جەمقورلىق ىندەتتىڭ زيانكەستىگى مەملەكەت ءۇشىن اتى جامان ۆيرۋستىڭ زاردابىنان كەم ەمەس. وعان قارسى جەتىلدىرىلگەن زاڭنامالىق قۇجاتتار قابىلدانىپ جاتقانىمەن قوعامعا ەندەپ كىرگەن بۇل دەرت ابدەن جايىلىپ بارادى.
جەدەل كۇرەس جۇرگىزەتىن ۇلتتىق بيۋرونىڭ قىزمەتى قانشالىقتى ساپالى بولعانىمەن جەمقورلىقتى جويا الاتىن ەمەس. جۋىردا پارلامەنت ءماجىلىسى ىندەتكە قارسى كۇرەستىڭ زاڭناماسىن جەتىلدىرۋدى ماقسات ەتكەن تولىقتىرۋلار مەن وزگەرتۋلەردى قامتىعان زاڭ جوباسىن ءبىرىنشى وقىلىمدا ماقۇلدادى. قابىلدانعان كۇندە بۇل زاڭنىڭ قانشالىقتى ءتيىمدى بولارىن الداعى ءومىر كورسەتەدى.
نەگىزگى كۇرەس قوعامنىڭ ءوز ىشىندە قاتتى دامىپ, ادامنىڭ ساناسىنا پارا الۋدىڭ قانشالىقتى زيان ەكەندىگى ءسىڭىرىلۋى كەرەك. ءوز مەملەكەتىنىڭ جەتىلۋىنە, ەلىنىڭ تازا بولۋىنا مۇددەلى بولعان ەۋروپاداعى وركەنيەتتى ەلدەردىڭ ازاماتتارى جەمقورلىقتى جاپپاي كورسەتىپ, وعان قارسى كۇرەسكە شىققان. سونىڭ ارقاسىندا ولار اشىق, تازا تارتىپكە قول جەتكىزدى. ال ءبىز كەڭەستىك كەڭكەلەستىك رەجىمنەن ۇرى-قارىنىڭ يدەولوگياسىن باسىمىزعا ءسىڭىرىپ, وكىمەتكە بولىسپا, وعان ەشكىمدى ساتپا دەگەن جامان ادەتتى ۇستاپ قالعانبىز. سايىپ كەلگەندە ول وزىمىزگە زيان ەكەنىن سەزىنبەيمىز. سونىڭ كەسىرىنەن ادامداردىڭ ءبىر-بىرىنە دەگەن, مەملەكەتكە دەگەن سەنىمى تومەندەيتىنىن, ەكونوميكالىق دامۋ دا توقىرايتىنىن ۇعا قويمايمىز.
ەلىمىزدىڭ سىبايلاس جەمقورلىققا قارسى 2015-2025 جىلدار ارالىعىنداعى كۇرەس ستراتەگياسىن ىسكە اسىرۋ ءۇشىن سولتۇستىك قازاقستاندا دا «قىزىلجار - ادالدىق الاڭى» اتتى كەڭسە جوبا قولعا الىنعان. وتكەن بەيسەنبى كۇنى سول كەڭسەنىڭ 2020 جىلدىڭ ءى توقسانىنداعى جۇمىسىن قورىتىندىلاعان ۆەدومستۆوارالىق كوميسسيانىڭ وتىرىسى بولدى. وسى ۋاقىت ارالىعىندا كەڭسەگە 15 ادام قايرىلعان ەكەن. ونىڭ 13-ءنىڭ قۇقى سىبايلاستىقتىڭ كەسىرىنەن بۇزىلعانى انىقتالىپ, قالپىنا كەلتىرىلىپتى. سىبايلاس جەمقورلىققا قارسى كۇرەس دەپارتامەنتىنىڭ باسشىسى ءوزىنىڭ سوزىندە وسىندايعا جول بەرىلگەن ۇجىمداردىڭ باسشىلارى تارتىپتىك جاۋاپكەرشىلىك تارتقانىن اتادى.
كوميسسيانىڭ وتىرىسىنا قاتىسقان وبلىس اكىمى قۇمار اقساقالوۆ ءوزىنىڭ سوزىندە: «بۇل ىسكە قوعام وكىلدەرىن بارىنشا كوپ تارتۋىمىز كەرەك. تەك بارلىق قوعام بولىپ كۇرەسكەندە عانا ىندەتتى جويا الامىز», دەدى. وتىرىستا جەمقورلىق ارەكەتتى كورگەن ادام بولسا دەرەۋ 1424 تەلەفونىنا حابارلاسۋ كەرەكتىگى دە يتىلدى.
سولتۇستىك قازاقستان وبلىسى