جىلىوي اۋدانىنداعى تەڭىز كەنىشى قاۋىپتى ىندەتتىڭ وشاعىنا اينالىپ بارا جاتىر. قازىر مۇندا كوروناۆيرۋسقا شالدىققاندارمەن بايلانىستا بولعان 1,5 مىڭنان استام جۇمىسشى انىقتالدى.
توتەنشە جاعداي رەجيمىن قامتاماسىز ەتۋ جونىندەگى وڭىرلىك جەدەل شتابتىڭ حابارلاۋىنشا, بۇلاردىڭ ءبارى – ناۋقاسپەن جاقىن قارىم-قاتىناستا بولعاندار مەن بايلانىس جاساعاندار. وسى كەنىشتە ىندەتكە شالدىققان العاشقى جۇمىسشى انىقتالعان سوڭ, 16 ساۋىردە تەڭىز كەنىشىنەن شۇعىل ەمەس پەرسونالداردى شىعارۋ باستالعان ەدى. كەنىشتەن 17 000-نان استام جۇمىسشىنى شىعارۋ جوسپارلانىپ وتىر.
– ولاردىڭ اراسىندا اتىراۋ وبلىسىنىڭ 6 000-نان استام تۇرعىنى, اقتوبە جانە باتىس قازاقستان وبلىستارىنان 2 000-نان استام, ال, ماڭعىستاۋ وبلىسىنىڭ 600-دەن اسا تۇرعىنى بار. قالعان قىزمەتكەرلەر قازاقستاننىڭ وزگە دە وڭىرلەرىنەن كەلگەن ماماندار, - دەپ حابارلادى جەدەل شتاب.
قازىر كەن ورىنان 10 مىڭنان استام جۇمىسشى شىعارىلدى. ونىڭ ىشىندە 4 مىڭعا جۋىق جۇمىسشى اۋە جولىمەن, 3 مىڭعا جۋىعى تەمىر جول قاتىناسىمەن, 3 مىڭنان استامى اۆتوبۋس كولىگىمەن تاسىمالداندى. وزگە جۇمىسشىلاردى شىعارۋ 5 مامىردا اياقتالادى دەپ كۇتىلۋدە.
وسى كەزگە دەيىن تەڭىز كەنىشىندەگى جۇمىسشىلار اراسىندا قاۋىپتى ىندەتتى جۇقتىرعاندار سانى 71 ادامعا جەتىپ وتىر. ولاردىڭ ون ەكىسى جازىلىپ شىقتى. ناۋقاستارمەن بايلانىستا بولعان 1,5 مىڭنان استام جۇمىسشى انىقتالدى. ونىڭ ىشىندە 847 ادام جاقىن قارىم-قاتىناستا بولسا, 718 ادام بايلانىس جاساعان ەكەن.