بۇگىن الماتى وبلىسىندا كوروناۆيرۋسپەن اۋىرعان تاعى 2 ادام تىركەلدى. ال ءباا-دەن ۇشىپ كەلگەن جولاۋشىلاردىڭ بارلىعىنىڭ تەكسەرۋ ناتيجەلەرى تازا بولىپ شىقتى. بۇل تۋرالى الماتى وبلىسى اكىمىنىڭ ءباسپاسوز قىزمەتى حابارلادى.
2 ناۋقاستىڭ ءبىرى – ىلە اۋدانى قاروي اۋىلىنىڭ تۇرعىنى. ەكىنشىسى – 30 ساۋىردە «اتىراۋ-الماتى» اۋە رەيسىمەن ۇشىپ كەلگەن جولاۋشىلاردىڭ ءبىرى. ونىڭ سىرقاتى پروفيلاكتيكالىق تەكسەرۋ بارىسىندا بەلگىلى بولعان. ونىمەن بىرگە بورتتا 79 جولاۋشى, 9 ەكيپاج مۇشەسى بولعان. جاقىن بايلانىستا بولعاندار – 9, پوتەنتسيالدى بايلانىستا بولعاندار سانى – 71 ادام. جاقىن بايلانىستا بولعاندار قاراساي اۋداندىق اۋرۋحاناسىنىڭ ينفەكتسيالىق بولىمىنە جاتقىزىلدى, ال پوتەنتسيالدى بايلانىستا بولعاندار ءۇي كارانتينىندە مەديتسينالىق مامانداردىڭ باقىلاۋىنا الىندى.
تاعى ءبىر اتاپ وتەرلىگى, ءباا-دەن جەتكىزىلىپ, قاپشاعاي ماڭىندا كارانتينگە الىنعان 171 ادامنىڭ بارلىعىنىڭ ۆيرۋسولوگيالىق زەرتتەۋ ناتيجەسى تازا بولىپ شىقتى. ولار بۇگىن اكىمدىك تاراپىنان ۇيىمداستىرىلعان ارنايى اۆتوبۋستارمەن ءۇيدى-ۇيلەرىنە تاراتىلدى.
جالپى, الماتى وبلىسىندا COVID-19 ينفەكتسياسىمەن اۋىرعاندار سانى – 144.