قازاقستاننىڭ سىرتقى ىستەر ءمينيسترى مۇحتار تىلەۋبەردى بەينەكونفەرەنتسيا فورماتىندا وتكەن ۇجىمدىق قاۋىپسىزدىك تۋرالى شارت ۇيىمى (ۇقشۇ) سىرتقى ىستەر مينيسترلەرى كەڭەسىنىڭ وتىرىسىنا قاتىستى.
وتىرىس بارىسىندا ۇقشۇ-عا مۇشە مەملەكەتتەردىڭ سىرتقى ساياسي ۆەدومستۆولارىنىڭ باسشىلارى حالىقارالىق جانە وڭىرلىك جاعداي بويىنشا ۇستانىمدارمەن الماسىپ, ۇيىمنىڭ اعىمداعى جاعدايى مەن دامۋ پەرسپەكتيۆالارىن تالقىلادى.
كوروناۆيرۋستىق ىندەتتىڭ تارالۋىمەن بايلانىستى جاعدايلارعا جانە وسى قاۋىپ-قاتەردى تەجەۋ جانە وعان قارسى تۇرۋ بويىنشا قابىلدانىپ جاتقان شارالارعا ەرەكشە نازار اۋدارىلدى.
قازاقستاننىڭ سىرتقى ساياسي ۆەدومستۆوسىنىڭ باسشىسى ارىپتەستەرىن قازاقستاننىڭ ۇقشۇ قىزمەتىنىڭ وزەكتى باعىتتارى بويىنشا ۇستانىمى تۋرالى حاباردار ەتتى, ۇيىمنىڭ ودان ءارى ۇدەمەلى جانە ۇيلەسىمدى دامۋى ماقساتىندا بىرقاتار ۇسىنىستار ايتتى.
ۇقشۇ ەلدەرىنىڭ سىرتقى ىستەر مينيسترلەرى بۇۇ جارعىسىنىڭ ماقساتتارى مەن قاعيداتتارىنا ادالدىعىن راستاۋ تۋرالى مالىمدەمە قابىلدادى. قۇجات ۇقشۇ ەلدەرىنىڭ بۇۇ جارعىسىنا نەگىزدەلگەن الەمدىك ءتارتىپتى قولداۋ مەن نىعايتۋعا بەيىلدىلىگىن اتاپ وتەدى.
بۇدان باسقا, ۇقشۇ مۇشە مەملەكەتتەرى سىرتقى ىستەر مينيسترلەرىنىڭ ۇلى وتان سوعىسىنداعى جەڭىستىڭ 75-جىلدىعى, بۇۇ باس حاتشىسىنىڭ COVID-19 پاندەمياسىنا بايلانىستى جاھاندىق سوعىس ارەكەتىن توقتاتۋعا شاقىرۋىن قولداۋى, سونداي-اق كوروناۆيرۋس ىندەتىمەن كۇرەستە نيەتتەستىك پەن ءوزارا كومەك تۋرالى مالىمدەمەلەرى قابىلداندى.
ءداستۇرلى تۇردە مينيسترلەردىڭ باستى نازارى وزەكتى سىن-قاتەرلەرگە, ءبىرىنشى كەزەكتە, حالىقارالىق تەرروريزمگە قارسى ءىس-قيمىلدىڭ پراكتيكالىق شارالارىنا اۋدارىلدى.
سىرتقى ساياسي ۆەدومستۆولاردىڭ باسشىلارى ۇيىمدى دامىتۋدىڭ بارلىق باعىتتارى بويىنشا ساراپشىلاردىڭ جىل سايىنعى كونسۋلتاتسيالار جوسپارىن, سونداي-اق ۇقشۇ ۇجىمدىق قاۋىپسىزدىك كەڭەسىنىڭ «ۇقشۇ حاتشىلىعىندا كۆوتالىق لاۋازىمداردى ءبولۋ تۋرالى» شەشىم جوباسىن ماقۇلدادى.
وتىرىس قورىتىندىسى بويىنشا قابىلدانعان قۇجاتتار ۇيىمدى ودان ءارى نىعايتۋعا باعىتتالعان, سونداي-اق ۇقشۇ-نىڭ اشىقتىعىن, ونىڭ باسقا ەلدەرمەن جانە حالىقارالىق قۇرىلىمدارمەن ىنتىماقتاستىقتى كەڭەيتۋگە وڭ كوزقاراسىن تاعى دا كورسەتتى.
ۇقشۇ سىرتقى ىستەر مينيسترلەرى كەڭەسىنىڭ كەلەسى وتىرىسى 2020 جىلدىڭ 4-توقسانىندا رەسەي فەدەراتسياسىندا ۇقشۇ ۇجىمدىق قاۋىپسىزدىك كەڭەسىنىڭ سەسسياسى قارساڭىندا وتەدى.
ۇيىمعا قازاقستاننان باسقا ارمەنيا, بەلارۋس, قىرعىزستان, رەسەي جانە تاجىكستان كىرەدى.