28 ءساۋىر كۇنى ورال قالالىق مەكتەپتەرىندەگى سىبايلاس جەمقورلىققا قارسى ءىس-قيمىل تۋرالى ونلاين كونفەرەنتسيا ءوتتى. وعان قالاداعى 50 مەكتەپ ديرەكتورىنان بولەك, رەسپۋبليكالىق «سانالى ۇرپاق» جوبالىق كەڭسەسىنىڭ جەتەكشىسى قايىرجان توكۋشەۆ قاتىستى.
باتىس قازاقستان وبلىستىق سىبايلاس جەمقورلىققا قارسى قىزمەتى ۇيىمداستىرعان بۇل باسقوسۋدىڭ پايداسى كوپ بولدى. كونفەرەنتسياعا الماتى قالاسىنان ونلاين قاتىسقان قايىرجان احمەتبەك ۇلى ءوز سوزىندە سىبايلاس جەمقورلىققا قارسى مونيتورينگ جۇرگىزۋ جانە سىبايلاس جەمقورلىققا قارسى ستاندارتتاردى قابىلداۋ, ءوز مەكەمەلەرىندە سىبايلاس جەمقورلىق تاۋەكەلدەرىنە ىشكى تالداۋ جۇرگىزۋ جانە سىبايلاس جەمقورلىق قىلمىستارى ءۇشىن جەكە جاۋاپكەرشىلىك ماسەلەلەرىنە كەڭىنەن توقتالىپ ءوتتى.
مەكتەپ پەن سىبايلاس جەمقورلىق ۇعىمى سينونيم بولماسا دا, قوعامنىڭ بۇل دەرتىنەن ءبىلىم سالاسى دا ساۋ بولماي تۇر. ماسەلەن, 2019 جىلى جانە بيىلعى ءبىرىنشى توقساندا باتىس قازاقستان وبلىسىنىڭ ءبىلىم سالاسىندا سىبايلاس جەمقورلىق جانە لاۋازىمدىق 8 قىلمىس تىركەلگەن. 4 ادامعا قارسى قىلمىستىق تەكسەرۋ جۇرگىزىلىپ, ۇشەۋى سوتتالدى. بۇلاردىڭ ەكەۋى – كوللەدج قىزمەتكەرى, بىرەۋى – مەكتەپ ديرەكتورى, بىرەۋى – اۋداندىق ءبىلىم ءبولىمىنىڭ مەڭگەرۋشىسى. سولاردىڭ ءبىرى – تەرەكتى اۋدانى پودستەپنوە اۋىلى №1 مەكتەبىنىڭ ديرەكتورى قايمولدينوۆ مۇعالىمدى قىزمەتكە ورنالاستىرۋ ءۇشىن 300 مىڭ تەڭگە پارا الىپ, ۇستالدى. تەرەكتى اۋداندىق سوتىنىڭ شەشىمىمەن پاراقور باسشى 9 ملن تەڭگە ايىپپۇل تولەپ, ءومىر بويى مەملەكتتىك قىزمەتكە تۇرۋ قۇقىعىنان ايىرىلدى.
ونلاين كونفەرەنتسياعا قاتىسقان باتىس قازاقستان وبلىستىق سىبايلاس جەمقورلىققا قىرسى قىزمەت باسشىسىنىڭ ءبىرىنشى ورىنباسارى نۇرداۋلەت سامەت پەن ورال قالالىق ءبىلىم بەرۋ ءبولىمى باسشىسىنىڭ ورىنباسارى باتيقا پايدينا دا ءوز سوزىندە وقۋ ورىندارىندا سىبايلاس جەمقورلىق قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلار تۋرالى ايتىپ ءوتتى.
شارا بارىسىندا PUBLICBUDGET.KZ سايتىنداعى «اشىق بيۋدجەتتەردىڭ ينتەراكتيۆتى كارتاسى» جوباسى تۋرالى ايتىلدى. سىبايلاس جەمقورلىققا قارسى ءىس-قيمىل اگەنتتىگى ازىرلەگەن بۇل سايت اقپاراتقا قول جەتكىزۋدى جەڭىلدەتىپ, بيلىك پەن ازاماتتىق قوعام اراسىندا تىكەلەي بايلانىس ارناسىن قۇرۋ ءۇشىن قۇرىلعان بىرەگەي جوبا بولاتىن.
- وسى كارتادا وبلىستىڭ ءبىلىم بەرۋ, قۇرىلىس, الەۋمەتتىك نىسانداردى جوندەۋ جانە ساقتاۋعا بولىنگەن بيۋدجەت قاراجاتى تۋرالى ەگجەي-تەگجەيلى مالىمەت بار. كارتاعا مەملەكەتتىك كاسىپورىندار, مەديتسينالىق مەكەمەلەر, ءبىلىم بەرۋ نىساندارى, جولدار, ياعني بيۋدجەت قاراجاتى بولىنگەن كەز كەلگەن ينفراقۇرىلىمدىق نىسان ەنگىزىلگەن. كەز كەلگەن ادام قاجەتتى نىساندى باسىپ, ءوز ەسكەرتۋىن قالدىرا الادى. ماسەلەن, ءبىر ازامات جوندەۋ ساپاسىنا, ءبىلىم ساپاسىنا ريزا بولماسا, بىزبەن بىرلەسىپ جۇمىس ىستەۋگە, قوعامدىق باقىلاۋ جۇرگىزۋگە جانە قۇقىق بۇزۋشىلىقتار تۋرالى دەرەۋ حابارلاۋعا شاقىرامىن, - دەدى نۇرداۋلەت سامەت.
باتىس قازاقستان