بۇل تۋرالى نۇر-سۇلتان قالاسىنىڭ ءبىلىم باسقارماسىنىڭ باسشىسى شولپان قادىروۆا اكىمدىكتىڭ Facebook پاراقشاسىندا وتكەن ءباسپاسوز ءماسليحاتىندا مالىمدەدى.
«بيىل ەلوردانىڭ جالپى ءبىلىم بەرۋ مەكتەپتەرىن 6 515 تۇلەك اياقتاعالى وتىر. ونىڭ ىشىندە ۇلتتىق بىرىڭعاي تەستىلەۋگە 6 199 وقۋشى ءوتىنىش ءبىلدىردى, ياعني 95 پايىزى. ۇبت 20 ماۋسىم-5 شىلدە ارالىعىندا بارلىق سانيتارلىق تالاپتاردى ساقتاي وتىرىپ وتكىزىلەدى. تەستىلەۋ ۋاقىتى - 3 ساعات 50 مينۋت. تەست 2 بلوكتان تۇرادى, 3 نەگىزگى ءپان جانە 2 بەيىندىك ءپان. بيىل ۇبت سۇراقتارىندا 11-سىنىپتىڭ سوڭعى توقساندارىنىڭ باعدارلاماسى قامتىلمايدى»,- دەدى نۇر-سۇلتان قالاسىنىڭ ءبىلىم باسقارماسىنىڭ باسشىسى شولپان قادىروۆا.
وسى ورايدا باسقارما باسشىسى تۇلەكتەر مەن اتا-انالاردى مازالاعان سۇراققا جاۋاپ بەرە كەلە, ۇبت سۇراقتارى 5-11-سىنىپقا دەيىنگى جانە 11-سىنىپتىڭ العاشقى ەكى توقسانىنداعى باعدارلامادان الىنعانىن ايتتى.