سوزاق ءوڭىرىنىڭ حالقى ەكىنشى دۇنيەجۇزىلىك سوعىس كەزىندە مايداندا دا, تىلدا دا نەبىر ەرلىكتىڭ ۇلگىسىن كورسەتە ءبىلدى. سولاردىڭ اراسىنان سوعىس ارداگەرى, كەزىندە ەلىنە ەڭبەگىن سىڭىرگەن ماحمۇت بەرىستەموۆتىڭ ەسىمىن جەڭىستىڭ 75 جىلدىعى قارساڭىندا ەرەكشە اتاپ وتكىم كەلەدى.
سوعىس ارداگەرى ماحمۇت بەرىستەموۆ 1922 جىلى 2 مامىردا سوزاق اۋدانى سىزعان اۋىلىندا دۇنيە ەسىگىن اشىپ, تۋعان اۋىلىندا 1999 جىلى 29 قازاندا ومىردەن وزدى.
ماحاڭ 1941 جىلى ارميا قاتارىنا الىنعان. 1941-1942 جىلدارى جامبىل قالاسىندا (قازىرگى تاراز) 105-ءشى ۇلتتىق اتتى اسكەر ديۆيزياسىندا جاتتىعۋدان وتەدى. كەيىننەن ارتيللەريا سالاسىنا اۋىستىرىلادى. 1942 جىلى 482-ءشى تانككە قارسى شابۋىلدايتىن زەڭبىرەك پولكىندا نەمىس فاشيستەرىنە قارسى كەسكىلەسكەن ۇرىستارعا قاتىسادى. ستالينگراد مايدانىندا جەڭىل جاراقاتتانىپ, 1943 جىلى ماۋسىم ايىندا قايتادان سوعىسقا كىرەدى. ۋكراينا, پولشا جەرىن فاشيستەردەن ازات ەتەدى.
م.بەرىستەموۆ جەڭىستى گەرمانيانىڭ درەزدەن قالاسىندا قارسى الادى. 1945 جىلى تامىز ايىندا شىعىستا جاپون اسكەرىنە قارسى شايقاستارعا قاتىسادى.
سوعىستاعى ەرلىكتەرى ءۇشىن «قىزىل جۇلدىز», ءى جانە ءىى دارەجەلى «داڭق», ءى جانە ءىى دارەجەلى «وتان سوعىسى» وردەندەرىمەن, «ەرلىگى ءۇشىن» جانە باسقا دا 14 ەسكەرتكىش مەدالمەن ماراپاتتالىپ, 1946 جىلى جەڭىسپەن ەلگە ورالادى.
بەيبىت ومىردە العاش ەڭبەك جولىن جاڭادان ۇيىمداستىرىلعان جۋانتوبە, تاستى, شۋ سوۆحوزدارىندا اۋىلدىق كەڭەس توراعاسىنىڭ حاتشىسى, توراعاسى قىزمەتتەرىن اتقاردى.
سوعىستان زارداپ شەككەن اۋىل شارۋاشىلىعىن قالپىنا كەلتىرۋ ىسىنە بەلسەنە ارالاسىپ, ىسكەرلىك قابىلەتىن كورسەتتى. 1957 جىلى قاپلانبەك زووتەحنيكۋمىندا وقىپ, كىشى اگرونوم ماماندىعىن الدى.
ەڭبەگى باعالانىپ, كوپتەگەن ماراپاتتارعا يە بولدى. زەينەت دەمالىسىنا «رەسپۋبليكالىق دارەجەدەگى دەربەس پەنسيونەر» دارەجەسىمەن شىقتى.
ماحاڭ سوزاقتاعى ساڭعىل بي كەسەنەسىن سالۋدا ۇنەمى قۇرىلىس باسىندا بولىپ, جۇمىس ىستەپ جاتقان جىگىتتەرگە اقىل-كەڭەسىن بەرىپ, ايرىقشا ۇيىمداستىرۋ قابىلەتىن كورسەتە ءبىلدى. كەسەنە بىتكەننەن كەيىن جازۋشى ءا.كەكىلباەۆ كەلىپ ريزاشىلىعىن ءبىلدىرىپ, ساڭعىل بي تۋرالى كوپتەگەن دەرەكتەر ايتتى.
ماحاڭ ادام جاتىرقامايتىن. كۇندىز-ءتۇنى ۇيىنەن قوناق ۇزىلمەيتىن. جەڭگەمىز ءاديشا مۇشەكەنوۆا اشىق جارقىن مىنەزدى جان ەدى. سوندىقتان دا قاي مەزگىلدە بولسىن داستارحانى جايۋلى, شايى قايناۋلى بولاتىن. ىلگەرىدە جازۋشى س.مۇقانوۆ, جازۋشى ءا.كەكىلباەۆ ماحاڭنىڭ ۇيىندە قۇرمەتتى قوناق بولىپ داستارحانىنان ءدام تاتقان.
ماحاڭنىڭ ەڭبەكتەگى ەرلىگى جونىندە جۋرناليست وتەش قىرعىزباەۆتىڭ, جۋرناليست ەسىركەپ ومىربەكوۆتىڭ كىتاپتارىندا جازىلىپ, گازەتتەردە ماقالالار شىققان.
مىرزاحمەت جىلىسباەۆ,
سوعىس ارداگەرى, قارت ۇستاز