تۇركىستان وبلىسى ماقتاارال اۋدانىنداعى سۋ تاسقىنىنا وراي اۋىل شارۋاشىلىعى سالاسىندا تۇگەندەۋ جۇمىستارى جۇرگىزىلۋدە. قازىردىڭ وزىندە 3601 گەكتارعا جۋىق اۋىل شارۋاشىلىعى داقىلدارىنىڭ سۋ استىندا قالىپ, زارداپ شەككەنى انىقتالعان. الدىن الا بولجام بويىنشا شىعىن كولەمى 404 ملن تەڭگەنى قۇراپ وتىر.
اسىرەسە, جاڭاجول, ەڭبەكشى اۋىل وكرۋگتەرىنە قاراستى جەڭىس, جاڭاتۇرمىس, جانتاقساي اۋىلدارىنداعى القاپتار كوپتەپ زارداپ شەككەن. سۋ استىندا قالعان ەگىستىك القاپتىڭ 85 پايىزى ماقتا, قالعانى جوڭىشقا مەن جۇگەرىگە تيەسىلى. تۇگەندەۋ جۇمىستارىمەن وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ باستاعان ارنايى جۇمىسشى توبى اينالىسۋدا. «قازىرگى تاڭدا 95 مامانىمىز سۋ استىندا قالعان ەگىستىك القاپتارى مەن مال شىعىندارىن ەسەپتەپ, تۇگەندەۋ جۇمىستارىن جۇرگىزۋدە. شىعىنداردى تولىق ەسەپتەۋگە ازىرگە مۇمكىندىك از بولىپ تۇر. دەسەك تە, تۇرعىندار بەرگەن مالىمەتتەردى اۋداندىق اۋىل شارۋاشىلىعى بولىمىمەن بىرلەسە وتىرىپ, زەردەلەۋدەمىز. سۋ تاسقىنى باسىلعان سوڭ اۋىلداردى ارالاپ, شىعىن كولەمىن ناقتى انىقتايتىن بولامىز», دەدى مىرزاكەنت كەنتىندەگى شتابتىڭ ءباسپاسوز ورتالىعىندا باسقارما باسشىسىنىڭ ورىنباسارى تۇرعانبەك وسپانوۆ.
ماقتاارال اۋدانىندا الداعى ۋاقىتتا سۋ باسۋ قاۋپى بار اۋىلداردا مالدى قاۋىپسىز جەرگە جەتكىزۋ جۇمىستارى جالعاسۋدا. قازىردىڭ وزىندە سۋ تاسقىنى ورىن العان 7 ەلدى مەكەننەن ياعني, جەڭىس, جاڭاتۇرمىس, جانتاقساي, فەردوۋسي, ەڭبەكشى, نۇرلىتاڭ, ورگەباس اۋىلدارىنان 3115 ءىرى قارا, 1101 جىلقى, 585 قوي, 34 تۇيە كوشىرىلگەن. ال سۋعا كەتىپ ولگەن مال سانى ازىرگە بەلگىسىز بولىپ وتىر. بۇل جۇمىستارعا تاسقىن سۋدىڭ ءالى دە بولسا توقتاماي تۇرعانى قولبايلاۋ بولۋدا.