الەمدەگى احۋالعا شولۋ: رەسەي ۆيرۋس كوپ تاراعان اقش پەن يسپانيادان كەيىنگى ءۇشىنشى ەلگە اينالدى

17:35

رەسەي ۆيرۋس كوپ تاراعان اقش پەن يسپانيادان كەيىنگى ءۇشىنشى ەلگە اينالدى

رەسەيدە ۆيرۋس جۇقتىرعاندار سانى 221 344 ادامعا جەتتى. بۇگىن ەلدە ۆيرۋس جۇقتىرۋدىڭ جاڭا 11 656 دەرەگى تىركەلگەن. بۇگىن تاڭەرتەڭ عانا كوروناۆيرۋس جۇقتىرعاندار سانى بويىنشا الەمدە بەسىنشى ورىندا تۇرعان رەسەي ءبىر كۇندە ءۇشىنشى ورىنعا ورنالاستى.   بارلىعى 39 801 ناۋقاس ەمدەلىپ شىققان, ال 2 009 ادام قايتىس بولدى.    اقش, يسپانيا, رەسەيدەن كەيىن ۆيرۋس كوپ تاراعان ەلدەر ۇلىبريتانيا, يتاليا, فرانتسيا, گەرمانيا, برازيليا, تۇركيا, يران جانە قىتاي بولىپ تۇر.       

11:02

ۋحان ناۋرىز ايىنان بەرى ەڭ جوعارى كورسەتكىشتى تىركەدى

ىندەتتىڭ وشاعى بولعان قىتايدىڭ ۋحان قالاسى 11 ناۋرىزدان بەرى بولماعان ەڭ جوعارى كورسەتكىشتى تىركەدى. ەلدە جالپى جاڭا 17 جاعداي تىركەلسە, ونىڭ بەسەۋى ۋحاندا انىقتالعان.

انىقتالعان 7 ناۋقاس شەتەلدەن كەلگەن. ەل ىشىندەگى بەس ادام ۆيرۋستى رەسەيمەن شەكارالاس ەلدىمەكەندە جۇقتىرعان. 

قىتايدا جالپى 84 010 ادامنىڭ ۆيرۋس جۇقتىرعانى بەلگىلى. ولاردىڭ ىشىندە 79 167 ناۋقاس ايىققان, ال 4 637 ادام قايتىس بولدى.  

قازىر ەلدە ۆيرۋس جۇقتىرعانداردى انىقتاعاندا اۋرۋ بەلگىلەرى بار ناۋقاستارمەن قاتار سيمپتومسىز ناۋقاستار سانىن بولەك ەسەپتەپ جاتىر.

 

10:25

گەرمانيادا 357 ادامنىڭ ۆيرۋس جۇقتىرعانى انىقتالدى

ەلدە جاڭا انىقتىلعان 357 جاعدايدى قوسقاندا ۆيرۋس جۇقتىرعاندار سانى 169 575 ادامعا جەتتى. ال سوڭعى تاۋلىكتە 22 ادام, بارلىعى 7 417 ناۋقاس قايتىس بولعان.

گەرمانيا - ەۋروپادا كارانتين رەجيمدەرىن جەڭىلدەتكەن العاشقى ەلدەردىڭ ءبىرى. وتكەن اپتا سوڭىندا مىڭداعان ەل تۇرعىنى كارانتيندى تولىعىمەن الىپ تاستاۋ تۋرالى تالاپتارىن العا تارتقان ەدى. الايدا قاتاڭ شارالار باسەڭدەگەندە ۆيرۋس جۇقتىرعاندار كوبەيىپ بارادى. قازىر گەرمانيادا دۇكەندەر اشىق, وقۋشىلار مەكتەپكە قايتا بارا الادى, فۋتبول ويىندارىن وتكىزۋگە دە رۇقسات بەرىلدى.

 

10:11

رەسەي ۆيرۋس ەڭ كوپ تاراعان بەستىككە قوسىلدى

ەلدە كوروناۆيرۋس جۇقتىرۋدىڭ جاڭا 11 012 جاعدايى تىركەلدى. قازىر رەسەيدە بارلىعى 209 688 ادام ىندەت جۇقتىرعان. ولاردىڭ ىشىندە 34 306 ناۋقاس جازىلىپ شىقسا, 1 915 ادام قايتىس بولدى.

جالپى ۆيرۋس جۇقتىرعانداردى انىقتاۋ ءۇشىن 5,4 ملن تەست جاسالعان.