اتقارۋشى بيلىكتىڭ نازارىنان تىس قالعان شەتىن ماسەلەلەردى شەشۋدە جانە كومەككە ءزارۋ, شاراسىز قالعان تاعدىرى قيىن جاندار مەن وتباسىلاردىڭ باسىنداعى اۋىرتپالىقتى جەڭىلدەتۋدە, ولارعا قۋانىش سىيلاۋدا قايىرىمدىلىق قاعيداتتارى نەگىزىندە امال جاساپ جۇرگەن وتانداستارىمىز, قۇدايعا شۇكىر, كوبەيىپ كەلەدى.
وزگەنىڭ باقىتى ءۇشىن الاڭداۋ ىزگىلىكتى جاننىڭ ءبىر سيپاتىن بىلدىرسە كەرەك. ال وسىنداي ادامداردىڭ ورتامىزدا كوپتەپ كەزدەسۋى ءبىزدىڭ يماندىلىققا نەگىزدەلگەن قايىرىمدى قوعام قۇرۋعا بەت بۇرعانىمىزدى كورسەتەدى. جوق-جىتىككە قاراسۋ, جىلاعاندى جۇباتۋ, سۇرىنگەندى سۇيەۋ قارعا تامىرلى قازاقتىڭ قانىندا بۇرىننان بار جاقسى قاسيەتتەردىڭ ءبىرى.
جەكە باسىنىڭ قامىنان گورى وزگەنىڭ جاي-كۇيىن, ماسەلەسىن جوعارى قويا الاتىن جاستارىمىز جەلكىلدەپ ءوسىپ كەلە جاتقانى قۋانتادى. قازىرگى تاڭدا ەلىمىزدىڭ اقپاراتتىق كەڭىستىگىندە قايىرىمدىلىقتىڭ نەشە اتاسىن, نەشە ءتۇرىن كورسەتىپ جۇرگەندەر تۋرالى جاعىمدى حابارلار تۇنىپ تۇر. دەرتىنە شيپا ىزدەگەنگە, بالاسىنىڭ ەم-دومىنا كومەك سۇراعانعا قوعامنىڭ لايىقتى جاۋاپ بەرۋىنەن باستاپ, ءۇيسىز-كۇيسىز جۇرگەن ءتۇرلى ساناتتاعى وتباسىلاردىڭ باسپانا ماسەلەسىن شەشىپ بەرۋگە دەيىنگى كوپتەگەن قايىرىمدىلىق شارالارى حالقىمىزدىڭ كەلەشەككە دەگەن سەنىمىن نىعايتىپ, ىزگىلىكتى قوعام قۇرۋعا دەگەن ۇمتىلىسىن وياتۋدا ماڭىزدى قۇرال بولىپ وتىر.
سوڭعى كەزدەرى, باسقاسىن ايتپاعاندا, ءوز ەرىكتەرىمەن قارجى جيناپ, باسپاناعا مۇقتاج جاندارعا جاڭا ءۇي سالىپ بەرۋ, ساتىپ الىپ بەرۋ ءۇردىسى كەڭىنەن ەتەك الىپ كەلەدى. مۇنداي يگىلىكتى ىستەردى ەلىمىزدىڭ بارلىق وڭىرلەرىنەن كەزدەستىرۋگە بولادى. ماسەلەن, «ەگەمەندە» جاريالانعان «قازاقى بولمىس قاعيداتى» اتتى ماقالادا (13 مامىر, 2020 ج.) اتىراۋ وبلىسىنا قاراستى قۇلسارى قالاسىندا دياس يباتاەۆ دەگەن جىگىتتىڭ ءوز دوستارىمەن بىرلەسىپ, جۇرتشىلىقتان قارجى جيناپ, باقىتگۇل ەسىمدى كوپبالالى اناعا جاڭا, كولەمى 120 شارشى مەتردى قۇرايتىن باسپانا سالىپ بەرۋدى ءجون كورگەنى تۋرالى جازىلدى. جەسىر انا جاقىندا جاڭا ۇيگە قونىستانباق. سول سياقتى گازەتىمىزدە جاريالانعان «كاسىپكەرلەر كوپبالالى اناعا باسپانا سىيلادى» (25 مامىر, 2020 ج.) دەگەن ماقالادا كورسەتىلگەندەي, قمدب تاراپىنان جۇزەگە اسىرىلىپ وتىرعان «ەل ۇلەسى – پاتەرگە» جوباسى اياسىندا تاراز قالاسىندا تۇراتىن كوپبالالى انا اينا جايتكەنوۆاعا 2 بولمەلى پاتەردىڭ كىلتى تابىس ەتىلدى. بۇل ساۋاپتى ءىس اۋليەاتالىق كاسىپكەر ازاماتتاردىڭ دەمەۋشىلىگىمەن جۇزەگە اسقان.
