شولاقساي اۋىلى ناۋىرزىم اۋدانىنداعى سىرتكوز قىزىعارلىقتاي ەلدى مەكەننىڭ ءبىرى. مۇندا وسى وڭىردەگى ەڭ ءىرى «شولاقساي» جاۋاپكەرشىلىگى شەكتەۋلى سەرىكتەستىگى 18 مىڭ گەكتارعا ەگىن ەگەدى, شامالاپ مال دا ۇستايدى. سوناۋ 90-شى جىلدارى تۇتاستاي ساقتالىپ قالعان اۋىلدار تىكەلەي جەكە ادامداردىڭ ىسكەرلىگى مەن تاباندىلىعىنىڭ ارقاسى ەكەنى جۇرتتىڭ بارىنە بەلگىلى. «شولاقساي» كەڭشارىنداعى م ۇلىكتىڭ بارلىعىن شەتىن شىعارماي تالان-تاراجدان ساقتاپ, قايدا كوشەرىن بىلمەي بوسىعان اۋىلداستاردى دا بوجىراتپاي ۇستاپ قالعان ومىرزاق يحتيلياپوۆ بولاتىن.
جاڭا اكىمنىڭ العاشقى كۇنى
مۇنداي «قىزىل ديرەكتورلار» وبلىستا ساناۋلى عانا. قامىستى اۋدانىنداعى قاراباتىر, قاراسۋ اۋدانىنداعى كليۋچەۆوي, اۋليەكول اۋدانىنداعى ديەۆ اۋىلدارىندا ءبىر ءۇيدىڭ شەكەسى بۇزىلعان جوق. ولار اۋىل شارۋاشىلىعى داعدارعان قيىن جىلداردان دا قينالماي ءوتتى. تورعاي ءوڭىرى مەن ناۋىرزىم اۋدانىنداعى تاراعان اۋىلدىڭ ادامدارى شولاقساي اۋىلىنا كەلىپ قونىستاندى. شارۋاشىلىق باسشىسى ولارعا جۇمىس بەردى, ايتەۋىر قاتاردان قالماۋى ءۇشىن قولتىقتان دەمەدى. اۋىلداعى ارالاس مەكتەپتە ءۇش جۇزدەن اسا بالا وقىدى. بۇل شەت اۋدانداعى اۋىل مەكتەبى ءۇشىن از ەمەس ەدى. شارۋاشىلىقتىڭ مەكتەپكە دە, اۋىلدىڭ باسقا الەۋمەتتىك قاجەتىنە دە قاراسقانى از ەمەس.
شولاقساي اۋىلى ناۋىرزىم اۋدانىنداعى سىرتكوز قىزىعارلىقتاي ەلدى مەكەننىڭ ءبىرى. مۇندا وسى وڭىردەگى ەڭ ءىرى «شولاقساي» جاۋاپكەرشىلىگى شەكتەۋلى سەرىكتەستىگى 18 مىڭ گەكتارعا ەگىن ەگەدى, شامالاپ مال دا ۇستايدى. سوناۋ 90-شى جىلدارى تۇتاستاي ساقتالىپ قالعان اۋىلدار تىكەلەي جەكە ادامداردىڭ ىسكەرلىگى مەن تاباندىلىعىنىڭ ارقاسى ەكەنى جۇرتتىڭ بارىنە بەلگىلى. «شولاقساي» كەڭشارىنداعى م ۇلىكتىڭ بارلىعىن شەتىن شىعارماي تالان-تاراجدان ساقتاپ, قايدا كوشەرىن بىلمەي بوسىعان اۋىلداستاردى دا بوجىراتپاي ۇستاپ قالعان ومىرزاق يحتيلياپوۆ بولاتىن.
