شىمكەنتتە سۋ دەڭگەيى تومەندەدى

جاڭبىردىڭ مول جاۋى جانە تۇركىستان وبلىسىنىڭ تولە بي اۋدانىنان ارىق كانالدارى ارقىلى كەلگەن سۋدىڭ سالدارىنان شىمكەنت بويىنشا بارلىعى 38 تۇرعىن ءۇي مەن شارۋاشىلىق قۇرىلىستارى بار 63 اۋلا ۋچاسكەسىن سۋ باستى, 11 شارۋاشىلىق قۇرىلىس (ساماننان جاسالعان) جانە ءبىر ۋاقىتشا تۇرعىن ءۇي قۇرىلىسى قيرادى. زارداپ شەككەندەر مەن قۇربان بولعاندار جوق. قۇتقارۋشىلار ەۆاكۋاتسيالاۋ پۋنكتتەرىنە بارلىعى 331 ادامدى ەۆاكۋاتسيالادى, پۋنكتتەرگە ورنالاسقاننان كەيىن بارلىق تۇرعىندار تۋىستارىنىڭ ۇيلەرىنە ورالدى.

ماسەلەن, ەڭبەكشى اۋدانىنىڭ ەلتاي اۋىلىندا 38 تۇرعىن ءۇي مەن 60 اۋلا اۋماعىن سۋ باستى. ونىڭ سالدارىنان 11 شارۋاشىلىق قۇرىلىس جانە ءبىر ۋاقىتشا تۇرعىن ءۇي قۇرىلىسى بۇزىلدى. قۇتقارۋشىلار, جەرگىلىكتى اتقارۋشى ورگاندارى مەن قر ۇلتتىق ۇلاننىڭ كۇشتەرى جوعارىدا اتالعان ۋچاسكەلەردە سۋدى بۇرۋ جانە سورىپ شىعارۋ جۇمىستارىن جۇرگىزدى. جالپى 7 مىڭنان استام تەكشە مەتر سۋ سورىلدى. ارىقتاردى تازالاۋ جانە تەرەڭدەتۋ بويىنشا جۇمىستار جۇرگىزىلۋدە. سۋ باسۋ ايماعىنان 300 ادام قاۋىپسىز جەرگە كوشىرىلدى.

ەڭبەكشى اۋدانىنىڭ وتكورم اۋىلىندا تىرەۋىش-اۋىسپالى قۇرىلىستا بادام وزەنىنىڭ سول جاق جاعاسىن سۋ باستى, سونىڭ سالدارىنان ەكى تۇرعىن ءۇيدىڭ قۇلاۋ قاۋپى تۋىندادى. قۇتقارۋشىلار كۇشتەرى 31 ادام ەۆاكۋاتسيالادى. بادام وزەنىنىڭ جاعالاۋىن بەكىتۋ ارقىلى سۋ باسۋ قاۋپى سەيىلدى.

ەڭبەكشى اۋدانىنىڭ ابدۋلاباد اۋىلىندا شارۋاشىلىق قۇرىلىستارى بار 3 اۋلانى سۋ باستى. قۇتقارۋشىلار مەن جەرگىلىكتى اتقارۋشى ورگانداردىڭ قىزمەتكەرلەرى وسى اۋلالاردان 600-دەن استام تەكشە مەتر سۋدى سورىپ شىعاردى.

اۆاريالىق-قۇتقارۋ جۇمىستارىنا بارلىعى جەكە قۇرامنان 168 ادام, 19 بىرلىك تەحنيكا مەن 21 موتوپومپا, جەرگىلىكتى اتقارۋشى ورگانداردان 74 قىزمەتكەر مەن 55 بىرلىك تەحنيكا, قر ۇلتتىق ۇلانىنان 100 اسكەري قىزمەتشى مەن 4 بىرلىك تەحنيكا جۇمىلدىرىلدى.