قۇرمەتتى وتانداستار!
سىزدەردى قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىز.
1 مامىر – ەلىمىزدەگى بارلىق مادەنيەتتەردىڭ كوپتۇرلىلىگى مەن رۋحاني قۇندىلىقتاردى پاش ەتەتىن جارقىن مەرەكە.
بارلىعىمىزدى ەتنوستىق تەگىمىز بەن ءدىني سەنىمىمىزگە, ساياسي ۇستانىمىمىز بەن ءتۇرلى كوزقاراسىمىزعا قاراماستان, تۋعان ەلىمىزگە دەگەن ماحاببات, ءوزارا تۇسىنىستىك پەن قۇرمەت, بولاشاققا دەگەن جاۋاپكەرشىلىك پەن ورتاق مۇددەلەرىمىز بىرىكتىرەدى.
بىرلىك – ءبىزدىڭ ەرەكشە ساقتاپ, قورعايتىن باستى بايلىعىمىز بەن جەتىستىگىمىز. عاسىرلار بويى قالىپتاسقان حالىقتار دوستىعىنىڭ ارقاسىندا مەملەكەتتىڭ دامۋى تاريحىنداعى قيىن كەزەڭدەردى بىرگە وتكەردىك.
25 جىل بۇرىن ەلباسى قۇرعان قازاقستان حالقى اسسامبلەياسى جالپىحالىقتىق كەلىسىمدى ساقتاپ, نىعايتۋدا ۇلكەن جۇمىستار اتقارىپ كەلەدى. «بىرلىك كوپتۇرلىلىكتە» مودەلى مەملەكەت ساياساتىنىڭ باستى باعدارىنىڭ ءبىرى جانە سولاي بولىپ قالا بەرەدى.
بۇگىندە بارلىعىمىز بىرلەسىپ كوروناۆيرۋس پاندەمياسىمەن جاپپاي كۇرەسۋدەمىز. قازاقستان حالقى توتەنشە قيىندىقتار مەن سىناقتى جۇمىلىپ جەڭىپ شىعارىنا كۇمانىمىز جوق.
قۇرمەتتى دوستار!
شۋاقتى مەرەكەدە سىزدەرگە زور دەنساۋلىق, وتباسىلىق بەرەكە, بولاشاققا دەگەن سەنىم تىلەيمىز. ىنتىماق-بىرلىگىمىز اجىراماسىن!
تۋعان ەلىمىز كوركەيىپ, تاتۋلىعىمىز ارتا بەرسىن دەگەن ىزگى تىلەگىمىزدى قابىل الىڭىزدار!
قازاقستان حالقى اسسامبلەياسى