جاڭا اكىمنىڭ العاشقى كۇنى
مۇنداي «قىزىل ديرەكتورلار» وبلىستا ساناۋلى عانا. قامىستى اۋدانىنداعى قاراباتىر, قاراسۋ اۋدانىنداعى كليۋچەۆوي, اۋليەكول اۋدانىنداعى ديەۆ اۋىلدارىندا ءبىر ءۇيدىڭ شەكەسى بۇزىلعان جوق. ولار اۋىل شارۋاشىلىعى داعدارعان قيىن جىلداردان دا قينالماي ءوتتى. تورعاي ءوڭىرى مەن ناۋىرزىم اۋدانىنداعى تاراعان اۋىلدىڭ ادامدارى شولاقساي اۋىلىنا كەلىپ قونىستاندى. شارۋاشىلىق باسشىسى ولارعا جۇمىس بەردى, ايتەۋىر قاتاردان قالماۋى ءۇشىن قولتىقتان دەمەدى. اۋىلداعى ارالاس مەكتەپتە ءۇش جۇزدەن اسا بالا وقىدى. بۇل شەت اۋدانداعى اۋىل مەكتەبى ءۇشىن از ەمەس ەدى. شارۋاشىلىقتىڭ مەكتەپكە دە, اۋىلدىڭ باسقا الەۋمەتتىك قاجەتىنە دە قاراسقانى از ەمەس.
الايدا, شارۋاشىلىق يەسى شارۋامەن اينالىسادى, اۋىلدىڭ وزگەدەي شارۋاسىنا ۇلگەرمەيدى, ءارى قۇقى دا جوق. ول وسى جەردىڭ, ەلدىڭ يەسى اۋىلدىڭ اكىمى بولۋعا ءتيىس. اۋىل اكىمسىز بولعان جوق. بىراق سوڭعى جىلدارى شولاقسايدان قىزىق كەتكەندەي ءبىر كوڭىلسىز قالىپ ورناعانى راس ەدى. اۋىلدان قالاعا كوشەتىندەر جيىلەدى. مەكتەپتەگى بالانىڭ سانى ازايدى. شارۋاشىلىق باسشىسىنىڭ دا, وسى اۋىلدا تۋىپ, ءوسىپ-ءونىپ كەلە جاتقان ادامداردىڭ دا سالى سۋعا كەتكەندەي بولدى. شارۋاعا ادام تابىلماي قالمايدى, جۇمىسشىنى سىرتتان اكەلسە دە ءبىر ءيىنى تابىلادى. جۇرت كوشە بەرسە, اۋىلعا جانى اشىماسا ونىڭ ساقتالۋى ەكىتالاي. كەيىنگى كەزدە ءارى تارت تا, بەرى تارت اڭگىمە دە كوبەيە باستاعان ەدى. اۋىل اكىمدەرىن سايلاپ قويادى دەگەندە شولاقسايلىقتار ەلەڭ ەتكەن. اۋىلدىڭ قۇرۋى دا, قىزىعى دا ادامعا بايلانىستى. 7 تامىز كۇنى سايلاۋدا اۋداندىق ءماسليحات دەپۋتاتتارى داۋىس بەرىپ, اۋىلعا سەرتاي شارافيەۆ اكىم بولىپ كەلدى.
نەگىزى, تامىزدى امال ايى دەيدى. جازدىڭ مامىراجاي ىستىعىنىڭ بەتى قايتىپ, تابيعات-انانىڭ ءوزى جانى بار تىرشىلىكتىڭ بارىنە الدا كۇزدىڭ, قىستىڭ بارىن ەسكەرتىپ قويادى. ىستىققا ادامداردىڭ دا ەتى ۇيرەنەدى, ءومىر بويى وسىلاي بولىپ تۇرادى دەگەندەي جالقاۋلىق, سامارقاۋلىق تا بويعا ۇرلانىپ كىرەدى.
– ومىردە دە سولاي-اۋ, شاماسى, – دەيدى جاڭا اكىم سەرتاي شايمەردەن ۇلى. – ادام ەرتەڭىن ويلاماسا, العا ۇمتىلماسا, قاي جەرگە كوشسە دە ەرتەگى مەكەندى تابا المايدى. شولاقساي بۇرىن قانداي ەدى. بۇگىن توزۋدىڭ الدىندا تۇر ەكەن. ال ونى توزدىرماۋ قولدان كەلمەيتىن شارۋا ەمەس!
