جاعاجاي ماۋسىمىنا دايىندىق ماسەلەسى تالقىلاندى, دەپ حابارلادى نۇر-سۇلتان قالاسى اكىمدىگىنىڭ ءباسپاسوز قىزمەتى.
ەلوردادا سۋ نىساندارىن تىزىمدەۋ جۇمىستارى ءجۇرىپ, ناتيجەسىندە جۇزۋگە ارنالعان 23 ورىن انىقتالدى.
ونىڭ ىشىندە ورتالىق جاعاجاي, «تري پەسكاريا» جانە «ستوليچنىي دۆور» دەمالىس ايماقتارىنا رۇقسات ەتىلدى. «الماتى-3, بايقوڭىر-1, ەسىل-3, سارىارقا-3 اۋداندارىنداعى ون ۋچاسكەدە قوسىمشا تەگىن جاعاجاي اشۋ تۋرالى ۇسىنىس جاسالدى. بۇل سۋ ايماقتارىنداعى قاربالاستى ايتارلىقتاي ازايتادى», - دەلىنگەن نۇر-سۇلتان قالالىق توتەنشە جاعدايلار دەپارتامەنتىنىڭ حابارلاماسىندا.
سونداي-اق تاعى ون ۋچاسكەدە سۋ دەڭگەيىنىڭ تومەندىگى, كىرەتىن جولداردىڭ بولماۋى, قالىڭ توعايلى ءارى قامىسى بولۋى سالدارىنان جاعاجاي اشۋ قولايسىز دەپ تانىلدى.
«وقىس وقيعالاردىڭ الدىن الۋ ءۇشىن رۇقسات ەتىلمەگەن جەرلەرگە تىيىم سالۋ تاڭبالارى مەن قالقىما بەلگىلەر قويىلادى. وزەننىڭ تومەنگى بولىگى شومىلۋ ورىندارى رەتىندە تەكسەرىلىپ, قاۋىپتى ۋچاسكەلەر قورشالادى جانە پاترۋلدىك پوليتسيا كۇن سايىن كۇزەتەدى», – دەيدى تجد.
مامانداردىڭ ايتۋىنشا, جىل سايىن رۇقسات ەتىلمەگەن شومىلۋ ورىندارىنىڭ سانى كوبەيۋ تەندەنتسياسى بايقالادى (2017 جىلى – 10, 2018 جىلى – 12, 2019 جىلى – 20). ونىڭ نەگىزگى سەبەبى رۇقسات ەتىلگەن قالالىق جاعاجايلاردىڭ سانى مەن قاشىقتىعىنا جانە قالانىڭ سۋ ايماعى بويىندا جاڭا اۋداندار مەن كوپقاباتتى ۇيلەردىڭ سالىنۋىنا, حالىق سانىنىڭ ارتۋىنا بايلانىستى.
وسىعان بايلانىستى نۇر-سۇلتان قالالىق ءماسليحاتىنىڭ تىيىم سالىنعان شومىلۋ ورىندارىن جانە ولارعا قويىلاتىن تالاپتاردى انىقتاۋ تۋرالى شەشىمىنە تولىقتىرۋلار ەنگىزىلدى. بۇدان باسقا, الداعى جاعاجاي ماۋسىمىنا 90 «شومىلۋعا تىيىم سالىنادى» بەلگىسى جانە قالا سۋ ايدىندارىندا ادامداردىڭ قازا بولۋى ستاتيستيكاسى بار 25 اقپاراتتىق ستەند ورناتىلادى.
سونداي-اق دەپارتامەنتتىڭ ء«وس جانە اقجق» مم, «جقج» بولىمشەلەرى 20 قالقىما بەلگى ورناتىپ, سۋعا شومىلۋ ورىندارىندا وزەن ءتۇبىن زەرتتەۋ جانە قاۋىپتى ۋچاسكەلەرگە قورشاۋ جۇرگىزەدى. جازعى جاعاجاي ماۋسىمى پروفيلاكتيكالىق ءىس-شارالاردى وتكىزۋگە, سونداي-اق بالالاردى جۇزۋگە, ءوزىن-ءوزى قۇتقارۋعا جانە العاشقى مەديتسينالىق كومەك كورسەتۋگە وقىتۋدى ۇيىمداستىرۋ ءۇشىن ءااد جانە دەنە شىنىقتىرۋ قاتارىنان وقىتۋشىلار قۇرامىن تارتۋعا ەرەكشە نازار اۋدارىلاتىن بولادى. بۇل جۇمىستى دەپارتامەنت قىزمەتكەرلەرى بەكىتىلگەن جوسپارعا سايكەس تۇراقتى تۇردە جۇرگىزەدى.