بيىل پاۆلودار وڭىرىندە ەگىن شارۋاشىلىعىن قولداۋعا 4,5 ملرد. تەڭگە سۋبسيديا بولىنگەن. جالپى, 618,3 مىڭ گەكتار القاپقا ءداندى داقىلدار ەگىلگەن. القاپتاردى تىڭايتۋ ماقساتىندا 14,3 مىڭ توننا مينەرالدى تىڭايتقىش ساتىپ الىنعان. كوكونىس وسىرۋىشلەر 6,8 مىڭ گەكتارعا كوكونىس تۇقىمىن سەۋىپ, باقشا داقىلدارى 1,7 مىڭ گەكتارعا, ال, 18,8 مىڭ گەكتار القاپقا كارتوپ وتىرعىزىلعان
شارۋاشىلىقتاردىڭ ەگىستىككە قاجەتتى تەحنيكاسى جەتكىلىكتى. كوكتەمگى ەگىس جۇمىستارىنا 19,1 مىڭ توننا ارزانداتىلعان جانار-جاعارماي بولىنگەن. سونىمەن قاتار, «اگرارلىق نەسيە كورپوراتسياسى» اق ارقىلى «اگرو بيزنەس» جانە «كەڭ دالا» باعدارلامالارى اياسىندا كوكتەمگى ەگىس جانە ەگىن جيناۋ جۇمىستارىن جۇرگىزۋگە 3,3 ملرد. تەڭگەگە 133 نەسيە بەرىلگەن.
مىسالى, وڭىردەگى ەرتىس اۋدانىنداعى - «ورازباەۆ» شارۋاشىلىعىندا تاۋلىگىنە 45 تونناعا دەيىن استىق وڭدەيتىن ديىرمەن كەشەنى جۇمىس ىستەيدى. اۋداندا كوكتەمگى ەگىس جۇمىستارى جۇرگىزىلۋدە. قازىر 173 مىڭ گەكتار القاپقا ەگىن ەگىلگەن.
سۋارمالى القاپقا 1 مىڭ گەكتار بيداي, قاراقۇمىق, سويا جانە جۇگەرى تۇرلەرى وسىرىلەدى. ال, اۋداندار ءۇشىن ەرتىس وزەنىنىڭ سۋىن پايدالانۋ جانە سۋارمالى القاپتى دامىتۋ ماڭىزدى باعىت. سوندىقتان, جەر پايدالانۋشىلار ينفراقۇرىلىمدار قۇرىلىسىمەن قاتار وزدەرىنىڭ ينۆەستيتسيالىق باعدارلامالارىن جاساۋعا كىرىسپەكشى.