اكىم اۋىلعا كەلگەن العاشقى كۇنى ىسكە كىرىستى. نەدەن باستادى دەڭىز. ءىستى اۋىلدىڭ تازالىعى مەن تارتىپتەن باستاپتى. كوشەنىڭ ەكى بەتىندەگى قوقىستى تازالاتىپ, بەت الدىنا جالبىراپ ءوسىپ كەتكەن اعاشتاردى بۇتاتىپتى. ءبىز كورگەندە شولاقساي ساقال-مۇرتىن قىرىپ, ءوزىن رەتكە كەلتىرگەن كىسىدەي جۇتىنىپ تۇر. كوشەدە شاشاۋ جاتقان ءبىر تاياق جوق, پىسىق كەلىننىڭ سىپىرعان الاشاسىنداي جايناپ جاتىر.
– وسىدان ەكى ايداي بۇرىن شولاقساي دجۋنگلي سياقتى ەدى. ال ادامدار سامارقاۋلىققا ۇيرەنگەن. كوشەدە قوقىس جاتسا, باسىپ ءوتىپ كەتە بەرەدى, ونى تازالاۋدى ەسىنە دە المايدى. مالدىڭ كوڭى دە ءۇيىنىڭ سىرتىندا ءۇيىلىپ تۇرادى. ال قالاعا نە ءۇشىن كوشكىسى كەلەدى؟ تازا جەردە تۇرعىسى كەلەدى, بىراق تازالاۋعا ءوزىنىڭ موينى جار بەرمەيدى. راس, ىستىق سۋ, سۋىق سۋى شۇمەكتەن كەلىپ تۇر دەگەندەي, قالادا اۋىلعا قاراعاندا تىرشىلىككە جاعدايدىڭ بار ەكەنى راس. ال اۋىلدىڭ دا قالاعا قاراعاندا ءوز كەرەمەتى بار ەمەس پە؟ اسپاننان تۇستىك پە؟ شولاقسايدىڭ كەرەمەتىن ايتايىن. بارلىق جەردە اۋىز سۋ پروبلەماسى جاۋىر بولعان. ال شولاقسايدا ءار ءۇيدىڭ اۋلاسىندا بۇلاقتىڭ سۋىنداي قۇدىق زاڭعىراپ تۇر. مالدىڭ جايىلىمى كەڭ, نەشە سيىر ۇستايمىن دەسەڭ جەر دە, ءشوپ تە جەتەدى, – دەيدى جاڭا اكىم.
العاشقى كۇندەرى جاڭا اكىمنىڭ كوشە سىپىرتقانىنا اۋىلدا قارسىلىق بىلدىرگەندەر دە بولماي قالمادى. «ءوزى اۋدان ورتالىعىنان كەلگەن سوڭ اۋىلدى دا سونداي كورىپ وتىر عوي, بۇرىن كوڭدى قالاي ۇيدىك, سولاي ۇيەمىز», دەستى «بەلسەندى» كىسىلەر. اكىم دە قادالعان جەرىنەن قان الاتىننىڭ ءبىرى ەكەن, وندايلارعا بوي بەرمەدى. ءتىپتى, بولماعان سوڭ زاڭدى الدارىنا تارتتى. اۋىلداستاردى ءيىرىپ, ايتقانىن ىستەتتى. مىنە, ەكى ايدان بەرى شولاقسايدىڭ كوشەسىندە بۇرىنعىداي مال جۇرمەيدى, مەكتەپتىڭ, نامازحانانىڭ, دۇكەندەردىڭ اينالاسى تاپ-تازا, ۇيلەر شارباقتارىن سىرلاي باستاپتى. بۇل جاڭا اكىم ءۇشىن بولاشاق جوسپارلارىنىڭ باسى عانا.
