الەمدەگى احۋالعا شولۋ: يتاليا اۋەجايىندا دەنە قىزۋىن ارنايى شلەمدەر ارقىلى تەكسەرەدى

18:32

يتاليا اۋەجايىندا دەنە قىزۋىن ارنايى شلەمدەر ارقىلى تەكسەرەدى

يتاليانىڭ ءىرى اۋەجايى 7 مەتر قاشىقتىقتان قوزعالىس كەزىندە جولاۋشىلاردىڭ دەنە تەمپەراتۋراسىن ولشەي الاتىن «اقىلدى» شلەمدى پايدالانىپ جاتىر. ادامنىڭ ينفراقىزىل بەينەسى مەن ونىڭ دەنە قىزۋىنىڭ كورسەتكىشتەرى قۇرىلعىنىڭ ىشكى ەكرانىندا, وڭ جاعىندا كورىنىپ تۇرادى, ال سول كوز جاعى بوس تۇرادى. اتالعان يننوۆاتسيالىق شلەمدەردى قاۋىپسىزدىك قىزمەتىنىڭ ماماندارى كيىپ جۇرەدى. وسىلايشا, كەلىپ جاتقان, كەزەكتە تۇرعان ادامداردى بايلانىسسىز تەكسەرە الادى.

ەسكە سالا كەتەيىك, يتاليا كارانتين رەجيمىن بىرتىندەپ باسەڭدەتىپ جاتىر. مۇندا 18 مامىردان باستاپ بارلار مەن مەيرامحانالار اشىلا باستايدى. بۇل ەلدە كوروناۆيرۋستى جۇقتىرعانداردىڭ جارتىسىنان كوبى ساۋىعىپ شىقتى. جالپى, 222 مىڭ ادام قاۋىپتى ۆيرۋستى جۇقتىرعان بولسا, ولاردىڭ 113 مىڭعا جۋىعى جازىلىپ شىقتى. ال ۆيرۋستىڭ كەسىرىنەن كوز جۇمعاندار سانى 31 106 ادام.

10:35

قىتاي ۋحاننىڭ ءار تۇرعىنىن تەكسەرمەكشى

ىندەتتىڭ وشاعى بولعان قىتايدىڭ ۋحان قالاسىندا وسى اپتادا ۆيرۋس جۇقتىرعاندار سانى كوبەيدى. وسىعان بايلانىستى قالا بيلىگى بارلىق تۇرعىندى تەكسەرۋ تۋرالى شەشىم قابىلداعان. 

جەرگىلىكتى باق تەكسەرىستىڭ كەشە باستالىپ كەتكەنىن ايتتى. ەڭ ءبىرىنشى قاۋىپتى توپتاعى ادامدارعا ءمان بارىلەدى. 

قىتايدىڭ اۋرۋلاردى باقىلاۋ جانە الدىن الۋ ورتالىعىنىڭ ەپيدەميولوگى ۋ تسزۋنيۋ ۋحاندا ەپيدەميانىڭ ەكىنشى تولقىنى بولادى دەگەنگە سەنبەيتىنىن ايتتى. 

«سوڭعى ءۇش ايدا ءبىز كوروناۆيرۋستىڭ تارالۋىن توقتاتۋدا ايتارلىقتاي تاجىريبە جينادىق. انىقتالعان بىرنەشە جاعدايدىڭ تاعى ءبىر ەپيدەميا باستاۋىنا جول بەرمەيمىز»,- دەدى دارىگەر.

قىتايدا جالپى جاعداي تۇراقتالعانىمەن, ەلدىڭ سولتۇستىگىندەگى رەسەي جانە سولتۇستىك كورەيامەن شەكارالاس پروۆينتسيالارداعى جاعداي الاڭداتىپ وتىر.

Photo: Héctor Retamal/AFP via Getty Images

10:13

دۇنيەجۇزىندە 4 347 018 ادام كوروناۆيرۋس جۇقتىردى.

297 197 ادام قايتىس بولدى.

1 548 547 ناۋقاس قۇلان-تازا ايىقتى.

اقش-تا 1 390 406 جاعداي تىركەلدى, 243 430 ادام ساۋىعىپ شىقتى, 84 119 ادام قايتىس بولدى.