جالپى, ازاماتتىق تانىتىپ جۇرگەن قايىرىمدى جانداردىڭ وڭ ءىس-قيمىلدارىنا قاراپ وتىرىپ, مەملەكەت اتقارۋى ءتيىس كەيبىر ماسەلەلەردى ازاماتتىق قوعام, ونىڭ ىشىندە جاستار تازا جۇرەكپەن, شىنايى پەيىلمەن, ءوز ەرىكتەرىمەن اتقارىپ جاتىر. وسىندايدا قوعامعا جول كورسەتۋى ءتيىس اتقارۋشى بيلىك ءالى دامي قويماعان دەپ سانالاتىن قازاقستاندىق ازاماتتىق قوعامنان ۇلگى الۋى قاجەت دەگەن ويعا كەلەسىڭ. اتقارۋشى بيلىكتىڭ, ونىڭ ىشىندە جەرگىلىكتى مەملەكەتتىك ورگانداردىڭ جۇرەگى تازا, وزگەگە كومەكتەسۋدى ازاماتتىق بورىشى سانايتىن, وزدەرىن دالەلدەگەن جاندارمەن ارىپتەستىك ورناتۋعا, ياعني بيلىكتىڭ ەل ىشىندەگى ەلشىل, اينالاسىنا جاناشىر جاندارعا نازار اۋدارۋى قاجەت. سوندا عانا قوعامىمىزداعى ەرىكتى, سىبايلاس جەمقورلىقتان ادا كۇشتەر ىقپالىن ارتتىرادى. حالىققا كەرەگى دە وسى.
قالاي دەسەك تە, ءوزىن قايىرسىز قوعامنىڭ ءبىر مۇشەسى رەتىندە سەزىنىپ, ەڭسەسى ءتۇسىپ, ەندى قايتتىم دەپ جۇرگەن جەتىم مەن جەسىردىڭ, مۇقتاج جاننىڭ كوز جاسى اللانىڭ قۇدىرەتىمەن, جاناشىر اعايىننىڭ سەبىمەن ءاپ-ساتتە قۇرعاپ, ءجۇزى جايناپ شىعا كەلسە, بۇل از قۋانىش ەمەس. سونداي قۋانىشقا كەنەلگەندەر ءوز ورتاسىنىڭ قولداۋىن سەزىنىپ, ەلىنە, جەرىنە دەگەن سۇيىسپەنشىلىگى ويانادى. دەمەك, كىمگە بولسا دا كورسەتىلگەن كومەكتىڭ ارعى تۇكپىرىندە باعا جەتپەس رۋحاني قولداۋ جاتاتىنى ءسوزسىز. بۇل قولداۋ ءبىز ءسوز ەتىپ وتىرعان قايىرىمدىلىق امالدىڭ ناعىز وزەگى ەكەنى ءشۇباسىز. دەمەك, قايىرىمدىلىق جاساۋ – قوعامدى ساۋىقتىرۋشى امال.
ءابۋ ھۋرايرا (ر.ا.) جەتكىزگەن حاديستە: «پايعامبارىمىز (س.ع.س.): «كىمدە-كىم ءمۇمىن باۋىرىنىڭ وسى دۇنيەدەگى ءبىر ۋايىم-قايعىدان قۇتىلۋىنا سەبەپكەر بولسا, اللا تاعالا ونى قيامەت قايىمنىڭ قايعى-مۇڭدارىنىڭ بىرىنەن قۇتقارادى. كىمدە-كىم قارىزدانىپ قىسىلعان ادامعا تۇسىنىستىكپەن قاراپ, ءىسىن جەڭىلدەتسە, اللا تاعالا ونىڭ ءىسىن ەكى دۇنيەدە دە جەڭىلدەتەدى. كىمدە-كىم مۇسىلمان باۋىرىنىڭ ايىبىن جاسىرسا, اللا تاعالا ەكى دۇنيەدە دە ونىڭ ايىبىن جاسىرادى. سونداي-اق اللانىڭ ق ۇلى مۇسىلمان باۋىرىنا جاردەم ەتۋىن توقتاتپايىنشا, اللا تاعالا دا ق ۇلىنا جاردەم ەتۋىن توقتاتپايدى» (مۋسليم, زيكر 38) دەلىنگەن. بىزگە وسى ايتىلعانداردى قاپەردە ۇستايتىن قوعام كەرەك. ونى قۇرۋ ءوز قولىمىزدا.