اكىم مەن كاسىپكەر ءبىر باعىتقا قاراۋى ءتيىس
سەرتاي شايمەردەن ۇلى ءوزى ايتقانداي, «اسپاننان تۇسكەن جوق», وسىعان دەيىن ناۋىرزىم اۋدانىندا ءبىراز قىزمەت ىستەدى. شولاقسايعا كەلەردە اۋداندىق توتەنشە جاعداي ءبولىمىن باسقاردى. قىسقاسى, ادامدارمەن جۇمىس ىستەۋ تاجىريبەسى جانە ءىستىڭ كوزىن تاباتىن شالىمدىلىعى دا بار. ول سايلاۋعا تۇسەردە كوپ ويلاندى. اۋىل ادامداردى زەرىكتىرمەس ءۇشىن نە ىستەۋ كەرەك؟ اۋىلداستار اۋىلدان نەگە كەتەدى؟ قازىر ادامنىڭ ماتەريالدىق جانە رۋحاني قاجەتى بولماسا كىمدى ۇستاپ تۇراسىڭ؟ الايدا اۋىلدان قالاعا كەتىپ, شىلقىپ كەتكەندەر دە از. جۇمىس بولسا, وعان قوسا مال ۇستاسا, ەسىگىنىڭ الدىنا باقشا ەكسە نەگە تۇرۋعا بولمايدى. اۋىلدا تۇرعان سوڭ ادام اۋقاتتى بولۋى كەرەك.
– ويپىر-اي, احمەت بايتۇرسىنوۆ اتامىز ءدال شولاقسايعا ءبىر تۇنەپ كەتكەندەي بولادى ماعان. «قازاق كەرەگىنىڭ كوبى اركىمگە-اق ماعلۇم عوي: ءبىز كەيىن قالعان حالىق, العا بارىپ, جۇرت قاتارىنا كىرۋ كەرەك. باسقادان كەم بولماس ءۇشىن ءبىلىمدى, باي ءھام كۇشتى بولۋىمىز كەرەك. ءبىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەكتەردىڭ جولىندا جۇمىس ىستەۋ كەرەك», دەگەن عوي جارىقتىق! ءدال شولاقسايلىقتارعا قاراتىپ ايتقان ءتارىزدى, – دەيدى اكىم تامسانىپ. – احمەت اتامىز كورسەتكەن وسى ءۇش جولدان باسقا جولمەن جۇرگەن قازاقتىڭ دامىپ كەتكەن تۇگى جوق.
اۋىلداعى ادامنىڭ كاسىبى – ەگىن مەن مال. قازىر مامانسىز وسى ەكى كاسىپتىڭ دە جولى داڭعىل ەمەس. اۋىلعا جاس مامان تارتۋ وسى جەردەگى شارۋاشىلىق باسشىسىنىڭ دا, اكىمنىڭ دە ورتاق مۇددەسى. اۋىلعا جاس كەلسە جاڭا تىنىس اشىلعانداي بولادى. سوندىقتان اكىم «شولاقساي» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ءمادي يحتيلياپوۆقا اۋىلداعى بوساعان ۇيلەردى شارۋاشىلىقتىڭ بالانسىنا قايتا ساتىپ الۋدى ۇسىندى. سونداي ءۇيدىڭ ءبىرىن سەرتاي شايمەردەن ۇلى بىزگە دە ەرىنبەي ەرتىپ ءجۇرىپ كورسەتتى دە. ءۇيدىڭ بۇزىپ الا بەرەتىندەي ارسا-ارساسى شىعىپ تۇر.
