جىل سايىنعى وزەكتى ماسەلەنىڭ ءبىرى – جازعى شومىلۋ ماۋسىمى كەزىندە سۋ ايدىندارىندا قايعىلى جاعدايلاردىڭ ورىن الۋى. مۇنىڭ سەبەبى – سۋدا قاۋىپسىزدىك ەرەجەلەرىن ساقتاماي, بەلگىلەنبەگەن جەرلەردە شومىلۋ. وكىنىشكە قاراي, بيىلعى جىلدىڭ وزىندە وڭىردە 8 ءولىم وقيعاسى تىركەلگەن, ولاردىڭ ىشىندە 2 مەن 8 جاس ارالىعىنداعى 6 بالا بار. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە تۇركىستان وبلىسى تجد-ڭ اعا وفيتسەرى وراز ايتقۇلوۆ مالىمدەدى.
ونىڭ ايتۋىنشا, بالالاردىڭ سۋ ايدىندارىندا قايتىس بولۋىنىڭ باستى سەبەبى – ولاردى ەرەسەكتەردىڭ قاراۋسىز قالدىرۋى. الايدا وتكەن جىلدىڭ ەسەپتى كەزەڭىمەن سالىستىرعاندا كورسەتكىش 30% تومەندەگەن.
«وتكەن جىلى 46 وقيعا تىركەلىپ, ناتيجەسىندە 48 ادام قايتىس بولدى, ولاردىڭ 18-ءى بالالار. تالداۋ كورسەتكەندەي, بارلىق جازاتايىم وقيعالار قۇتقارۋشىلارمەن كۇزەتىلمەيتىن جەرلەردە ورىن الىپ وتىر. وبلىسىمىزدا رەسمي تۇردە تىركەلگەن 110 دەمالىس ورنى بار. ول جەرلەردە قۇتقارۋشىلار قاراستىرىلعان. سونىمەن قاتار, سۋ ايدىندارىندا وبلىس تۇرعىندارىنىڭ قاۋىپسىزدىگىن قامتاماسىز ەتۋ ءۇشىن سۋدا جۇزۋگە تىيىم سالىنعان 268 بەلگى, 49 قاۋىپسىزدىك ەرەجەلەرى كورسەتىلگەن جارنامالىق بيلبوردتار ورناتىلدى. 12 دەمالىس ايماعىنىڭ يەلەرى مەموراندۋمعا قول قويدى», – دەدى وراز شەرالى ۇلى.
سونداي-اق ول بريفينگتە وڭىردە جىل سايىن بيىك ۇيلەردىڭ تەرەزەلەرىنەن قۇلاپ تۇسكەن بالالار سانى وسكەندىگىن ايتتى.
«جىل سايىن كوپقاباتتى ۇيلەردىڭ تەرەزەسىنەن قۇلاعان بالالاردىڭ قازا بولۋ جاعدايلارى تىركەلەدى. ادەتتە, كوبىنە ەرەسەكتەر تاراپىنان بالالارعا دەگەن باقىلاۋدىڭ جەتكىلىكسىزدىگىنەن بولادى. سونداي-اق,تەرەزەنى جابۋدى ۇمىتۋ, تەرەزەلەردە بلوكيراتورلاردىڭ نە تۇتقالارىنىڭ بولماۋى, بالالارعا ءوز بەتىنشە تەرەزەلەرگە شىعۋعا مۇمكىندىك بەرەتىن جيھازدىڭ دۇرىس ورنالاسپاۋى, جابىق تەرەزەنىڭ يلليۋزياسىن جاسايتىن ماسا تورلارىنىڭ بولۋى سەبەپ. ماسەلەن, تۇركىستان وبلىسىندا وتكەن جىلى 3 وقيعا تىركەلگەن.ول كەزدە 8 جانە 4 جاسار بالالاردىڭ تەرەزەدەن قۇلاۋى سالدارىنان جاراقات الۋى ورىن العان. ال 1 جاسار بالا وقيعا ورنىندا مەرت بولدى. تەرەزەدەن قۇلاۋدى بولدىرماۋ ءۇشىن اتا-انالار تاراپىنان وزدەرىنىڭ جاس بالالارىنا باقىلاۋدى كۇشەيتۋ قاجەت», – دەدى ول.