بۇگىن راقىمجان قوشقارباەۆتىڭ رەيحستاگقا تۋ تىككەن كۇنى

راقىمجان قوشقارباەۆ اقمولا وبلىسىنىڭ تسەلينوگراد اۋدانىندا تۋعان. 1942 جىلى اسكەرگە الىنعان. دەرەكتەرگە قاراعاندا, 1944 جىلى قازان ايىنان باستاپ 1-بەلارۋس مايدانىنداعى يدريتسك اتقىشتار ديۆيزياسى قۇرامىندا 150-ءشى ۆزۆود باسقارىپ, پولشا جانە گەرمانيا جەرلەرىندەگى ۇرىستارعا قاتىسقان. 1945 جىلى 30 ساۋىردە لەيتەنانت راقىمجان قوشقارباەۆ جاۋىنگەر گريگوري بۋلاتوۆ ەكەۋى سوۆەت اسكەرى اراسىنان بەرليندەگى رەيحستاگقا ءبىرىنشى بولىپ جەڭىس تۋىن تىكتى.

بەرليندەگى رەيحستاگقا جەڭىس تۋىن تىككەن قازاقتىڭ ەرجۇرەك ازاماتى, «حالىق قاھارمانى» راقىمجان قوشقارباەۆتىڭ (1924-1988 جج.) ەرلىگى ۇرپاقتان-ۇرپاققا اڭىز بولىپ تارالدى.

كەڭەس وكىمەتى ونىڭ ەرلىگىن باسقالاردىڭ ەنشىسىنە جازىپ, قوشقارباەۆتىڭ قاھارماندىعىن ەسكەرمەي كەلگەن-ءدى. ەلباسى سول ولقىلىقتىڭ ورنىن تولتىرىپ, 1999 جىلى راقىمجان قوشقارباەۆقا «حالىق قاھارمانى» اتاعىن بەرۋ تۋرالى جارلىققا قول قويدى. وسىلايشا ەردىڭ ەرلىگى رەسمي تۇرعىدا ۇلىقتالدى.