابتىڭ حابارلاماسىندا.
سونداي-اق حابارلامادا 14-15 ماۋسىمدا باكۋ, گياندجا, لەنكوران, سۋمگايت سىندى ءىرى قالالاردا جانە تاعى ءىرى بەس اۋداندا قاتاڭ رەجيمدەگى كارانتين بولاتىنى ايتىلعان. وسى ۋاقىت ارالىعىندا ادامدارعا ۇيدەن شىعۋعا بولمايدى.
ازەربايجاندا مەملەكەتارالىق شەكارالار 15 ماۋسىمنان 1 شىلدەگە دەيىن جابىق بولادى. بۇل ەلدە كارانتين رەجيمى 24 ناۋرىزدا ەنگىزىلگەن ەدى. كەيىنىرەك ەپيدەميولوگيالىق جاعدايعا بايلانىستى كارانتين 4 مامىرعا دەيىن ۇزارتىلدى. ەندى ول 1 ماۋسىمنان 15 ماۋسىمعا دەيىن سوزىلىپ وتىر.
سوڭعى دەرەكتەرگە سايكەس, ازەربايجاندا كوروناۆيرۋس جۇقتىرعاندار سانى 8191-گە جەتتى, 98 ادام قايتىس بولدى.