الماتىدا جاستار اراسىنداعى ءۇشىنشى ەۋرازيا ويىندارى ءوزىنىڭ مارەسىنە جەتتى. بايراقتى باسەكەگە وسى ەندىككە ورنالاسقان بەس ەلدىڭ بولاشاقتارىنان ۇلكەن ءۇمىت كۇتتىرەتىن جاس سپورتشىلارى قاتىستى.
الماتىدا جاستار اراسىنداعى ءۇشىنشى ەۋرازيا ويىندارى ءوزىنىڭ مارەسىنە جەتتى. بايراقتى باسەكەگە وسى ەندىككە ورنالاسقان بەس ەلدىڭ بولاشاقتارىنان ۇلكەن ءۇمىت كۇتتىرەتىن جاس سپورتشىلارى قاتىستى.
الاتاۋدىڭ باۋرايىنداعى اسەم قالانىڭ ەڭ جاقسى سپورت الاڭدارى مەن سارايلارىندا قىركۇيەكتىڭ 16-20-ى ارالىعىنداعى بەس كۇن بويىنا تارتىستى سايىستار بولىپ ءوتتى. قورىتىندىسىندا رەسەي ساڭلاقتارى كوماندالىق ەسەپتە ءبىرىنشى ورىنعا يە بولدى. ولاردىڭ قورجىنىنا 135 التىن, 73 كۇمىس جانە 28 قولا, جيىنتىعى 236 مەدال ءتۇستى. ەكىنشى ورىنعا تابان تىرەگەن قازاقستان وعلاندارى 71 التىن, 86 كۇمىس جانە 41 قولا, بارلىعى 198 مەدالعا قول جەتكىزدى. ءۇشىنشى ورىنعا 7 التىن, 18 كۇمىس جانە 25 قولا مەدال قورىن جيناعان بەلارۋس ەلىنىڭ جاساعى جايعاستى. ءاربىرى 3 التىن جۇلدەدەن الىپ قايتقان قىرعىزستان مەن تاجىكستان قۇرامالارى تيىسىنشە بۇدان كەيىنگى 4-5 ورىندارعا ورنالاستى.
بەس ەلدەن كەلگەن جاس سپورتشىلار سايىستىڭ 8 ءتۇرى بويىنشا مىقتىلاردى انىقتادى. جارىس جولىنا ءبىرىنشى بولىپ بوكسشى قىزدار شىقتى. ونداعى 13 سالماق دارەجەسىنىڭ 4-ۋىندە قازاقستان قىزدارى (ماحابات ءابدىماناپوۆا, 48 كگ; ايدانا بالتاباەۆا, 50 كگ; مارينا اگاپوۆا, 57 كگ; اقەركە ومارقۇلوۆا, 60 كگ) التىننان القا تاقتى. ال جاس جىگىتتەرىمىز قازاق كۇرەسىنەن ءبىر سالماق بويىنشا عانا (81 كگ) تاجىكستان تارلانىنا جول بەرىپ, قالعان سالماقتاردا التىن مەدالداردى تۇگەل وزدەرىندە قالدىردى. بۇل جوعارى سالماقتى جۇلدەلەر نۇرداۋلەت التىنبەكوۆ, رايىمبەك رانتاەۆ, ءابدىراشيد راحمانبەردى, قاسىمبەك تولەنباي, ايازبەك شۇكىر جانە اقجىگىت ورالوۆ سىندى بوز كىلەم شەبەرلەرىنە بۇيىردى. سپورتتىق گيمناستيكادان ەكى ءبىرىنشى ورىنعا قول جەتتى. اتاپ ايتقاندا, بورەنەدە ونەر كورسەتۋدە تاڭشولپان كەنجاقىن, باعاندا ويناۋدا ميلاد كاريمي الدارىنا جان سالمادى. كوركەم گيمناستيكادان ءبىزدىڭ ۇلەسىمىزگە جالعىز التىن مەدال ءتيدى. ونى ءجاسوسپىرىم قىزدارىمىز توپتىق جاتتىعۋدا الدى. ال اۋىر اتلەتيكادا ساڭلاقتار ەكى سالماق بويىنشا عانا كۇش سىناستى. سونىڭ ءبىرىنىڭ التىن مەدالى 94 كيلودان جوعارى سالماقتا وزىپ شىققان سەليمحان ابۋباكاروۆتىڭ موينىنا ءىلىندى.
الاماننىڭ سوڭعى كۇندەرى ەركىن كۇرەس كەرۋەن كەردى. قازاقستاندىق جامپوزداردىڭ مۇنداعى ۇلكەن تابىستارى 4 التىن مەدالمەن ولشەندى. بۇلاردى بىزگە ابباس ءتاجىحانوۆ, ەربول دىلماعامبەتوۆ, مۇحامەد قۋاتبەك جانە ۇسەن دايىر اپەردى. وكىنىشكە قاراي, جاتتىعۋلارىنىڭ سانى بارىنشا كوپ جەڭىل اتلەتيكاداعى جەتكەن جەتىستىكتەرىمىز ونشالىقتى قوماقتى بولا قويمادى. ءبىزدىڭ بۇلاي دەۋىمىزگە مۇنداعى 16 ءتۇرلى سايىستان بار-جوعى 2 التىن مەدال عانا العانىمىز سەبەپ بولىپ وتىر. ولاردى 3000 مەترگە جۇگىرگەن دۋمان عابدىاليەۆ پەن 4ح400 ەستافەتاسىندا سايىسقان تورتتىگىمىز جەڭىپ الدى. سول سياقتى جۇزۋدەن بىردە-ءبىر جوعارى جۇلدەگە قول جەتپەدى.
دەگەنمەن, بۇل الاماندا باستى ماقساتتىڭ تەك جوعارى ورىندار الۋدىڭ بولماعانىن دا ايتا كەتۋىمىز كەرەك. ول ەڭ الدىمەن جاس سپورتشىلاردى كەلەشەكتەگى ۇلكەن سىندارعا دايىنداۋدىڭ كەزەكتى كەزەڭى رەتىندە قىزمەت ەتتى. سوندىقتان دا وعان قاتىسۋشىلاردىڭ بارلىعى دا ۇتىسقا يە بولدى.
رۋسلان يگىلىك.