پرەمەر-مينيستر اسقار مامين جۇمىس ساپارى اياسىندا شىمكەنت پەن تۇركىستان قالالارىنىڭ كولىك جانە الەۋمەتتىك-مادەني ينفراقۇرىلىم نىساندارىنىڭ قۇرىلىس بارىسىن تەكسەردى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
شىمكەنتتە ۇكىمەت باسشىسىنا بيىلعى جەلتوقسانعا دەيىن سالۋ كوزدەلگەن, وتكىزۋ قابىلەتى ساعاتىنا 2000 جولاۋشىنى قۇرايتىن حالىقارالىق اۋەجايدىڭ جاڭا جولاۋشىلار تەرمينالىنىڭ قۇرىلىس بارىسى تۋرالى باياندالدى.
پرەمەر-مينيستر تۇركىستاندا جاڭا حالىقارالىق اۋەجايدىڭ جانە وعان اپاراتىن اۆتوموبيل جولىنىڭ قۇرىلىس قارقىنىمەن تانىستى. نىسان وبلىس ورتالىعىنان 16 شاقىرىم جەردە ورنالاسقان جانە بيىلعى قىركۇيەك ايىندا پايدالانۋعا بەرىلەدى. تەرمينالدىڭ وتكىزۋ قابىلەتى جىلىنا 3 ملن جولاۋشىنى قۇرايدى دەپ كوزدەلگەن.
ا. مامين كونگرەسس-حوللدىڭ, 7 مىڭ ورىنعا شاقتالعان ستاديوننىڭ, وقۋشىلار سارايىنىڭ, باسسەينى بار سپورت كەشەنىنىڭ, اتتراكتسيوندارى بار قالا ساياباعىنىڭ, دراما تەاترىنىڭ, وبلىستىق عىلىمي-امبەباپ كىتاپحانانىڭ, « ۇلى دالا ەلى» ورتالىعىنىڭ, ق. ا. ياسساۋي مۋزەيىنىڭ جانە تۇڭعىش پرەزيدەنت ساياباعىنىڭ قۇرىلىس الاڭدارىندا بولىپ, ۇلى جىبەك جولى قولونەرشىلەرىنىڭ ۇلتتىق ورتالىعىنىڭ عيماراتىن رەكونسترۋكتسيالاۋ بارىسىن تەكسەردى.
ۇكىمەت باسشىسى ارقايسىسى 120 بولمەدەن تۇراتىن «Rixos Turkestan» جانە «Hampton by Hilton» قوناق ۇيلەرىنىڭ, سونداي-اق «Sembol construction» تۇرىك كومپانياسى سالىپ جاتقان «كەرۋەن ساراي» كوپفۋنكتسيونالدى تۋريستىك كەشەنىنىڭ قۇرىلىسى بارىسىمەن تانىستى. اتالعان بارلىق قوناق ءۇي-تۋريستىك نىساندارىن وسى جىلى پايدالانۋعا بەرۋ جوسپاردا بار.
پرەمەر-مينيسترگە «ازىرەت سۇلتان» مۋزەي-قورىعىن اباتتاندىرۋ جوسپارى تانىستىرىلدى.