وبلىس اكىمى گۇلشارا ابدىقالىقوۆانىڭ اۋداندارعا جۇمىس ساپارى بايقوڭىر قالاسى مەن قارماقشى اۋدانىندا جالعاستى. بۇل تۋرالى وبلىس اكىمىنىڭ ءباسپاسوز قىزمەتى حابارلايدى.
ءوڭىر باسشىسى ءبىرىنشى كەزەكتە تورەتام كەنتىندەگى №22 35/10 كۆ قوسالقى ەلەكتر ستانتسياسىنىڭ جۇمىسىمەن تانىستى. بيىل «جۇمىسپەن قامتۋ جول كارتاسى» مەملەكەتتىك باعدارلاماسى اياسىندا اتالعان ستانتسيانى كەڭەيتۋ جانە جاڭعىرتۋ جۇمىستارى جۇرگىزىلۋدە. اتقارىلىپ جاتقان جۇمىستار تۋرالى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى مەدەت ۋساين باياندادى. باعدارلاما اياسىندا 340 ادام ۋاقىتشا جۇمىسپەن قامتىلادى.
مۇنان سوڭ گۇلشارا ابدىقالىقوۆا بايقوڭىر قالاسىنداعى №277 مەكتەپ-ليتسەيىنە جانە جاڭادان سالىنعان كوپ قاباتتى ۇيلەرگە باردى. اتالعان ءبىلىم ۇياسىندا ايماق باسشىسى وبلىستىق ءبىلىم باسقارماسىنا بايقوڭىر قالاسى مەن قىزىلوردا وبلىسىنىڭ وقۋشىلارى اراسىندا دەمالىس ۋاقىتىن ءتيىمدى وتكىزۋ, ءارى تاريحي ورىنداردى تانىستىرۋ ماقساتىندا ەكسكۋرسيا ۇيىمداستىرۋدى تاپسىردى.
ساپار اياسىندا ايماق باسشىسى كوپبەيىندى اۋرۋحانانىڭ جۇمىسىمەن تانىستى. باس دارىگەر جاندوس ءادىلحان بايقوڭىر كەشەنىندە COVID-19 ينفەكتسياسىن الدىن الۋ بويىنشا اتقارىلىپ جاتقان جۇمىستار تۋرالى باياندادى. وسى اۋرۋحاناعا قاراستى تورەتام اۋىلدىق اۋرۋحاناسىندا كارانتيندىك جانە پروۆيزورلىق بولىمشەلەر مەن ينتەنسيۆتى-رەانيماتسيالىق پالاتا ۇيىمداستىرىلدى. «باتىس ەۋروپا – باتىس قىتاي» حالىقارالىق تراسساسىنان بايقوڭىر قالاسى مەن اقاي اۋىلدىق وكرۋگىنە, تورەتام كەنتىنە كىرە بەرىس جولدارىندا 2 بلوك-بەكەت ۇيىمداستىرىلىپ, وندا جالپى سانى 16 مەيىربيكە جۇمىس اتقارۋدا.
سونىمەن قاتار, گۇلشارا ابدىقالىقوۆا بايقوڭىر قالاسىنداعى جەڭىس ساياباعىندا جەڭىستىڭ 75 جىلدىعىنا وراي «ماڭگىلىك الاۋ» ەسكەرتكىشىندە گۇلشوقتارىن قويىپ, تاعزىم ەتتى. جۇمىس ساپار بارىسىندا وبلىس اكىمى قارماقشى اۋدانىنداعى قۇرىلىس قۇمىن جانە بەتون بۇيىمدارىن ءوڭدىرۋ تسەحىنىڭ جۇمىسىمەن تانىسىپ, ءونىم ساپاسىنا ءمان بەرۋدى ەسكە سالدى.
مۇنان كەيىن ءوڭىر باسشىسى گۇلشارا ابدىقالىقوۆاعا قارماقشى اۋدانىنداعى گاز رەتتەگىش پۋنكتى مەن كۆارتالىشىلىك گاز تارتۋ جۇمىستارىنىڭ بارىسى تانىستىرىلدى. جوبا بويىنشا 2019 جىلى جوعارى جانە ورتا قىسىمدى 87,5 شاقىرىم گاز قۇبىرى سالىنىپ, 3 دانا گاز رەتتەگىش پۋنكتى ورناتىلدى. قازىر قالعان 72,5 شاقىرىم گاز قۇبىرىن جۇرگىزۋ باستالدى. جوبا اياقتالعاننان كەيىن, 20 مىڭ تۇرعىن ءۇي تابيعي گازدىڭ يگىلىگىن كورەتىن بولادى.
ودان كەيىن وبلىس اكىمى گۇلشارا ابدىقالىقوۆانىڭ توراعالىعىمەن قارماقشى اۋدانىنىڭ الەۋمەتتىك ەكونوميكالىق دامۋ ماسەلەلەرى بويىنشا ءماجىلىس ءوتتى.
وتكەن جىلدىڭ قورىتىندىسىمەن وبلىستا شاعىن جانە ورتا بيزنەسپەن 418 ملرد. تەڭگەنىڭ ءونىمى وندىرىلگەن بولسا, ونىڭ ىشىندە قارماقشى اۋدانىنىڭ ۇلەسى شامامەن 2,2 پايىز عانا. شاعىن جانە ورتا بيزنەستى دامىتۋ, كاسىپكەرلىككە قولداۋ كورسەتۋ جانە مەملەكەتتىك باعدارلامالاردى حالىق يگىلىگىنە پايدالانۋ وتە ماڭىزدى. «جۇمىسپەن قامتۋ جول كارتاسى» مەملەكەتتىك باعدارلاماسى اياسىندا بولىنگەن قارجىنى ءتيىمدى پايدالانىپ, حالىق ونىڭ يگىلىگىن سەزىنۋى قاجەت. بۇگىنگى كۇنى بۇل مەملەكەتتىك باعدارلاماسى اياسىندا اۋدانعا 3 ملرد تەنگەدەن استام قارجى ءبولىنىپ, اباتتاندىرۋ, كوشەلەردى جارىقتاندىرۋ, الەۋمەتتىك نىسانداردى جوندەۋ باعىتىندا بارلىعى 40 جوبا اياسىندا جۇمىس جاسالۋدا. سونداي-اق, 800-گە جۋىق تۇرعىن جۇمىسپەن قامتىلادى دەپ كۇتىلۋدە. باستالعان جۇمىستاردى ۋاقىتىلى جانە ساپالى اياقتاڭىزدار, - دەدى وبلىس اكىمى.