قازاقستاندا قاشىقتان وقىتۋدى رەسمي زاڭداستىرۋ تۋرالى ۇسىنىستى ۇلتتىق قوعامدىق سەنىم كەڭەسىنىڭ مۇشەسى راۋان كەنجەحان ۇلى ايتتى.
ء«بىلىم بەرۋدىڭ ساپاسىن ارتتىرىپ, ءارى ونى بار ايماقتا قولجەتىمدى ەتۋ ءۇشىن قاشىقتان جانە ونلاين وقىتۋ تەحنولوگيالارىن جۇيەلى تۇردە جانە كەڭىنەن ەنگىزۋ سۇرانىپ تۇر. سوڭعى 10 جىلدا الەم بويىنشا قارقىندى دامىعان بۇل تەحنولوگيالار ءوز تيىمدىلىگىن دالەلدەدى. اسىرەسە, جاھاندىق كارانتين سالدارىنان جاپپاي قاشىقتان وقىتۋعا كوشۋ بۇل ادىستەردىڭ زور مۇمكىندىكتەرىن كورسەتتى. ارينە, مەكتەپ جانە كوللەدجدەردى, جوو-نى تولىق ونلاينعا وتكىزۋ مىندەتى تۇرعان جوق. بۇل مۇمكىن دە ەمەس», - دەپ اتاپ ءوتتى ول.
ونىڭ ايتۋىنشا, ءار وقۋشىنىڭ جەكە قابىلەتى مەن مۇمكىندىكتەرىن ەسكەرە الاتىن, سول ارقىلى وقىتۋدىڭ تيىمدىلىگىن ارتتىراتىن تەحنولوگيالاردى ءبىلىم بەرۋگە قازىردىڭ وزىندە ەنگىزۋگە بولادى.
«ول ءۇشىن الدىمەن قاشىقتان وقىتۋدى قازاقستاندا رەسمي تۇردە تانىلعان ءبىلىم بەرۋ فورماسى قاتارىنا قوسىپ, ونى ءبىلىم تۋرالى زاڭعا كىرگىزۋ قاجەت دەپ ويلايمىز. قاشىقتان وقىتۋ تەحنولوگياسىن قولداناتىن وقۋ ورىندارىنا قويىلاتىن ادىستەمەلىك جانە تەحنولوگيالىق تالاپتاردى ايقىنداپ, ولارعا بولەك ليتسەنزيا بەرگەن ابزال. بۇل ماسەلە شۇعىل شەشىلمەسە, ءوز ەلىندە وتىرىپ, شەتەلدىك وقۋ پلاتفورمالارىن تاڭدايتىن قازاقستاندىق قاشىقتان وقۋشىلار كوبەيەدى. قازىردىڭ وزىندە ءبىزدىڭ ەسەبىمىزشە 30 مىڭنان استام قازاقستاندىق وقۋشىلار يەن ستۋدەنتتەر قازاقستاندىق باعدارلاما, ستاندارت پەن تالاپتى مۇلدەم ەسكەرمەيتىن شەتەلدىك ونلاين مەكتەپ پەن ۋنيۆەرسيتەتتەردە وقىپ جاتىر. بۇل ماسەلەگە قاتىستى ۇسىنىستار مەن زاڭعا ەنۋى قاجەت تولىقتىرۋلار مەن وزگەرىستەر جوباسىن مينيسترلىككە تاپسىردىق», - دەدى ر. كەنجەحان ۇلى.