وڭتۇستىك كورەيا كومپانياسى گۋمانيتارلىق كومەك كورسەتپەك

گۋمانيتارلىق كومەك ۆيرۋستى انىقتايتىن 2000 پتر (پوليمەرازدى تىزبەكتى رەاكتسيا) تەستى, 2500 R-Guard3000 قورعانىس كوستيۋمى جانە تالداۋ جۇرگىزۋ ءۇشىن بيوماتەريال جيناۋعا ارنالعان 20 000 كونتەينەردەن تۇرادى. وڭتۇستىك كورەيادا وندىرىلگەن بۇل مەديتسينالىق قۇرالدار وڭ ناتيجە كورسەتۋدە.

دەنساۋلىق ساقتاۋ مينيسترىلىگىنە بەرىلگەن پتر تەستىلەر, دياگنوستيكالىق جيىنتىقتار مەن ۆيرۋسقا قارسى مەديتسينالىق قورعاۋ قۇرالدار نۇر-سۇلتان مەن الماتى قالالارىنا بەرىلەدى. ويتكەنى وسى قالالاردا كوروناۆيرۋس ىندەتى كوپ تىركەلىپ وتىر.

تۇڭعىش پرەزيدەنت – ەلباسى قورىنىڭ اتقارۋشى ديرەكتورىنىڭ ورىنباسارى الكەي مارعۇلان ۇلى مەديتسينالىق قۇرال-جابدىقتاردى دەنساۋلىق ساقتاۋ باسقارماسىنا تاپسىرۋ ءراسىمى بارىسىندا: «تاۋەلسىزدىك جىلدارى قازاقستان مەن وڭتۇستىك كورەيانىڭ بەرىك دوستىق قارىم-قاتىناسى قالىپتاستى. ەكى ەل اراسىندا يننوۆاتسيا, ەكونوميكا, ساۋدا جانە مادەني سالالارداعى ءوزارا ءىس-قيمىلى نىعايىپ كەلەدى. كورەي كومپانياسىنىڭ قازاقستانعا گۋمانيتارلىق كومەك كورسەتۋى - وڭتۇستىك كورەيا مەن قازاقستان اراسىنداعى كوپجىلدىق دوستىقتىڭ تاعى ءبىر ايعاعى. كورەيلىك سەرىكتەستەرگە وسىنداي ناقتى كومەك ءۇشىن العىس ايتامىن!» - دەپ شارانىڭ ماڭىزدىلىعىن اتاپ ءوتتى.

ءوز كەزەگىندە «SIGONGTECH» كومپانياسىنىڭ اتقارۋشى ديرەكتورى كو يۋن سان دا مۇنى اتاپ ءوتتى: «كورەيا دا, قازاقستان دا قازىر قيىن-قىستاۋ كەزەڭدى باستان كەشىپ جاتىر. بۇل ءوزارا ىنتىماقتاستىق پەن قامقورلىق بۇرىنعىدان دا كوبىرەك قاجەت بولاتىن ۋاقىت. 2013 جىلدان باستاپ SIGONGTECH كومپانياسى نۇر-سۇلتان قالاسىندا كوپتەگەن ءىرى ديزاينەرلىك, كورمە جوبالارىن جۇزەگە اسىرىپ كەلەدى, ءارى قازاقستانمەن ەرەكشە سەنىمدى قارىم-قاتىناس ورناتتى. سونىمەن قاتار, COVID-19-عا قاتىستى قيىن جاعدايعا قاراماستان, تىنباي ەڭبەك ەتىپ جاتىرمىز جانە قازىرگى كەزدە قازاقستان رەسپۋبليكاسى تۇڭعىش پرەزيدەنتى – ەلباسى مۋزەيى جوباسىنا كىرىستىك. بۇل گۋمانيتارلىق كومەكتى, ەڭ اۋەلى قازاقستان حالقى قاۋىپسىز جانە دەنساۋلىعى مىقتى بولادى دەگەن ۇمىتپەن بەرەمىز. وسى قىسىلتاياڭ شاقتى بىرگە ەڭسەرەمىز دەپ سەنەمىن».

قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دەسيك مىرزا: «قازاقستان ۇكىمەتىنىڭ پاندەميانىڭ تارالۋىن اۋىزدىقتاۋ بويىنشا ۋاقتىلى قابىلداعان شارالارىنىڭ جانە حالىقتىڭ ازاماتتىق جاۋاپكەرشىلىگىنىڭ ارقاسىندا قازاقستان بۇل ىندەتپەن تابىستى كۇرەسىپ جاتىر». ەلشى وڭتۇستىك كورەي كومپانياسىنىڭ گۋمانيتارلىق كومەگىن شىنايى دوستىق قارىم-قاتىناستىڭ جارقىن ۇلگىسى دەپ باعالادى.