– وسى ۇيدە ونشاقتى جىلدان كوپ تۇرعان كىسى ءبىر شەگە قاقپاعان, ءبىر رەت بوياۋ جاقپاعان. ءۇي توزباي قايتەدى؟ بۇل – كەڭەس وداعى كەزىندە «شولاقساي» كەڭشارى دۇرىلدەپ تۇرعاندا سالىنعان ۇيلەر. قابىرعاسى كىرپىشتەن ورىلگەن, توبەسى پليتا, قازىر قۇلاپ قالاتىن ءۇي ەمەس, ىرگەتاسى مىقتى. شارۋاشىلىق ەسەبىنەن جوندەتىپ, اۋىلعا كەلگەن جاس ماماندارعا بەرەمىز, – دەيدى اكىم. اۋىلداعى كاسىپكەر الەۋمەتتىك ماسەلەنى كەرى ىسىرايىن دەمەيدى, بىرەۋدەن ەكەۋ جاقسى, وعان وسىنداي تۇرتكى, ۇسىنىس كەرەك-اق بولاتىن. ءبىر ادام نەنى بىتىرە بەرەدى؟ اكىمنىڭ بۇل ۇسىنىسىنا ءمادي دە قۋانىپ قالدى. اۋىلدان تاعى دا وسىنداي 7-8 ءۇيدىڭ شىعاتىن ءتۇرى بار. شارۋاشىلىق باسشىسى مەن اكىم اقىلداسا كەلە سولاردىڭ بارلىعىن دا يەسىنەن ساتىپ الىپ, شارۋاشىلىقتىڭ بالانسىنا الاتىن بولدى. اۋىلدان كوشەم دەگەندەر ءۇيىن بۇزبايدى, وعان ەشقانداي جول بەرىلمەيدى.
اۋىل شارۋاشىلىعىنان بەرەكە كەتكەن جىلدارى بۇرىنعى «شولاقساي» كەڭشارىنىڭ كازانكا دەگەن بولىمشەسى جابىلىپ قالعان ەكەن. اكىم اتقا مىنگەلى سول شۇرايلى جەردە تۇرعان كازانكانى قايتا جانداندىرىپ, مال شارۋاشىلىعىن دامىتساق دەگەن ۇسىنىسىن ماديگە تاعى ايتتى. ەكەۋى كازانكانى ارالاپ, ول جەردەن دە ءتورت ءۇيدى جوندەپ, جاماپ-جاسقاپ قاتارعا قوسۋعا بولاتىنىنا كوز جەتكىزدى.
– شارۋاشىلىقتا قارجى, مەندە بيلىك بار. ەكەۋمىز ءتىل تابىسىپ, ءبىر باعىتتا جۇمىس ىستەسەك, بىتپەيتىن نە شارۋا قالادى؟ ادام قاي جەردە تۇرسا دا ەڭبەكسىز ەشتەڭە جوق. ادامدارعا وسىنى ۇعىندىرساق, ولارعا جاعداي جاساساق, سۇرانىسىن وتەسەك, بارلىعى دا ورنىنا كەلەدى, – دەيدى سەرتاي شارافيەۆ.
شولاقساي دا قايىڭ توعايى سەكىلدى...
– ءاپ-ادەمى قىزمەتىڭىز دە بار ەكەن, اۋىلدىڭ اكىمدىگىنە نەگە تالاستىڭىز, مۇندا نەگە كەلدىڭىز؟ «اسفالت اكىم» ەمەسسىز بە؟– دەيمىز اكىمنەن ءسوز تارتۋ ماقساتىمەن.
– راس, ناۋىرزىم اۋدانىنىڭ ورتالىعى قارامەڭدى قوستاناي سياقتى بولماسا دا, شولاقسايعا قاراعاندا وندا بارلىق جاعداي بار. جانىمدى كۇتىپ وتىرا بەرۋىمە بولار ەدى. مەن وتكەن جىلى ينسۋلت الىپ, 8 اي اۋىردىم. اۋىرىپ ءجۇرىپ, «ادام ەلىمە, جەرىمە نە بەردىم, نە بەرەمىن دەپ ءومىر ءسۇرۋى كەرەك ەكەن» دەگەن وي كوڭىلىمنەن شىقپادى. ءوزىمنىڭ تالپىنۋىممەن اۋرۋدىڭ بەتىن ءارى قاراتقانداي بولدىم, قولىمداعى تاياعىمدى تاستادىم. سوسىن وسى سايلاۋعا تۇسۋگە تاۋەكەل ەتتىم. بىراق «اسفالت اكىم» ەمەسپىن, سايلانعان سوڭ-اق شولاقسايعا كوشىپ كەلدىم. مەن قىزمەتىمە دە, حالقىما دا ادال اداممىن, – دەيدى سەرتاي شايمەردەن ۇلى.
