قىزىلوردا وبلىسىندا كوروناۆيرۋس ينفەكتسياسىن جۇقتىرعاندار سانى 222-گە جەتتى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆ مالىمدەدى.
- جاڭادان انىقتالعانداردىڭ 1-ءۋى سكرينينگتەن انىقتالسا, 4-ەۋى كوروناۆيرۋس جۇقتىرعان ناۋقاسپەن بايلانىستا بولعان ازاماتتار. سوڭعى تاۋلىكتە بارلىعى 553 زەرتحانالىق سىناما الىنسا, ونىڭ 543 سىناماسى تەرىس, بەسەۋى وڭ ءماندى بولسا, 5 سىناما زەرتتەلۋدە, – دەدى جاقسىلىق ابىلقاسىم ۇلى.
سونداي-اق كوروناۆيرۋس ينفەكتسياسىن جۇقتىرعاندارمەن بايلانىستا بولعان – 3242 ازامات انىقتالدى. ونىڭ ىشىندە, 1746-سى جاقىن قارىم-قاتىناستا, 1496-سى جاناما بايلانىستا بولعان.
جالپى 22 ساۋىردەن بەرى قاراي COVID-19 ينفەكتسياسى 73 ناۋقاستان انىقتالعان. ونىڭ 12-ءسى مەديتسينا قىزمەتكەرى. جابىق مەكەمەلەردى سكرينينگتەۋ بارىسىندا 2 ناۋقاس انىقتالسا, 43 ازاماتتىڭ قارىم-قاتىناس ارقىلى جۇقتىرعانى بەلگىلى بولدى.
ۆاحتالىق جۇمىستان كەلگەندەر اراسىنان 7 ناۋقاس شىقتى, توسقاۋىل بەكەتتەرىندەگى تەكسەرۋ 3 ادامنىڭ ۆيرۋس جۇقتىرعانىن انىقتادى.