وبلىستىق پوليتسيا دەپارتامەنتىنىڭ مالىمەتىنشە, وبلىس اۋماعىندا قاراۋسىز جۇرگەن 680 باس مال ايىپ تۇراعىنا قامالعان. قاراۋسىز جۇرگەن مالداردى قاماۋ ءۇشىن 125 ايىپ تۇراعى ورناتىلىپتى.
وسىنداي شارا قولدانۋعا اۋىل تۇرعىندارىنىڭ باعىپ وتىرعان مالدارىنا دۇرىس قاراماي, ەمىن-ەركىن جىبەرە سالعاندارى سەبەپ بولعان.
– ويتكەنى قاراۋسىز جۇرگەن مال بارىمتاشىلاردىڭ قولىنا وڭاي تۇسەدى. تەمىر جول بويىندا قاراۋسىز جۇرگەن مالدىڭ كەسىرىنەن بىلتىر 89 جول-كولىك وقيعاسى ورىن الدى. قازىر جول-كولىك وقيعالارىنىڭ الدىن الۋ ماقساتىندا پوليتسيا قىزمەتكەرلەرى وبلىس اۋماعىنداعى اۆتوجولداردا, جازعى جايىلىمداردا رەيدتەر جۇرگىزۋدە. يەسىز جۇرگەن مال ارنايى ايىپ تۇراعىنا قامالادى, – دەيدى دەپارتامەنت وكىلدەرى.
مىسالى, 23 مامىر كۇنى وتكىزىلگەن رەيد بارىسىندا پوليتسيا قىزمەتكەرلەرى ايىپ تۇراعىنا 200 مال قاماعان. جول-پاترۋلدىك پوليتسيا قىزمەتكەرلەرى پاۆلودار-جەلەزين رەسپۋبليكالىق اۆتوجولى بويىندا قاراۋسىز جۇرگەن سيىرلاردى انىقتادى. يەسىز جۇرگەن مال تەرەڭكول اۋدانى جاڭابەت اۋىلىنىڭ تۇرعىندارىنا تيەسىلى ەكەنى انىقتالدى. وسى فاكتى بويىنشا جينالعان ماتەريالدار كىنالى تۇلعالاردى جاۋاپكەرشىلىككە تارتۋ ءۇشىن ۆەتەريناريا ورگاندارىنا جىبەرىلگەن.
مالىن قاراۋسىز جىبەرگەن اۋىل تۇرعىندارى 3 ايلىق ەسەپتىك كورسەتكىش كولەمىندە ايىپپۇل تولەۋگە مىندەتتەلۋى مۇمكىن.
ال مال ۇرلىعى وبلىس ورتالىعى, ەكىباستۇز قالالارىنا قاراستى اۋىلدىق اۋماقتاردا, اقتوعاي, ەرتىس, ماي, شارباقتى جانە پاۆلودار اۋداندارىندا كوبەيگەن.
بىلتىر وڭىردە جەدەل ىزدەستىرۋ بارىسىندا پوليتسەيلەر مال ۇرلىعىمەن اينالىسقان 52 بارىمتاشىنى قولعا تۇسىرگەن. جالپى سانى 116 ءىرى قارانى ۇرلاعان 9 قىلمىستىق توپتى قولعا ءتۇسىردى. پوليتسيا قىزمەتكەرلەرى وتكەن جىلى مال يەلەرىنە جالپى قۇنى 75 ميلليون تەڭگەگە تەڭ 251 باس ۇرلانعان مالىن قايتارىپ بەرگەن.
ال بارىمتاشىلار بولسا, مالدى جايىلىمدا جۇرگەن جەرلەرىنەن الىپ كەتىپ وتىرعان. ۇرلانعان مالدى تۋىستارىنا, اۋىل تۇرعىندارىنا ارزان باعامەن ساتقان.
پاۆلودار وبلىسى