اۋىلدا تۇرعان اعايىنعا ماتەريالدىق بايلىق قالاي كەرەك بولسا, رۋحاني بايلىقتىڭ ماڭىزى ودان كەم ەمەس. اكىم ىسكە كىرىسكەن ايدا ەلىمىز كونستيتۋتسياسى كۇنى قۇرمەتىنە گۇلدەر مەرەكەسىن وتكىزدى. شولاقسايلىقتاردىڭ گۇل ەكپەيتىنى كەم-اۋ, ءسىرا. بىرەۋى اكەلدى, بىرەۋى قىزىقتادى. كەلەر جىلى, بالكىم, ول دا گۇل ەگەر. ودان كەيىن اۋىلدىڭ ورتاسىنداعى ستاديوندى تازالاپ, سوندا دەنساۋلىق كۇنىن وتكىزدى. جارىس دەسە اۋىلدىڭ دەلەبەسى قوزىپ كەتەتىن ادەتى ەمەس پە. جۇگىرىپ, سەكىرىپ, اۋىلداستار ءبىر ءماز بولىپ قالدى. وسى شارانىڭ بارلىعىن اكىم شارۋاشىلىقتىڭ دەمەۋىمەن جاسادى. اۋىلداعى جاستار ءۇشىن اپتاسىنا ءبىر رەت ديسكوتەكا وتكىزۋدى دە قولعا العالى وتىر. اۋىلدىڭ ورتاسىنداعى كەڭەس وداعى كەزىنەن قالعان كلۋبتى قالپىنا كەلتىرۋدىڭ دە ۋاقىتى جەتكەن سياقتى. اۋدان باسشىلىعى مەن شولاقساي اۋىلدىق اكىمى, «شولاقساي» شارۋاشىلىعى كەلىسىپ, وسىنداي شەشىم جاساپ وتىر. ويتكەنى, ادامداردى رۋحاني جۇتاتۋعا بولمايتىنىن ۋاقىت ەسكە سالىپ قويادى. ال بۇرىنعى اسحاناعا قازىر جوندەۋ جۇمىستارى جۇرگىزىلۋدە.
– اۋىلدىڭ مۋزەيىن اشۋ تۋرالى وسى «شولاقساي» شارۋاشىلىعىنىڭ بۇرىنعى جەتەكشىسى, بۇگىنگى ەڭبەك ارداگەرى ومىرزاق يحتيلياپوۆتىڭ باستاماسىن مەن قۋانا قارسى الدىم. بۇل اۋىلدىڭ ىرگەتاسىن رەسەي پاتشالىعى زامانىندا قازاق جەرىنە قونىس اۋدارعان ورىس شارۋالارى قالاعان ەكەن. سودان بەرى اۋىلدا كەرەمەت كىسىلەر تۇردى, شارۋاشىلىقتا ەڭبەك ۇلگىسىن كورسەتتى, زامان وزگەرىستەرىن اۋىل قالاي قارسى الدى؟ كەيىنگى ۇرپاق سونىڭ بارلىعىن ءبىلۋى ءتيىس, – دەيدى جاڭا اكىم. قازىر شولاقسايدا 350 وتباسى تۇرادى. سونىڭ اراسىندا 100 وتباسى ورىس ءتىلدى اعايىن. شاعىن اۋىلدا ءتۇرلى-ءتۇرلى ۇلت وكىلدەرىن كەزدەستىرۋگە بولادى. جاڭا اكىم اۋىلداعى پراۆوسلاۆيە دىنىندەگى تۇرعىنداردى جيناپ, ولاردىڭ سۇراۋىمەن قوستانايداعى پراۆوسلاۆيە شىركەۋىنىڭ باسشىلىعىنا شولاقسايدان عيبادات ءۇيىن اشۋدى ءوتىنىپ حات جازىپ جىبەرىپتى. مۇسىلمان دىنىندەگىلەردىڭ نامازحانا ءۇيى ورنالاسقان عيماراتتى قايتادان جوندەپ, ەكىنشى جاعىنان ەسىك شىعارىپ, عيبادات ءۇيىن جاساپ بەرمەكشى. وعان مۇسىلمان جۇرتى دا قارسىلىق بىلدىرگەن جوق. «كۇشتى بولۋ ءۇشىن بىرلىك كەرەك» دەگەن وسى.
