جاسىل جەلەك ساياسىنداعى شاھار

كەيىنگى جىلدارى الماتىدا اعاشتاردىڭ ازايىپ كەتكەنىنە, اۋاسىنىڭ لاستانۋىنا بايلانىستى ماسەلەلەر ءجيى كوتەرىلىپ كەلگەنى ءمالىم. وسى ولقىلىقتىڭ ورنىن تولتىرۋ ءۇشىن اتقارىلىپ جاتقان جۇمىس تا از ەمەس سى­ڭايلى. قالانىڭ جاسىل ەكونوميكا باسقارماسىنىڭ مالىمەتى بويىنشا بىلتىر #JasylAlmaty اكتسياسى اياسىندا 135 مىڭ جاسىل جەلەك وتىرعىزىلعان. كوشەتتەر كوپشىلىك جينالاتىن اۋماقتارعا, ونىڭ ىشىندە مەكتەپتەردىڭ, اۋرۋ­حانالاردىڭ اينالاسىنا, بولاي تاۋىنىڭ, كوكتوبەنىڭ بوكتەر­لەرىنە, اتاكەنتتىڭ, اتلەتتەر اۋىلى مەن «الاتاۋ» تەاترىنىڭ الاڭدارىنا ەگىلدى.

سالىستىرمالى تۇرعىدان قارا­ساق, مەگاپوليستەگى ەڭ جاسىل ەلدى مەكەن مەدەۋ اۋدانىندا 472 مىڭنان استام اعاش بار ەكەن. ال ناۋرىزباي جانە الاتاۋ اۋداندارىندا شامامەن 202 مىڭ جانە 179 مىڭ اعاش ءوسىپ تۇر.

جاسىلداندىرۋ بويىنشا ودان كەيىنگى ورىندى تۇركسىب اۋدانى يەلەنگەن, مۇندا اعاش سانى – 431,5 مىڭ ءتۇپ. اعاش سانى بويىنشا ۇزدىك ۇشتىككە بوس­تاندىق اۋدانى دا كىرەدى. مامان­دار مۇنداعى 380 مىڭ ءتۇپ اعاشتى ساناپ شىقتى. اۋەزوۆ اۋدانىنداعى اعاشتار سانى 100 مىڭعا كەم, ياعني 255 مىڭعا جۋىق. جەتىسۋ اۋدانىندا 220 مىڭنان استام, ال المالى اۋدانىندا 213 مىڭ اعاش بار.

وسى ارادا اعاشتار وتىرعى­زىلۋ كورسەتكىشىنە كوپشىلىك ورىندار عانا ىلىگىپ وتىرعانىن ايتا كەتەلىك. بۇل قاتاردا جەكە اۋماق­تارداعى, زيراتتارداعى, رەس­پۋب­ليكالىق ماڭىزى بار جەرلەر­دەگى جاسىل جەلەكتىڭ اۋماعى­نا توقتالعان جوقپىز.

بۇگىنگى تاڭدا قالادا بارلىعى 2 352 مىڭ اعاش بار. ونىڭ ىشىندە  جاقىندا ەگىلگەن شاعىن كوشەتتەر مەن «اۋىرىپ» تۇرعان اعاشتاردان بولەك, جاپىراعىن كەڭگە جايعان اۋقىمدى اعاشتاردىڭ سانى 1,8 ملن. سوندىقتان اعاشتاردى زيان­كەس­تەردەن قورعاۋ جانە ساۋىق­تىرۋ جۇمىستارى جۇرۋدە.

«جاسىل جەلەكتى وڭدەۋ جۇمىس­تارى قورعاۋدىڭ بيولوگيالىق, قاجەت بولعان جاعدايدا حيميالىق ادىسىمەن جۇرگىزىلۋدە. الدىمەن 5-7 كۇن بويى زيانكەستەردىڭ دامۋ فەنولوگياسىنا, تارالۋى­نا مو­نيتورينگ جاسالىپ, سودان كەيىن عانا جۇمىستى باستادىق», دەيدى جاسىل ەكونوميكا باسقار­ماسى­نىڭ وكىلدەرى. جاسىل جەلەكتى وڭ­دەۋ تۇندە جاسالاتىنىن ايتا كەتەيىك.

الماتى