بۇگىننەن باستاپ نۇر-سۇلتان-الماتى اراسىنداعى رەيستەر اشىلادى. بۇل تۋرالى مەملەكەت باسشىسى قاسىم-جومارت توقاەۆ كوروناۆيرۋسقا بايلانىستى جاريالاعان مالىمدەمەسىندە ايتقان بولاتىن.
ەلدەگى توتەنشە جاعدايعا بايلانىستى نۇر-سۇلتان مەن الماتى قالالارى اراسىنداعى اۋە تاسىمالىنا 30 ناۋرىزدا شەكتەۋ قويىلعان ەدى. ءبىر ايلىق ۇزىلىستەن كەيىن, ياعني بۇگىن نۇرسۇلتان نازارباەۆ اتىنداعى حالىقارالىق اۋەجايعا العاشقى جولاۋشىلار الماتىدان كەلدى. ال ەلوردادان الماتىعا ۇشاق ساعات 09.40 كەزىندە قايتا ۇشىپ كەتتى.
بۇگىن نۇر-سۇلتانعا الماتىدان تاعى ءتورت اۋە ساپارى ورىندالادى. اتاپ ايتقاندا ساعات 11.35, 14.40, 19.00, 19.20 ۋاقىتىندا ءتورت ۇشاق كەلىپ قونادى. اۋە رەيستەرىن «Air Astana», «Qazaq», «Scat» اۋە كومپانيالارى ورىندايدى.