قازاقستاننىڭ ۇلتتىق قۇراما كومانداسىنىڭ كاپيتانى تالعات جايلاۋوۆ جوعارى حوككەي ليگاسىندا (جحل) ونەر كورسەتەتىن قاراعاندىنىڭ «سارىارقا» كلۋبىنىڭ جەيدەسىن كيدى, - حابارلايدى Egemen.kz.
1985 جىلدىڭ 7 شىلدەسىندە وسكەمەندە تۋىپ-وسكەن تالعات ءوزىنىڭ سپورتتىق كارەراسىن جەرگىلىكتى "تورپەدو" كلۋبىندا باستادى. ودان كەيىن استاناعا اتتانىپ, 11 ماۋسىم بويى "بارىستىڭ" نامىسىن قورعادى. قۇرلىقتىق حوككەي ليگاسىندا (قحل) 418 رەت مۇز ايدىنىنا شىققان شابۋىلشى 75 گول سوعىپ, 105 رەت ناتيجەلى پاس بەردى. بارلىعى – 180 ۇپاي.
2007 جىلى جايلاۋوۆ ەلىمىزدىڭ ەڭ ۇزدىك حوككەيشىسى دەپ تانىلسا, 2014 جىلى قحل-دىڭ "جۇلدىزدار ماتچىندا" ونەر كورسەتتى. قازاقستان قۇراماسى ساپىندا قىسقى ازيا ويىندارىنىڭ جەڭىمپازى (2011 جىلى) جانە كۇمىس جۇلدەگەرى (2007 جىلى) اتاندى. ءداپ وسى سپورتشى جوعارىدا اتالعان قوس جارىستىڭ اشىلۋ سالتاناتىندا قازاق ەلىنىڭ كوك بايراعىن ۇستاپ شىعۋ قۇرمەتىنە بولەندى.
وتاندىق حوككەيدىڭ دامۋىنا ەلەۋلى ۇلەس قوسقان تالعات جايلاۋوۆتىڭ "بارىسپەن" كەلسىمشارتى 30 ساۋىردە اياقتالعان بولاتىن. ال كۇنى كەشە عانا ونىڭ "سارىارقاعا" اۋىسقانىن قاراعاندىلىق كلۋبتىڭ ءباسپاسوز قىزمەتى راستادى.