بۇگىن «Qatar Airways» اۋەكومپانياسىنىڭ ارنايى رەيسىمەن دوحادان نۇر-سۇلتانعا جالپى سالماعى 8,5 توننا قۇرايتىن گۋمانيتارلىق جۇك جەتكىزىلدى. ونىڭ ىشىندە جەكە قورعانۋ قۇرالدارى بار - جوعارى ساپالى N95 رەسپيراتورلى مەديتسينالىق ماسكا, ارنايى كيىم, قولعاپ, كوزىلدىرىك, حالات جانە وزگە دە مەديتسينالىق قۇرالدار. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
كومەك كاتار ءامىرى شەيح ءتاميم بەن حاماد ءال ءتانيدىڭ تاپسىرماسى بويىنشا ۇيىمداستىرىلدى. قازاقستاننىڭ سىرتقى ىستەر مينيسترلىگى كاتار تاراپىنا گۋمانيتارلىق كومەك ءۇشىن العىسىن بىلدىرەدى. كاتاردىڭ بۇل يگى ارەكەتى ەكى مەملەكەت اراسىنداعى ءداستۇرلى دوستىق قارىم-قاتىناستىڭ, سونداي-اق پاندەمياعا قارسى ءىس-قيمىل جونىندەگى حالىقارالىق كۇش-جىگەردەگى ىنتىماقتاستىقتىڭ كورىنىسى. گۋمانيتارلىق جۇك مەديتسينالىق مەكەمەلەر اراسىندا ودان ءارى تاراتۋ ءۇشىن «سق-فارماتسيا» جشس-نا تابىستالادى.