كارانتين تالاپتارى جەڭىلدەگەننەن بەرى وبلىستا 43 كاسىپورىننىڭ جۇمىسىنا رۇقسات ەتىلگەن. بۇل تۋرالى وڭىرلىك كوممۋنيكاتسيالار قىزمەتىنىڭ اقپاراتتىق الاڭىندا وبلىستىق يندۋستريالىق-يننوۆاتسيالىق دامۋ باسقارماسىنىڭ باسشىسى رينات سۇلتانگەرەەۆ مالىمدەدى.
باسقارما باسشىسى بريفينگتە بيىل جەرگىلىكتى تاۋار وندىرۋشىلەرگە باسىمدىق بەرىلەتىنىن اتاپ ءوتتى. «جۇمىسپەن قامتۋ» باعدارلاماسى بويىنشا 276 جوبا جۇزەگە اسىرىلىپ, 1349 ادام جۇمىسپەن قامتىلادى.
– توتەنشە جاعداي بارلىق سالاعا وزگەرىس اكەلگەنى جاسىرىن ەمەس. ءبىر جارىم ايدان اسا سىرتتان كەلەتىن تاۋارلار توقتاپ قالعانىن بىلەسىزدەر. دەگەنمەن, ءومىر جالعاسىپ جاتىر. قازىر تەمىر–بەتون, تسەمەنت شىعاراتىن, قيىرشىق-تاس ۇگىتەتىن زاۋىتتار ىسكە كىرىستى. ولارعا قىزمەت كورسەتەتىن اۆتوكولىكتەردى «سەرگەك» باعدارلاماسىنا ەنگىزىپ, كىدىرىسسىز جۇرۋلەرىنە جاعداي جاسالىپ وتىر,–دەدى رينات قالدىبەك ۇلى.
باسقارما باسشىسى ينفەكتسيانىڭ تارالۋىن تەجەۋ ماقساتىندا جەرگىلىكتى 80-نەن استام جەڭىل ونەركاسىپ سالاسىنداعى كاسىپورىن مەن ەرىكتىلەر جەكە قورعانىس قۇرالدارىن ءوندىرىپ جاتقانىن اتاپ ءوتتى.