بۇل جوبا كاسىپكەرلەرگە ءبىر كوزدەن ورتالىقتاندىرىلعان مەملەكەتتىك جانە سەرۆيستىك قىزمەتتەردى جەدەل الۋعا كومەكتەسەدى. مۇندا نيشالىق جوبالاردى سۇيەمەلدەۋ, جەڭىلدەتىلگەن 1% نەسيە بەرۋ, "1000 ساۋدا ورنى" باعدارلاماسى بويىنشا جەر ۋچاسكەلەرىن الۋ جانە قارجى سەكتورى, تاۋاردى جىلجىتۋ, ينۆەستيتسيا, تسيفرلىق, قۇقىقتىق, كومپەتەنتسيا جانە مەملەكەتتىك قىزمەت كورسەتىلەدى. وسىلايشا, كاسىپكەرلەر مەن ينۆەستورلار ءۇشىن بىرىڭعاي حاب قۇرىلادى. سونىمەن قاتار, مۇندا باستاۋىش كاسىپكەرلەرگە «بيزنەس-مەكتەپ», «باستاۋ-بيزنەس» وقىتۋ باعدارلامالارى بويىنشا كاسىپكەرلىكتىڭ نەگىزى وقىتىلادى.
اشىلۋ راسىمىنە قاتىسقان قالا اكىمى مۇرات ايتەنوۆ وڭىردەگى ەكونوميكالىق جاعدايدى جاقسارتۋ بويىنشا قابىلدانعان انتيكريزيستىك شارالار ءوز جەمىسىن بەرەتىنىنە سەنىمدى ەكەنىن جەتكىزدى. سونداي-اق, باعدارلامادا مەجەلەنگەن ميكروقارجى ۇيىمىن قۇرىپ, جەڭىلدەتىلگەن نەسيە, نيشالىق جوبالار مەن "ەگىستىكتەن دۇكەن سورەسىنە دەيىن" جانە مەملەكەتتىك باعدارلامالاردىڭ بۇكىل مۇمكىندىكتەرىن بارىنشا قولدانۋدى ايتتى.
ءىس-شارا بارىسىندا ءسوز العان شىمكەنت قالاسى كاسىپكەرلەر پالاتاسىنىڭ ديرەكتورى نۇرلان قابيشتاەۆ مەملەكەتتىك باعدارلامالار اياسىندا كاسىپكەرلىك سالاسىندا جىل سوڭىنا دەيىن جالپى
29,5 ملرد. تەڭگە يگەرۋ جوسپارلانعانىن اتاپ ءوتتى.
"باعدارلاما اياسىندا نيشالىق جوبالاردى ىسكە اسىرۋ قولعا الىنىپ جاتىر. قازىرگى تاڭدا, كاسىپورىندارمەن وسى نيشالىق جوبالاردىڭ ءتىزىمىن جاساقتاۋ ۇستىندەمىز. بۇگىندە 80-نەن استام نيشالىق جوبالار جاساقتالدى. وسىنىڭ اياسىندا, ءبىز يمپورت الماستىرۋدى قامتاماسىز ەتىپ, 400 ادامدى جاڭا جۇمىس ورنىمەن قامتىپ, 100 جاڭا تاۋاردىڭ ءتۇرىن جانە جاڭا 30 كاسىپورىن اشۋدى كوزدەپ وتىرمىز. بۇل باستامانى ىسكە اسىرۋ ماقساتىندا قۇرىلىپ جاتقان ميكروقارجى ۇيىمى ارقىلى قارجىلاندىرۋدى كوزدەپ وتىرمىز. بۇدان بولەك, ميكروقارجى ۇيىمى "ەڭبەك" باعدارلاماسى اياسىندا ءبولىنىپ جاتقان قارجىلاردى دا يگەرۋگە ىقپالىن تيگىزەدى", - دەدى نۇرلان قابيشتاەۆ.
سونىمەن قاتار مەملەكەت باسشىسىنىڭ تاپسىرماسىنا سايكەس جامبىل, الماتى جانە تۇركىستان وبلىستارىندا "ەگىستىكتەن دۇكەن سورەسىنە دەيىن" پيلوتتىق جوبالارى ىسكە قوسىلاتىن بولادى. بۇل رەتتە تۇركىستاندىق شارۋالارمەن وندىرىلەتىن تاۋارلاردى وتكىزۋ نارىعىنىڭ بىردەن ءبىر نۇكتەسى شىمكەنت قالاسى بولىپ تابىلماق. تۇركىستان وبلىسىندا وندىرىلەتىن اۋىلشارۋاشىلىق ونىمدەرىن شىمكەنت قالاسىندا قايتا وڭدەپ, فاسوۆكا جانە ۋپاكوۆكا جاساۋ ارقىلى تاماق ونەركاسىبىن دامىتۋعا مۇمكىندىك بار. بۇل ءوز كەزەگىندە الەۋمەتتىك ماڭىزى بار تاۋارلاردىڭ باعاسىن تۇراقتاندىرۋعا, وزىندىك قوسالقى شارۋاشىلىقتىڭ (لپح) كولەڭكەلى ەكونوميكادان شىعۋىنا جانە قوسىمشا جۇمىس ورىندارىن اشۋعا ىقپال ەتەدى.