تۇتىنۋشىنىڭ ەسەبىنەن زاڭسىز تابىس تاباتىندار ءالى دە بار. بۇعان اتىراۋ وبلىسىنىڭ پروكۋراتۋراسى گاز تۇتىنۋشىلاردىڭ قۇقىعىن قورعاۋ ماقساتىندا «قازترانسگازايماق» اق اتىراۋ وندىرىستىك فيليالىنا جۇرگىزگەن تالداۋ دالەل بولا الادى.
– فيليال «تابيعي مونوپوليالار تۋرالى» زاڭنىڭ 24-بابىنىڭ تالاپتارىن بۇزىپ, تۇتىنۋشىلاردان گازعا قوسۋ قىزمەتى ءۇشىن زاڭسىز تولەمدەردى تالاپ ەتىپ, 2018-2019 جىلدارى 65 ملن تەڭگەنى كىرىستەگەن. وسى زاڭ بۇزۋشىلىقتار ءۇشىن فيليال قر اكىمشىلىك قۇقىقبۇزۋشىلىق تۋرالى كودەكسىنىڭ 164-بابىنىڭ 4-بولىگىنە سايكەس (تابيعي مونوپوليالار تۋرالى زاڭنامانى بۇزۋ) اكىمشىلىك جاۋاپكەرشىلىككە تارتىلىپ, مەملەكەت پايداسىنا 4 ملن تەڭگە ايىپپۇل ءوندىرىلدى. پروكۋراتۋرانىڭ ارالاسۋىمەن وبلىس تۇرعاندارىنا گازعا قوسۋ قىزمەتتەرى تەگىن جۇرگىزىلەتىن بولدى. زاڭسىز تاجىريبە توقتاتىلدى, - دەپ حابارلادى وبلىستىق پروكۋراتۋرانىڭ ءباسپاسوز قىزمەتى.
پروكۋرورلىق قاداعالاۋ اكتىسى نەگىزىندە 21 ملن تەڭگە كولەمىندە زاڭسىز الىنعان تولەمدەر كاسىپكەرلەردىڭ جەكە شوتىنا كەرى قايتارىلىپتى. قازىر جەكە تۇلعالارعا 44 ملن تەڭگەنى قايتارۋ پروتسەسى جۇرگىزىلىپ جاتىر.