Eurasian Resources Group (ERG) قۇرامىنداعى بىرقاتار كاسىپورىنداردا ەڭبەك ەتىپ جۇرگەن قىزمەتكەرلەر باستاپقى جارناسىز باسپانا الا الادى. ەۋرازيالىق توپ پەن «تۇرعىن ءۇي قۇرىلىس جيناق بانكى» اق اراسىندا وسىنداي كەلىسىمشارتقا قول قويىلدى.
اتالعان باعدارلاما اياسىندا ERG-ءدىڭ تۇرعىن ءۇي باعدارلاماسى بويىنشا قىزمەتكەرلەر پاۆلودار, اقسۋ, ەكىباستۇز بەن قاراعاندى قالالارىندا سالىنعان ۇيلەردەن باسپانالى بولۋعا مۇمكىندىك تۋىپ وتىر.
– ERG ءۇشىن الەۋمەتتىك قامسىزداندىرۋ, سونىڭ ىشىندە قىزمەتكەرلەرىمىزگە, ءبىزدىڭ تۋعان قالالارىمىزدىڭ تۇرعىندارىنا دەگەن قامقورلىق نازاردان تىس قالمايدى, ̶ دەيدى ەۋرازيالىق توپتىڭ باسقارما توراعاسى سەرىك شاحاجانوۆ.
باعدارلاما شارتتارىنا ساي, ەگەر تۇرعىن ءۇي ءالى سالىنىپ بىتپەگەن بولسا, قىزمەتكەر «تۇقجب» اق-ىندا دەپوزيت اشىپ, قازىردەن باستاپ ءوزى قالايتىن باسپانانىڭ 30%-ىن جينايدى. ال ءۇي پايدالانۋعا بەرىلگەن بولسا, بىردەن باسپانالى بولىپ, ءۇش جىل بويى ءوزىنىڭ دەپوزيتىندە پاتەرىنىڭ 30% كولەمىندە باستاپقى جارنا جيناقتاۋى كەرەك. دەپوزيتىنە 30% جينالعان ساتتەن باستاپ, ول پاتەردىڭ مەنشىك يەسى اتانباق. ونىڭ ۇستىنە, بۇل سوماعا سىياقى مەن مەملەكەتتىك سىياقى قاتار قوسىلادى. قىزمەتكەر دەپوزيتتە باسپانا الۋعا قاجەتتى قاراجاتتىڭ 30%-ىن جيناعان سوڭ, قالعان سومانى نەسيەگە الا الادى. جيناق پاتەر قۇنىنىڭ 50%-ىنا جەتكەندە, بەرەشەكتىڭ ۇستەمەسى تومەندەيدى. نەسيە 15 جىلعا دەيىنگى مەرزىمگە بەرىلەدى.
– تۇقجب بۇگىندە قىزمەتكەرلەرى قازاقستانداعى 60 000 وتباسىن اسىراپ وتىرعان الىپ كومپانيالار توبىمەن تىعىز ارىپتەستىك ورناتقانىنا قۋانىشتى. وسى ورايدا, ءبىز ERG قىزمەتكەرلەرى تەك بۇل باعدارلامامەن شەكتەلمەي, باستاپقى جانە بۇرىن قولدانىستا بولعان باسپانانى ساتىپ الۋدا «نۇرلى جەر», ء«وز ءۇيىم», «5-10-20» سىندى تۇرعىن ءۇي قۇرىلىس جيناق بانكىنىڭ باسقا دا باعدارلامالارىن بەلسەندى پايدالانادى دەگەن ۇمىتتەمىز. ERG قىزمەتكەرلەرىنە بارىنشا ساپالى قىزمەت كورسەتىپ, العاشقى كۇننەن ءبىزدىڭ ۆيدەوبانكىمىزدى, ينتەرنەت-بانك پەن تۇقجب24 قوسىمشالارىن پايدالانا باستاۋدى ۇسىنامىز, – دەدى تۇقجب باسقارما ءتورايىمى ءلاززات يبراگيموۆا.
ERG-ءدىڭ تۇرعىن ءۇي باعدارلاماسىنىڭ ارقاسىندا 2006 جىلدان بەرى اقتوبە وبلىسى (اقتوبە مەن حرومتاۋ ق.), قاراعاندى وبلىسى (قاراعاندى ق.), قوستاناي وبلىسى (رۋدنىي ق.) جانە پاۆلودار وبلىسىنداعى (پاۆلودار, اقسۋ مەن ەكىباستۇز ق.) 3 مىڭعا تارتا قىزمەتكەر باسپانامەن قامتاماسىز ەتىلدى.
ايتا كەتەرلىگى, Eurasian Resources Group-تىڭ قۇرامىنا «قازاقستان ءاليۋمينيى» اق, «قازاقستان ەلەكتروليز زاۋىتى» اق, «شۇباركول كومىر» اق, «قازحروم»تۇك» اق, اقسۋ فەرروقورىتپا زاۋىتى مەن «ەەك» اق «شىعىس» كىرەدى.