ىشكى ىستەر مينيسترلىگى بەينەوكونفەرەنتس-بايلانىس رەجيمىندە توتەنشە جاعداي كەزىندە كوزگە تۇسكەن قىزمەتكەرلەردى ۆەدومستۆولىق ناگرادالارمەن ماراپاتتاۋ ءراسىمىن وتكىزدى. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلايدى.
ءمينيستردىڭ بۇيرىعىمەن «ورتتە كورسەتكەن قايسارلىعى ءۇشىن» مەدالىمەن قىزىلوردادان 3 پوليتسيا قىزمەتكەرى ماراپاتتالىپ وتىر.
ءساۋىر ايىنىڭ العاشقى كۇنى قىزمەت بارىسىندا جۇرگەن قالالىق پوليتسيا باسقارماسى كريمينالدىق پوليتسيا ءبولىمىنىڭ قىزمەتكەرلەرى وبلىس ورتالىعىنداعى ۇيلەردىڭ بىرىنەن تەرەزەدەن بالالاردىڭ بەتتەرىن تۇمشالاپ الىپ, دالاعا قاراپ تۇرعاندارىن بايقاپ قالادى. پوليتسيا كاپيتانى ءالىمجان الىمبەتوۆ پەن پوليتسيا اعا لەيتەنانتى بەيبارىس قالىمبەتوۆ ورتكە ورانا باستاعان ۇيدەن 4 بالانى سىرتقا الىپ شىعادى. بالالاردى كورشى ءۇيدىڭ يەسىنە تاپسىرىپ, جالىندى سوندىرەدى.
ال ەكىنشى وقيعا 19 ءساۋىر كۇنى ورىن الدى. قالالىق پوليتسيا باسقارماسى جەدەل باسقارۋ ورتالىعىنىڭ ينسپەكتورى پوليتسيا لەيتەنانتى نۇرلان قارلىباەۆ جانە قر ءىىم-ءنىڭ №5547 ۇلتتىق ۇلان ساربازدارى قاتارداعى كيريلل لوسيتسكي مەن نياز داۋلەت قىزمەت اتقارۋ بارىسىندا تاۋەلسىزدىك داڭعىلىنداعى كوپقاباتتى تۇرعىن ءۇيدىڭ 2 قاباتىنداعى بالكوننان قالىڭ ءتۇتىندى بايقايدى. ولار شۇعىل قىزمەتكە حابارلاپ, كومەك جەتكەنشە دەرەۋ پاتەرگە كىرىپ, تۇرعىنداردى قاۋىپسىز جەرگە شىعارادى. پوليتسيا قىزمەتكەرلەرى مەن ساربازداردىڭ جەدەل شەشىم قابىلداۋىنىڭ ارقاسىندا ءورت سالدارىنان زارداپ شەككەندەر بولعان جوق.
مينيستر ەرلان تۇرعىمباەۆ ءىىم قىزمەتكەرلەرىنىڭ توتەنشە جاعداي كەزىندە قۇقىقتىق ءتارتىپتى قامتاماسىز ەتۋدەگى ەڭبەگىن مەملەكەت باسشىسى جوعارى باعالاعانىن, كارانتيندىك ءىس-شارالارعا اتسالىسقان بارلىق قىزمەتكەرلەر مەن اسكەري قىزمەتشىلەرگە لاۋازىمدىق جالاقى مولشەرىندە سىياقى بەرىلگەنىن اتاپ ءوتتى.