بالالارعا ارنالعان انيماتسيالىق فيلم بۇلدىرشىندەرگە جول تارتتى
2011 جىلى وڭتۇستىك قازاقستان وبلىسىنىڭ اكىمى اسقار مىرزاحمەتوۆتىڭ تىكەلەي باستاماسىمەن ىشكى ساياسات باسقاراماسى جانىنان «الەۋمەتتىك باستامالار ورتالىعى» مەملەكەتتىك كوممۋنالدىق مەكەمەسى اشىلعان بولاتىن.
بالالارعا ارنالعان انيماتسيالىق فيلم بۇلدىرشىندەرگە جول تارتتى
2011 جىلى وڭتۇستىك قازاقستان وبلىسىنىڭ اكىمى اسقار مىرزاحمەتوۆتىڭ تىكەلەي باستاماسىمەن ىشكى ساياسات باسقاراماسى جانىنان «الەۋمەتتىك باستامالار ورتالىعى» مەملەكەتتىك كوممۋنالدىق مەكەمەسى اشىلعان بولاتىن.
اتالمىش ورتالىق ۇلتتار مەن ۇلىستار اراسىنداعى تاتۋلىق, ءدىني تۇراقتىلىقتى قامتاماسىز ەتۋ, ەلدىڭ الەۋمەتتىك جاعدايىن كوتەرۋ جولىندا وبلىس اۋماعىندا بەلسەندىلىگىمەن كوزگە ءتۇسىپ كەلەدى. ورتالىقتىڭ ديرەكتورى ن.تۇرسىنباي: «ءبىز قازىرگى كۇنى جاھاندانۋ ءارى اقپاراتتىق تەحنولوگيانىڭ قارىشتاپ دامۋ ساتىسىندامىز. سوندىقتان جاستار جانە جاسوسپىرىمدەردى وتاندى ءسۇيۋ, ۇلتارالىق دوستاستىقتى نىعايتۋعا بايلانىستى جوبالاردى جۇزەگە اسىرۋدا زامان كوشىنەن قالماۋ ءبىزدىڭ باستى ماقساتىمىز», دەيدى.
ورتالىق ەرتەڭگى كۇنىمىزدىڭ تۇتقاسىنا اينالار ۇرپاعىمىزدىڭ تاربيەسى, ولاردىڭ وي-ءورىسىن دامىتىپ, جۇرەكتەرىنە يماندىلىق, وتانسۇيگىشتىك, مەيىرىمدىلىك نۇرىن سەبۋ ماسەلەسىن دە ۇدايى نازاردا ۇستاۋدا. جۋىردا عانا «الەۋمەتتىك باستامالار ورتالىعىنىڭ» تاپسىرىسىمەن كورەرمەن قاۋىمعا جول تارتقان «كوك تۋ جانە دوستار» اتتى قىسقامەتراجدى انيماتسيالىق جوبا سونىڭ ايعاعى.
جاڭا مۋلتفيلم ەلدىڭ ىنتىماق بىرلىگىنە سىزات ءتۇسىرمەۋ, ۇلتارالىق تاتۋلىقتى ساقتاۋ, ەلىمىزدىڭ بولاشاعى ءبۇلدىرشىندەرىمىزدى وتانسۇيگىشتىككە تاربيەلەۋ, سونىمەن بىرگە, بۇكىل جەر شارىنا ەلىمىزدى تانىتۋدى كوزدەيدى. سونداي-اق, ءفيلمنىڭ ستسەناريىن جازعان «جەبە» كينوكومپانياسىنىڭ ديرەكتورى كەرىمبەك نيازباەۆ ورتالىقتىڭ ماماندارىمەن كەڭەسە وتىرىپ, تۋىندىنى بالالاردىڭ دۇنيەتانىمىنا ساي, سالت-داستۇرىنە بەرىك, مەملەكەتتىك رامىزدەردى ءدارىپتەيتىن, ولاردىڭ وتانشىل, نامىسشىل, اقىلدى, پاراساتتى تۇلعا بولىپ قالىپتاسۋىنا ۇلەس قوسۋدى باستى نازاردا ۇستاعان.
«ەگەمەن-اقپارات».