اكىمدىك ىسىنە «اش قاسقىرداي كىرىسكەن» سەرتاي شايمەردەن ۇلىنىڭ اۋىل تۋرالى ۋايىمى دا جوق ەمەس. ول – مەكتەپتىڭ جايى. جىل سايىن بالا ازايىپ بارادى. ول جاستاردىڭ اۋىلعا دەگەن ەلدىك, پاتريوتتىق سەزىمىن جاني بەرۋ كەرەك دەپ بىلەدى. ادامنىڭ داۋلەتتى, باقىتتى بولۋى ونىڭ اۋىلدا, قالادا تۇرعانىنا بايلانىستى ەمەس, گاپتىڭ ءبارى ەڭبەكتە. شولاقسايدىڭ ءمولدىر سۋى مەن تازا اۋاسىن قيماي وتىرعاندار بار. وتكەن جىلى وسى اۋىلدان گەرمانياعا كوشكەن نەمىس كىسى شولاقسايعا كەلىپ ون كۇن جاتىپ, اۋناپ-قۋناپ كەتتى. «گەرمانيادا ەۋروپانىڭ قاي جەرىنە بارامىن دەسەم دە مۇمكىندىك بار, بىراق شولاقسايداي جەردىڭ ءجانناتى قايدا!» دەپ سىرىن ايتتى اۋىلداستارىنا.
وسىدان 4-5 جىل بۇرىن اۋىل سىرتىنداعى قايىڭ-تەرەك ارالاس شىققان توعايعا نايزاعاي ءتۇسىپ ورتەنىپ كەتكەن بولاتىن. اۋىل اعاسى ومىرزاق يحتيلياپوۆ كۇيگەن اعاشتارعا ەشكىمدى تيگىزبەدى. «تابيعات ءوزىن ءوزى رەتتەيدى, توعاي قايتادان وسەدى, تەك بارماڭدار, مال جايماڭدار», دەگەن. جەردىڭ جاعدايىن جاقسى بىلەتىن ومەكەڭنىڭ اۋىز جاپپاي-اق ايتقانى كەلدى. قازىر سول توعايدىڭ ورنىنا جاس شىبىقتار قايتادان شىعىپ, شولاقسايلىقتاردىڭ بۇرىنعىداي دەمالاتىن, اۋىلدىڭ قادىرلى قوناعىن كۇتەتىن ورنىنا اينالىپتى. اكىم ەرىنبەي ءبىزدى وسى توعايعا باستادى.
– مىنە, وسىدان ءتورت جىل بۇرىن مىنا توعايدان جۇرت كۇدەر ۇزگەن ەدى. ەندىگى كوركىن قاراشى؟ شولاقساي دا وسى توعاي سياقتى قايتادان كوركەيەدى ءالى, مەنىڭ وعان سەنىمىم كۇشتى! – دەدى سەرتاي شايمەردەن ۇلى.
ءيا, سەنىم العا جەتەلەيدى.
ءنازيرا جارىمبەتوۆا,
«ەگەمەن قازاقستان».
قوستاناي وبلىسى,
ناۋىرزىم اۋدانى,
شولاقساي اۋىلى.