كەزدەسۋدە بايقوڭىر عارىش ايلاعىن ودان ءارى دامىتۋ, سونداي-اق قورعانىس جانە قارۋ-جاراق ماسەلەلەرى جونىندە قازاقستان مەن رەسەي ۇكىمەتتەرى جۇرگىزىپ جاتقان جۇمىستار بارىسى قاراستىرىلدى.
– ءبىز قورعانىس ونەركاسىبى سالاسىندا بىرلەسكەن كاسىپورىندار قۇرۋ ماسەلەسىن بۇعان دەيىن دە تالقىلادىق. وسى ماقساتپەن ءبىزدىڭ ەلدە جەكە مينيسترلىك قۇرىلدى, – دەدى نۇرسۇلتان نازارباەۆ.
مەملەكەت باسشىسىنا رەسەي ۇكىمەتىنىڭ ۆيتسە-پرەمەرى بولاشاقتا بىرلەسە جۇزەگە اسىرىلاتىن «بايتەرەك» جوباسىنىڭ تەحنيكالىق جاعى تۋرالى ەگجەي-تەگجەيلى بايانداپ بەردى.
– بۇل جوبا مۇلدە جاڭا زىمىران-عارىش تەحنيكاسىن جاساۋعا جانە زىمىران جونەلتۋ كەشەنىن جاڭعىرتۋعا باعىتتالعان. جوبا جونىندە قول جەتكىزىلگەن ۋاعدالاستىقتار ەكى ەل باسشىلارى تاراپىنان رەسمي راسىمدەلگەن جاعدايدا بايقوڭىر قالاسى مەن جونەلتۋ كەشەنىن دامىتۋدىڭ جارقىن پەرسپەكتيۆاسىنا جول اشىلادى, – دەدى د.روگوزين.
سونداي-اق, مەملەكەت باسشىسى قازاقستان مەن رەسەي قارىم-قاتىناسىندا ەكونوميكانىڭ باسقا سالالارى بويىنشا دا ىلگەرىلەۋشىلىكتەر بار ەكەنىن اتاپ ءوتتى.