رەسەيدە 242 271 جاعداي تىركەلدى, 48 003 ادام ساۋىعىپ شىقتى, 2 212 ادام قايتىس بولدى.

ۇلىبريتانيادا 230 985 جاعداي تىركەلدى, 1 032 ادام ساۋىعىپ شىقتى, 33 264 ادام قايتىس بولدى.

يسپانيادا 228 691 جاعداي تىركەلدى, 140 823 ادام ساۋىعىپ شىقتى, 27 104 ادام قايتىس بولدى.

يتاليادا 222 104 جاعداي تىركەلدى, 112 541 ادام ساۋىعىپ شىقتى, 31 106 ادام قايتىس بولدى.

رەسەي ۆيرۋس كوپ تاراعان ەكىنشى ەلگە اينالدى

كورشىلەس رەسەيدە كوروناۆيرۋس جۇقتىرعان ادامدار سانى كۇن ساناپ ارتىپ كەلەدى. رەسەي اقش-تان كەيىنگى ۆيرۋس ەڭ كوپ تاراعان ەكىنشى ەلگە اينالدى.

سوڭعى تاۋلىكتە ەلدە 10 028 ادامنىڭ ۆيرۋس جۇقتىرعانى انىقتالدى, رەسەيدە بارلىعى 242 271 جاعداي تىركەلگەن.

ەل ۇكىمەتى جاعدايدىڭ قيىندىعىنا قاراماستان وسى اپتادان باستاپ كارانتين شارالارىن جەڭىلدەتە باستادى.  

كوروناۆيرۋس جۇقتىرعانداردىڭ كوبى ەل استاناسى ماسكەۋدە تىركەلگەن. قالا مەرى سەرگەي سوبيانين جاعدايدى باقىلاۋدا ۇستاۋ ءۇشىن ماسكەۋدە كارانتين شارالارىن مامىردىڭ سوڭىنا دەيىن ۇزارتتى.

ۆيرۋس جۇقتىرعانداردىڭ سانى كوپ بولعانىمەن, ەۋروپا ەلدەرىمەن سالىستىرعاندا قايتىس بولعانداردىڭ سانى تومەن. 2 212 ادام ىندەتتەن كوز جۇمعان.

ءولىم سانىنىڭ از بولۋىن ەل بيلىگى باتىس ەۋروپانىڭ ءساتسىز تاجىريبەسىن زەرتتەۋ ارقىلى العان ساباقتىڭ ناتيجەسى دەپ ءتۇسىندىردى. 

ەلدە جاسالعان ساراپتاما سانى دا جوعارى, بارلىعى 6 ميلليونعا جۋىق ادامدى تەكسەرگەن.

الەمدە بارلىعى 4 283 885 جاعداي تىركەلدى. كوروناۆيرۋستان قايتىس بولعاندار سانى 293 157-دەن اسسا, 1,5 ملن ادام ىندەتتەن ەمدەلىپ شىقتى.

كوروناۆيرۋس افريكانىڭ بارلىق ەلىندە تىركەلدى

افريكانىڭ وڭتۇستىگىندە ورنالاسقان لەسوتو كورولدىگى ەلدە العاشقى كوروناۆيرۋس جۇقتىرعان ناۋقاستىڭ انىقتالعانىن حابارلادى. 

ەندى افريكا قۇرلىعىنىڭ بارلىق ەلىندە كوروناۆيرۋس جۇقتىرعان ادام بار.

دەنساۋلىق ساقتاۋ مينيستلىگى بەرگەن مالىمەتكە سايكەس ۆيرۋس ساۋد ارابياسى مەن كورشىلەس وڭتۇستىك افريكادان كەلگەن 81 جولاۋشىنىڭ بىرەۋىنەن تابىلعان.

ۆيرۋس جۇقتىرعان لەسوتو ازاماتىنىڭ ساۋد ارابياسىندا ءبىلىم الاتىنى بەلگىلى.

قۇرلىقتا ۆيرۋس ەڭ كوپ تاراعان ەل وڭتۇستىك افريكا مەملەكەتى بولىپ تۇر. لەسوتو وعان كورشىلەس ورنالاسقاندىقتان 29 ناۋرىزدان باستاپ شەكاراسىن جاپقان. وتكەن اپتادا عانا ەلدەگى كارانتين رەجيمى باسەڭدەي باستاعان ەكەن.