اكادەميك ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ وقىتۋشىلارى جازعى سەسسيانىڭ ەمتيحاندارىن قاشىقتان قابىلداي باستادى.
اتالعان وقۋ ورنىنىڭ كۇندىزگى, كۇندىزگى-قىسقارتىلعان جانە سىرتتاي (باكالاۆريات, ماگيستراتۋرا, دوكتورانتۋرا) بولىمدەرىندە 12 801 ستۋدەنت وقيدى. وقىتۋشىلار مەن ستۋدەنتتەرگە ونلاين-ۆەبينارلاردا «قاشىقتان وتەتىن» سەسسيانىڭ ءتارتىبى تۋرالى ايتىلدى. رەكتوردىڭ مىندەتىن اتقارۋشى ەركەبۇلان تاجباەۆ تىكەلەي ەفير جۇرگىزىپ, ەمتيحانداردى جاڭا فورماتتا تاپسىرۋعا قاتىستى بارلىق سۇراقتارعا جاۋاپ بەردى.
قارمۋ-دىڭ وقۋ ءىسى جونىندەگى پرورەكتور بەكبولات نۇسىپبەكوۆ سەسسيانىڭ العاشقى كۇنى ءۇش مىڭعا جۋىق ستۋدەنتتىڭ ەمتيحان سىناعىنان ءساتتى وتكەنىن ءمالىم ەتتى.
– سەسسيا ەندى عانا باستالدى. دەگەنمەن, العاشقى كۇن ديستانتسيالىق تەحنولوگيالاردى قولدانۋدىڭ وزىندىك ارتىقشىلىقتارى بار ەكەنىن كورسەتتى. ستۋدەنتتىڭ وزىنە سەنىمدى بولۋىنا ۇيرەنشىكتى ءۇي جاعدايىنىڭ ايتارلىقتاي كومەكتەسەتىنىن ايتا كەتكەن ءجون, – دەپ اتاپ ءوتتى ول.
جالپى, قارمۋ-دا ءتورت مىڭنان استام ەمتيحان وتەدى. ال ءبىرىنشى كۇنى تەحنيكالىق سەبەپتەرگە بايلانىستى جەلىدەن اجىراتىلىپ قالعان 20 ستۋدەنتكە ەمتيحاندى قايتا تاپسىرۋعا مۇمكىندىك بەرىلگەن.