قاسىم-جومارت توقاەۆ كوروناۆيرۋس ىندەتىن انىقتاۋعا ارنالعان جاڭا ءموبيلدى سكرينينگ ورتالىعىنىڭ قىزمەتىمەن تانىستى. بۇل ورتالىق وڭتۇستىك كورەيانىڭ تەحنولوگياسى بويىنشا جۇمىس ىستەيدى. بۇل تۋرالى اقوردانىڭ ءباسپاسوز قىزمەتى حابارلادى.
الماتى قالاسىنىڭ اكىمى باقىتجان ساعىنتاەۆ مەملەكەت باسشىسىنا قالاداعى ەپيدەميولوگيالىق احۋال جايىندا ەسەپ بەردى.
كورەيالىق «Medical Partners Korea» مەديتسينا كومپانياسىنىڭ باسشىلارى كيم دايونگ پەن مين حيسۋك قازاقستان پرەزيدەنتىنە ءموبيلدى لابوراتوريانىڭ مۇمكىندىگى مەن «Drive-through» جۇيەسى بويىنشا سىناما الۋداعى تاجىريبەلەرى تۋرالى ايتتى.
قاسىم-جومارت توقاەۆ دارىگەرلەرمەن اڭگىمەلەسىپ, ولارعا قاجىرلى ەڭبەكتەرى ءۇشىن ريزاشىلىعىن ءبىلدىردى.
– پاندەميا – شىن مانىندەگى سوعىس. بۇكىل الەم پاندەمياعا قارسى سوعىس جاريالادى. فرانتسۋزداردا سوعىستىڭ اتى سوعىس دەگەن ءسوز بار. ءبىز جۇدىرىقتاي جۇمىلساق, پاندەميانى جەڭە الامىز, – دەدى پرەزيدەنت.
سونىمەن قاتار مەملەكەت باسشىسى ورتالىقتىڭ قىزمەتكەرلەرىن 12 مامىردا اتاپ وتىلەتىن حالىقارالىق مەدبيكەلەر كۇنىمەن قۇتتىقتادى.