قىزىلوردادا «بولاشاق» ۋنيۆەرسيتەتىنىڭ ۇيىمداستىرۋىمەن پەداگوگ-عالىمداردىڭ ءىىى رەسپۋبليكالىق ونلاين-سلەتى ءوتىپ جاتىر. قاتىسۋشىلار ەكى كۇن بويى توتەنشە جاعداي كەزىندە ءبىلىم بەرۋدى ۇيىمداستىرۋ ماسەلەلەرى توڭىرەگىندە يدەيالارىمەن بولىسۋدە.
پىكىر الماسۋ الاڭىنىڭ العاشقى كۇنىندە قىزىلوردا زياتكەرلىك مەكتەبىنىڭ ديرەكتورى باقىت جۇماتاي نازارباەۆ زياتكەرلىك مەكتەپتەرى جۇيەسىندەگى قاشىقتان وقىتۋدى ەنگىزۋ تاجىريبەسى تۋرالى ايتتى. تىڭداۋشىلار نازارىنا وقۋشىلارعا ونلاين رەجيمىندە وقۋعا قولايلى جاعداي جاساۋ ءۇشىن اتقارىلعان جۇمىستار تانىستىرىلدى. ونىڭ ىشىندە بىرقاتار ەلدەر بويىنشا ءبىلىم بەرۋ جۇيەسىن زەرتتەۋ ناتيجەلەرى, وقۋ جوسپارلارىن ازىرلەۋ, مۇعالىمدەردىڭ بىلىكتىلىگىن ارتتىرۋ كۋرستارى, وقۋشىلار مەن اتا-انالارعا كەڭەس بەرۋ, ىڭعايلى ساباق كەستەسىن قۇرۋ, ونلاين ساباقتار وتكىزۋ, ءبىلىم بەرۋدى باقىلاۋ جانە وقۋداعى ولقىلىقتاردى بولدىرماۋ باعىتىندا جۇرگىزىلگەن جۇمىستاردى كورسەتتى. سونداي-اق, زياتكەرلىك مەكتەپتەردىڭ ونلاين رەجيمىندە ءساتتى پايدالانىلاتىن Teams باعدارلاماسى مەن باسقا دا تسيفرلىق رەسۋرستاردىڭ مۇمكىندىكتەرىن تانىستىردى.
- بۇگىندە ەلىمىزدە اقپاراتتىق تەحنولوگيانى دامىتۋ وتە ماڭىزدى. بۇل ءار ءتۇرلى الەۋمەتتىك دەڭگەيدەگى بالالاردىڭ تەڭ ءبىلىم الۋىنا مۇمكىندىك بەرەدى جانە اۋىل مەن قالا مەكتەپتەرى اراسىنداعى الشاقتىقتى جاقىنداتا تۇسەدى, – دەيدى باقىت جۇماتاي.
سلەت بارىسىندا قاتىسۋشىلار زياتكەرلىك مەكتەپتەردىڭ قازىرگى ءبىلىم بەرۋدى تۇرلەندىرۋدەگى ماڭىزدىلىعىن اتاپ ءوتتى. نزم تاجىريبەسى بۇگىندە ەلىمىزدىڭ كوپتەگەن ورتا جانە جوعارى وقۋ ورىندارىندا قولدانىلادى.