كوروناۆيرۋس سالدارىنان توقىراعان قىتاي ەكونوميكاسى قايتا قالپىنا كەلىپ, اقش جولدارىندا كولىكتەر كوبەيگەن سوڭ جانارماي تۇتىنۋ كولەمى ارتىپ كەلەدى. وعان قوسا مۇناي باعاسىنىڭ ءوسۋى دە بىرقاتار ءۇمىت سىيلاپ وتىر. پاندەميادان قاتتى زارداپ شەككەن ەكونوميكا بىرتە-بىرتە اياققا تۇرا باستادى.
دەۆيد حوداري,
Wall Street Journal
اقش مۇنايى فيۋچەرلەرىنىڭ ماۋسىمداعى مۇناي باعاسى 20 پايىزعا ءوسىپ, 24,56 دوللارعا جەتپەك. قازىرگى كەزەڭدەگى كەلىسىمشارت باعاسى ەكى ەسە ۇلعايدى.
بۇعان دەيىن سولتۇستىك امەريكا مۇناي قورىن ساقتايتىن قامبالاردىڭ تولۋىنان تۋعان داعدارىس وسىلايشا جويىلا باستادى. بيىل 20 ساۋىردە تاريحتا العاش رەت مۇناي باعاسى نولدەن ءتۇسىپ كەتتى. بۇل مۇناي وندىرۋشىلەردىڭ ساتىپ الۋشىلارعا اقى تولەگەنىن بىلدىرەدى.
حالىقارالىق ەنەرگەتيكا نارىعى باعالاناتىن Brent ماركالى مۇنايى 14 پايىزعا ۇلعايىپ, باررەلىنە 30,97 دوللارعا جەتتى.
اقش پەن ەۋروپانىڭ بىرقاتار بولىگىندە شەكتەۋلەر الىنىپ, قىتاي قالىپتى ومىرگە ورالعاندىقتان, بەنزين مەن ديزەلدى وتىن سەكىلدى تاۋارلارعا سۇرانىس ارتىپ كەلەدى. وسى ورايدا مۇناي ءوندىرۋ كولەمى كەمىدى.
بيىلعى 1 مامىردا وپەك ەلدەرى مەن «ۇلكەن جيىرمالىققا» كىرەتىن مەملەكەتتەر ءوندىرىس كولەمىن ازايتۋ جونىندەگى كەلىسىم كۇشىنە ەندى. باعانىڭ قۇلدىراۋى اقش, نورۆەگيا جانە باسقا دا ەلدەردىڭ ءوندىرىستى ازايتۋعا يتەرمەلەدى.
وپەك جانە ونىڭ سەرىكتەستەرى كۇندەلىكتى شىعارىلاتىن مۇناي كولەمىن 9,7 ميلليون باررەلگە, ياعني 13 پايىزعا ازايتتى. Morgan Stanley ينۆەستيتسيالىق بانكتىڭ ستراتەگيالىق ساراپشىسى مارتەين رەتستىڭ سوزىنە سۇيەنسەك, باسقا مەملەكەتتەر ءوندىرىستى 3,4 ميلليون باررەلگە تومەندەتتى.
مۇناي نارىعى داعدارىستان وتكەنىن بىلدىرەتىن باسقا دا بەلگىلەر بار. امەريكانىڭ شيكى مۇنايى مەن مۇناي باررەلىنىڭ قۇنى اراسىنداعى باعا وزگەردى.
ساراپشىلاردىڭ پايىمداۋىنشا, ينۆەستورلار ءالى دە ويلانا ارەكەت ەتپەك. رەتستىڭ سوزىنە سەنسەك, ءۇندىستان, جاپونيا جانە ساۋد ارابياسى ءالى دە كولىك قوزعالىسىن شەكتەپ وتىر. بۇل دا مۇناي باعاسىنا اسەر ەتەدى.
بىراق كوپتەگەن مۇناي قورلارى مۇناي فيۋچەرلەرىمەن ساۋدالاسۋدى ۋاقىتشا توقتاتتى. بۇل شيكى مۇناي باعاسىن ودان ءارى قۇبىلمالى ەتە تۇسەدى. ونىڭ ۇستىنە 20 مامىردا بۇعان دەيىنگى ساتىلعان فيۋچەرلەرىنىڭ مەرزىمى اياقتالادى. وتكەن اپتادا امەريكالىق مۇنايدىڭ فيۋچەرى 26,49 دوللارعا جەتتى. سونداي-اق مۇنايدى ساقتاۋ ماسەلەسى دە تولىققاندى شەشىلگەن جوق.
«WTI ماركالى مۇنايدى ساقتاۋ ماسەلەسى ءالى بار. الداعى بىرنەشە اپتا كولەمىندە بۇل تۇيتكىل شيەلەنىسە تۇسپەك», دەيدى كەرولاين بەين. ول شيكىزات وندىرۋشىلەرگە كونسالتينگتىك قىزمەت كورسەتەتىن Capital Economics كومپانياسىنىڭ ەكونوميسى.
دايىنداعان
اباي اسانكەلدى ۇلى,
«Egemen Qazaqstan»