كوروناۆيرۋستى جەڭگەن قىز

ارينە, اۋرۋدىڭ قاي-قايسىسى دا ادامعا ۋايىم تۋدىرادى عوي. ال مىناداي قاۋىپتى ىندەتكە شال­دىعۋ تۋرالى ەستۋ, تىپتەن قور­­قى­نىشتى ەكەنى راس. ىندەتتىڭ شەڭ­گەلىنە ىلىنگەنىن ەستىگەندە اي­كوركەم دە قاتتى جىلادى. بىرەۋ سەنەر, بىرەۋ سەنبەس, ءدال سول ساتتە بولاشاعى ب ۇلىڭعىر تار­تىپ بارا جاتقانداي ەدى.

– بۇل كۇن مەنىڭ ەسىمدە ماڭگى ساقتالاتىن بولار. ەسىمنەن شى­عارا الار ەمەسپىن. بۇل – 8 ءساۋىر. ءدال وسى كۇنى مەندە قاۋىپتى ىن­دەتتىڭ بەلگىسى انىقتالدى. سول كۇنى اتىراۋداعى №2 ينفەك­تسيالىق اۋرۋحاناعا ءتۇستىم. ويى­ما نە كەلىپ, نە شىقپادى دەيسىز. ءارى-ءسارى كۇيگە ءتۇستىم. ۇيدە­گىلەرگە تەلەفونمەن ۇزدىكسىز حا­بار­­لاسىپ, «ەندى نە ىستەيمىن؟» دەگەن سۇراقتى قايتا-قايتا قويا بەردىم, – دەيدى ايكوركەم كۋسەسوۆا.

ينفەكتسيالىق اۋرۋحاناداعى العاشقى كۇنىن ۋايىممەن وتكىزدى. دارىگەرلەر اۋرۋحاناعا جاتقان ساتتەن باستاپ كۇنىنە ەكى مەزگىل قابىلدايتىن ەكى ءدارى بەردى. بۇل – كوروناۆيرۋسپەن كۇرەسىپ جاتقان الەم مەديتسيناسى قولدانعان دارىلەر. ءدارى قابىلداعان سوڭ, باستاپقىدا اسقازانى اۋىرعان. كەيىن اۋزىنا اششى ءدام كەلەتىن بولدى. ۇرەي مەن قورقىنىشقا بوي الدىرا باستادى. توعىز كۇننەن كەيىن دەنەسىندە بورتپە پايدا بولدى. سونداي ساتتە پسيحولوگيالىق, مورالدىق دەمەۋىن كورسەتكەن دارىگەر جانتورە ورىسباەۆا ءومىر سۇرۋگە دەگەن ءۇمىتىن وياتتى.  

– مەنىمەن بىرگە پالاتادا ءۇش ادام جاتتى. ولاردىڭ ءبىرىن قۇرعاق جوتەل قىسىپ, قاتتى قي­نالدى. ەندى ءبىرى ءدامدى دە, ءيىستى تە مۇلدەم سەزبەدى, – دەپ اۋرۋ­حاناداعى كۇندەرىن مۇڭايا ەس­كە الا­دى ول.  

دارىگەرلەرگە ەشقانداي وكپەسى جوق.  ويتكەنى, ولار كۇن سايىن ناۋقاستاردى بالاشا ماپەلەدى. قال-جاعدايىن سۇرادى. تاڭمەن بەرىلەتىن دارىلەردى  قابىلداۋىن قاداعالادى. دەنە قىزۋىن ولشەدى. تاڭەرتەڭگى ساعات 10:00 شاماسىندا  دارىگەرلەر  جاعدايىن تەكسەرەدى. 

– ءبىزدى دارىگەرلەر دارىمەن عانا ەمەس, جىلى سوزىمەن دە ەمدەپ شىعاردى. دارىگەردىڭ جىلى ءسوزى دە تاپتىرماس ەم. مەن سەكىلدى ءبىراز ادامنىڭ قا­ۋىپ­تى ىندەتتەن جازىلۋىنا بار ىنتاسىمەن ەڭبەكتەنگەن جان­تورە ورىسباەۆا, سالتانات قا­يى­روۆا, نۇرفيا قيزاتوۆا, ءاسيا سيدەشوۆا, وزگە دە مەديتسي­نا قىزمەتكەرلەرىنىڭ سوڭعى ناۋقاس ساۋىققانشا اۋرۋحانادان شىق­پايمىز دەگەن ادالدىعىنا ريزامىن. دارىگەرلەرگە ارنايى قور­عانىش كيىمىمەن ءجۇرۋ دە, وتبا­سىنا بارماي جۇمىس ىستەۋ دە وڭاي ەمەس, – دەپ اعىنان جارىلدى ستۋدەنت. – اۋرۋحانادان شىققان كۇنى قۋانىشىمدا شەك بولعان جوق. سەبەبى, الەمدە بۇل ىندەتتىڭ قۇربانى بولىپ جاتقاندار كوپ عوي. باستاپقىدا «وسى ىندەتتى جەڭىپ شىقسام» دەگەن ارمانىم بولدى. سول ارمانىما مەديتسينا قىزمەتكەرلەرىنىڭ قولداۋىمەن قول جەتكىزگەنىمە قۋاندىم.

اۋرۋحانادان ۇيىنە جەتكەنشە, كوپ ادامنىڭ كوشەدە الاڭسىز جۇرگەنىنە قىنجىلدى. جالپى, ءار ادام ءوز باسىنان وتكىزبەي, قاۋىپ-قاتەردىڭ نە ەكەنىن سەزىنبەيدى عوي.

– قازىر كوپشىلىكتىڭ اراسىندا «ۆيرۋس جوق, اۋرۋحاناعا جاتىپ شىعۋ ءۇشىن اقشا تولەپ جاتىر» دەگەن الىپقاشپا اڭگىمەلەر تارادى. بىراق, سونداي اڭگىمەلەردى تاراتىپ جۇرگەندەر دە, سوعان سەنەتىندەر دە قاتتى قاتەلەسەدى. ويتكەنى,  كوروناۆيرۋس – ويىنشىق ەمەس. بۇل – وتە قاۋىپتى ىندەت. كوروناۆيرۋس ءبىزدىڭ ارامىزدا ءجۇر. سوندىقتان, دارىگەرلەر ۇسىنعان ساقتىق شارالارىن قاتاڭ ساقتاعان ءجون. بارشاعا ايتارىم, ءوزىڭىزدىڭ, وتباسىڭىزدىڭ, بارشا ادامزاتتىڭ اماندىعىن ويلاساڭىز, تارتىپكە باعىنىڭىز. تاعى دا قايتالاپ ايتايىن, ساقتىق شارالارىن ساقتاپ, بەي-بەرەكەت ءجۇرۋدى دوعارۋ كەرەك, – دەيدى ايكوركەم كۋسەسوۆا.

ەندى ول دارىگەرلەردىڭ بەرگەن كەڭەسىن ساقتاۋعا بەكىنىپ وتىر. ۇيىندە 21  كۇندىك كاران­تيندە بولادى. مەكەنجايى بو­يىن­شا تىركەلگەن ەمحاناداعى ەپيدەميولوگ-دارىگەرگە كۇن سايىن دەنساۋلىعى تۋرالى حابارلاپ, ۆيدەو جىبەرەدى.  كارانتين مەرزىمى اياقتالعان سوڭ, قايتادان اناليز تاپسىرادى. ءبارى دە جاقسى بولارىنا سەنەدى.

اتىراۋ