تاراز قالاسىنداعى ايالدامالارعا وسىدان ءۇش-ءتورت جىل ۋاقىت بۇرىن شىنى ورناتىلعان بولاتىن. بىراق بۇگىندە وسى ايالدامالاردىڭ كەيبىرىنىڭ اينەكتەرى سىنىپ, ءبىرازىنىڭ قاڭقاسى عانا قالعان.
ءتىپتى قالاداعى كەيبىر ايالدامالار ءتۇرلى-ءتۇستى جارنامالاردىڭ دا پاراقشالارىنا تولىپ كەتكەن. ارينە, بۇلاردىڭ ءبارى دە ەكى مىڭ جىلدان استام تاريحى بار كونە تاراز شاھارىنىڭ ساۋلەتتىك كەلبەتىنە نۇقسان كەلتىرىپ تۇر. بۇل رەتتە وسى ماسەلەلەر ەسكەرىلىپ, قالا اكىمدىگىنىڭ باستاماسىمەن كوكتەمگى سانيتارلىق تازالىق كەزىندە كوشەلەردەگى جارناما جاپسىرىلعان تاقتاشالار الىنىپ تاستالۋدا.
بۇگىندە تاراز قالاسىنىڭ اكىمدىگى اتالعان ايالدامالاردى قايتا جاڭعىرتۋ جۇمىستارىن قولعا الىپ وتىر. قازىرگى كەزدە قالا ايالدامالارى ۇلتتىق ناقىشتاعى ويۋلارمەن بەزەندىرىلىپ, شاھاردىڭ ءسانىن كەلتىرۋدە. قالا بويىنشا بۇگىندە 624 ايالداما بار. ونىڭ ىشىندە 87 ايالدامانىڭ شاتىرى ۇشقان جانە ولاردىڭ جان-جاقتارى سىنعان. سول سياقتى قالاداعى 185 ايالداما كەڭەستىك كەزەڭدە ورناتىلعان بولسا, 152 ايالداما سوڭعى 10-15 جىلدىڭ شاماسىندا سالىنعان. وسىنداي كوپتەگەن ايالدامالارعا بۇگىندە كۇردەلى جوندەۋ قاجەت. دەگەنمەن, قالا اكىمدىگى تاراپىنان بيىلعى جىلدىڭ وزىندە 41 ايالداما جاڭا ارحيتەكتۋرالىق ۇلگىگە اۋىستىرىلعان. بۇل جۇمىستار ءالى دە جالعاسىن تابادى.
جامبىل وبلىسى