سەناتتىڭ الەۋمەتتىك-مادەني دامۋ جانە عىلىم كوميتەتىندە «ۇلتتىق اۋدارما بيۋروسى» قوعامدىق قورىنىڭ باسشىلىعىمەن كەزدەسۋ بولدى. بۇل تۋرالى سەناتتىڭ ءباسپاسوز قىزمەتى حابارلادى.
كوميتەت توراعاسى مۇرات باقتيار ۇلى الەمنىڭ جەتەكشى ۋنيۆەرسيتەتتەرىنىڭ ۇزدىك وقۋلىقتارىن مەملەكەتتىك تىلگە اۋدارۋ جانە جالپى جوبانىڭ ناتيجەسىن باعالاۋ جونىندە ۇيىم قىزمەتىن قورىتىندىلاۋعا باعىتتالعان كەزدەسۋدىڭ نەگىزگى ماقساتىن اتاپ ءوتتى.
قوعامدىق قوردىڭ اتقارۋشى ديرەكتورى راۋان كەنجەحان ۇلىنىڭ ايتۋىنشا, «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ اياسىندا تاريح, فيلوسوفيا, الەۋمەتتانۋ, پسيحولوگيا جانە تاعى باسقا سالالار بويىنشا قازىرگى زامانعى ۇزدىك كىتاپتار مەملەكەتتىك تىلگە اۋدارىلۋدا. ەلىمىزدىڭ الدىڭعى قاتارداعى وقۋ ورىندارى جانە وقىتۋشىلار, عالىمدار, ادەبيەتشىلەر مەن باسپاگەرلەر اراسىنان 300-دەن استام ماماندار وقۋلىقتاردى اۋدارۋ جۇمىسىنا اتسالىستى. وقۋلىقتار ماتىندەرى ادەبي جانە عىلىمي رەداكتسيالاۋدان بىرنەشە مارتە وتەدى.
كەزدەسۋ بارىسىندا ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ پرورەكتورى شارىپبەك امىربەكوۆ قاشىقتان ءسوز الىپ, وسى جوبا اياسىندا وقۋلىقتاردى اۋدارۋ ساپاسى بويىنشا تالداۋ ناتيجەلەرى تۋرالى ايتتى.
كەزدەسۋگە قاتىسۋشىلار اۋدارما ءىسىن دامىتۋداعى اعىمداعى ماسەلەلەردى جانە كىتاپتاردى مەملەكەتتىك تىلگە اۋدارۋدىڭ كەلەشەگىن تالقىلادى.
شاراعا ءبىلىم جانە عىلىم, مادەنيەت جانە سپورت مينيسترلىكتەرىنىڭ وكىلدەرى قاتىستى.