2019 جىلى قازاقستاندا اۆتوموبيل ونەركاسىبىندە 359,5 ملرد تەڭگەگە 50447 دانا كولىك قۇرالى شىعارىلىپ, ناقتى كولەم يندەكسى 162,5% قۇرادى, دەپ حابارلادى يدم ءباسپاسوز قىزمەتى.
بارلىق جاڭا تەحنيكانىڭ جارتىسى ەڭ ءىرى اۆتوكوندىرۋشى «سارىارقااۆتوپروم» كاسىپورنىندا شىعارىلدى. وتكەن جىلى قوستاناي زاۋىتى ءوندىرىستى ەكى ەسەگە ارتتىرىپ, 25 802 دانا جەڭىل, جۇك كولىگى مەن اۆتوبۋستار شىعاردى. ال بيىل ءوندىرىس كولەمىن 51400 بىرلىككە دەيىن جەتكىزۋدى جوسپارلاپ وتىر. ونىمدىلىك ولشەمى بويىنشا قازاقستاندىق «ازيا اۆتو» اۆتوقۇراستىرۋ زاۋىتى دا كوشباسشىعا اينالدى. وتكەن جىل قورىتىندىسى بويىنشا زاۋىتتا 20 مىڭ ارناۋلى تەحنيكا شىعارىلدى. بيىلعى جوسپار بويىنشا كاسىپورىندا 44 مىڭ تەحنيكا شىعارىلۋى ءتيىس.
اۋىل شارۋاشىلىعى ماشينالارىن جاساۋ سەكتورىندا 2018 جىلدان باستاپ ءوندىرىس ءوسىمى بايقالادى. وعان ءونىمدى وتكىزۋ كەزىندە قوسىمشا قۇن سالىعىن تولەۋدەن بوساتۋ سياقتى مەملەكەتتىك قولداۋ شارالارى ىقپال ەتتى. وتكەن جىلى 41,2 ملرد تەڭگەگە اۋىل شارۋاشىلىعى ماشينالارى جاسالىپ, ءوسىم 144% قۇرادى. وتاندىق ءوندىرىس تەحنيكاسى ەگىن جيناۋ ناۋقانى بارىسىندا جوعارى سۇرانىسقا يە بولىپ وتىر. ونىڭ ونىمدىلىگى, توراپتارى مەن اگرەگاتتارىنىڭ ساپاسىنا مەحانيزاتورلاردىڭ ايتاتىن شاعىمى جوق. مىسالى, 2019 جىلى اۋىل شارۋاشىلىعى ماشينالارىن جاساۋ سالاسىندا 1200-دەن اسا تراكتور شىعارىلدى. مىسالى, قوستانايداعى اۋىلشارۋاشىلىق تەحنيكاسىن وندىرۋشى «اگروماشحولدينگ KZ» 130-دان استام Lovol تراكتورىن جانە 355 «Essil» كومباينىن شىعاردى. 2020 جىلدىڭ ءى توقسانىندا كاسىپورىن 62 تراكتور جانە 20 كومباين ءوندىردى.
سونداي-اق قازىرگى ۋاقىتتا تەمىرجول ماشينا جاساۋ كلاستەرى بەلسەندى دامىپ كەلەدى. زاۋىتتاردا شىعارىلاتىن ءونىم جەلىسىن جاڭعىرتۋ جانە كەڭەيتۋ جۇمىستارى جۇرگىزىلۋدە. ونىڭ ىشىندە «تۇلپار-تالگو» جشس زاۋىتىندا بىلتىر 91 جولاۋشى ۆاگونى ءوندىرىلدى. «لوكوموتيۆ قۇراستىرۋ زاۋىتى» اق تە33ا سەريالى 11 ماگيسترالدىق تەپلوۆوز شىعاردى.
جالپى بيىل اۆتوونەركاسىبى ءونىمىنىڭ جالپى كولەمىن 100 مىڭ تەحنيكاعا دەيىن جەتكىزۋ جوسپارلانىپ وتىر. ونىڭ 10-15 مىڭى — رەسەي, قىرعىزستان, وزبەكستان, تاجىكستان, بەلارۋس, ازەربايجان جانە باسقا ەلدەرگە ەكسپورتتالماق. بۇگىندە اۆتوموبيل سالاسىن دامىتۋ مۇمكىندىكتەرى وتە مول. 2019 جىلى ماۋسىم ايىندا ماشينا جاساۋدى دامىتۋ جونىندەگى 2019-2024 جىلدارعا ارنالعان جول كارتاسى بەكىتىلدى. ول ماشينا جاساۋدىڭ بارلىق كىشى سالالارىن جانە قولداۋ شارالارى جونىندەگى ءىس-شارالار كەشەنىن قامتيدى. بۇل سالىقتىق پرەفەرەنتسيالار, قارجىلىق جانە شيكىزاتتىق قولداۋ, بىلىكتى كادرلارمەن قامتاماسىز ەتۋ جانە تاعى باسقالار.