قازاقستان الەم ەلدەرى اراسىندا العاشقىلاردىڭ ءبىرى بولىپ پاندەمياعا قارسى توتەنشە جاعداي رەجىمىن ەنگىزدى.
الەمنىڭ باسقا ەلدەرىمەن سالىستىرعاندا قازاقستانداعى ۆيرۋس جۇقتىرعاندار مەن ىندەتتىڭ قۇربانى بولعاندار سانى ايتارلىقتاي تومەن بولۋى دا سونىڭ ايقىن دالەلى, ۋاقتىلى قابىلدانعان شارالار مەن مەديتسينا سالاسى وكىلدەرىنىڭ ەرەن ەڭبەگى.
ەلىمىزدەگى پاندەمياعا قاتىستى جاعدايدىڭ تۇراقتانۋىن ەسكەرە وتىرىپ, پرەزيدەنت ق.توقاەۆ الداعى ۋاقىتتا ۇلتتىق ەكونوميكانى جانداندىرۋ قاجەتتىگىن ەرەكشە اتاپ ءوتتى. پرەزيدەنت تاپسىرماسى بويىنشا ۇكىمەت پەن ۇلتتىق بانك دايىنداعان ەكونوميكالىق دامۋدى قالپىنا كەلتىرۋ جونىندەگى كەشەندى جوسپاردى ازىرلەپ جاتىر. جوسپاردا ۇلتتىق ەكونوميكادا ورىن العان تۇبەگەيلى وزگەرىستەر جاعدايىندا ونى باسقارۋدىڭ ينستيتۋتسيونالدىق جانە قۇرىلىمدىق رەفورمالارى ەسكەرىلەتىن بولادى.
كوروناۆيرۋس ىندەتىنەن تۋىنداعان كۇردەلى كەزەڭ ەلىمىزدىڭ ەكونوميكاسىنىڭ وسال تۇستارىن اڭعارتتى. الەمدىك ەكونوميكانىڭ داعدارىسىمەن قاتار ەلىمىزدە دە كوپتەگەن كاسىپورىن مەن بيزنەستىڭ جۇمىسى توقتاپ, جۇمىسسىزدىق كوبەيدى. جاڭا جاعدايدا جۇمىسپەن قامتاماسىز ەتۋ جانە ەكونوميكالىق تيىمدىلىكتى ارتتىرۋ ءۇشىن ەكونوميكانى ءارتاراپتاندىرۋ ۇدەرىسىن جالعاستىرىپ, شاعىن جانە ورتا بيزنەسكە بارىنشا جاعداي جاساۋ قاجەت. سونىمەن قاتار ادام كاپيتالىن دامىتىپ, ۇلتىمىزدى باسەكەگە قابىلەتتىلىك دەڭگەيىنە كوتەرۋ قاجەت. وسىعان وراي الدىمىزدا ءبىلىم, عىلىم, دەنساۋلىق ساقتاۋ سالالارىن دا تۇبەگەيلى جاڭعىرتۋ, ساياسي رەفورمالار جۇرگىزۋ مىندەتى تۇر. «بۇل – ءبىزدىڭ ستراتەگيالىق تاڭداۋىمىز», دەدى پرەزيدەنت.
الەمدى جايلاعان ىندەتتەن كەيىن ەلىمىز دامۋدىڭ مۇلدەم باسقا دەڭگەيىنە ءوتىپ, الەممەن قاتار جاڭا جاعدايدا ءومىر سۇرەتىنىمىز بارىمىزگە ايقىن بولىپ وتىر. ەل الدىندا ەكونوميكاعا جانە مەملەكەتتىك باسقارۋ جۇيەسىنە اۋقىمدى ءارى ماڭىزدى وزگەرىستەر ەنگىزۋ مىندەتى تۇر. ءبىز الەمدىك دەڭگەيدەگى «جاسىل ەنەرگەتيكا» جانە تسيفرلى تەحنولوگيالارعا ءوتۋ ۇدەرىسىنەن شەت قالماي, ولاردى ءوز ەكونوميكامىز بەن قوعامىمىزدىڭ قاجەتىنە جاراتۋىمىز كەرەك. بۇل مىندەتتى اتقارۋعا ءاربىر قازاقستاندىق ءوز ۇلەسىن قوسا الادى. ول ءۇشىن كۇندەلىكتى ومىردە قاجەتتى سانيتارلىق نورمالاردى ۇستانىپ, وتاندىق تاۋارلار مەن قىزمەت تۇرلەرىن تۇتىنۋعا ۇمتىلىپ, ىشكى تۋريزمگە ارتىقشىلىق بەرىپ, وسال توپتارعا قولۇشىن سوزۋىمىز قاجەت.
داعدارىستان ءتيىستى ساباق الىپ, قاتەلىكتەردى ەسكەرە وتىرىپ, دامۋ ءۇشىن جاڭا سەرپىلىس الا بىلگەن ەلدەر عانا قاتاردىڭ الدى بولۋعا قابىلەتتى. ول ءۇشىن تۇتاس مەملەكەت, بىرەگەي ەل بولىپ, ءاربىرىمىز ايانباي ءوز ۇلەسىمىزدى قوسۋىمىز كەرەك.
الماس ارزىقۇلوۆ,
پرەزيدەنت جانىنداعى قسزي-ءدىڭ جەتەكشى عىلىمي قىزمەتكەرى