دەمەۋشىلەر ەسەبىنەن جينالعان 25 ملن تەڭگە قالالىق جۇقپالى اۋرۋلار اۋرۋحاناسى مەن №2 قالالىق اۋرۋحانا قىزمەتكەرلەرىنە بەرىلدى. سىياقىدان «مەيىرىم» جانە «اتامەكەن» وڭالتۋ ورتالىعىندا كارانتين رەجىىندە توقتاۋسىز ەڭبەكتەنىپ جۇرگەن مەديتسينا ماماندارى دا تىس قالمادى.
مەملەكەت باسشىسى قاسىم-جومارت توقاەۆ كوروناۆيرۋسپەن كۇرەسىپ جاتقان مەديتسينا قىزمەتكەرلەرىنە كومەك كورسەتۋ تۋرالى تاپسىرماسىنا سايكەس شىمكەنت قالاسىندا 2126 مەديتسينا ماماندارىنا ۇستەماقى تولەندى.
مەديتسينا قىزمەتكەرلەرى جۇمىسىنىڭ قاۋىپتىلىگىنە قاراي 3 توپقا بولىنگەن. ءبىرىنشى ساناتتاعى وتە قاۋىپتى جاعدايدا جۇمىس ىستەگەن 24 قىزمەتكەرگە 8,749 ملن, ەكىنشى ساناتتاعى قالىپتى جاعدايدا جۇمىس ىستەيتىن دارىگەرلەر مەن فەلدشەلەرگە جانە وزگە دە 977 مەديتسينا ماماندارىنا 294,848 ملن تەڭگە ءبولىندى.
ال, ءۇشىنشى دەڭگەيدەگى قاۋىپسىزدىك جاعدايىندا جۇمىس ىستەيتىن 1126 مەديتسينا مامانىنا 91,166 ملن تەڭگە قاراجات قارالعان. ۇستەماقى العاندار رەانيماتسيا بولىمدەرىمەن قوسا العاندا, جۇقپالى اۋرۋلار ستاتسيونارلارىنىڭ دارىگەرلەرى, كارانتيندىك ايماقتاعى ورتا جانە كىشى مەديتسينا قىزمەتكەرلەرى. سونداي-اق پروۆيزورلىق ستاتسيونار مەن جەدەل جاردەم قىزمەتىنىڭ دارىگەرلەرى مەن جەدەل-جاردەم كولىكتەرىنىڭ جۇرگىزۋشىلەرى.
ناۋرىز ايىندا ەلىمىزدە جاريالانعان توتەنشە جاعداي رەجىمىندە ۋاقىتپەن ساناسپاي ەڭبەك ەتىپ جۇرگەن مەديتسينا ماماندارىنا 394,77 ملن تەڭگە بەرىلدى. قاراپايىم حالىقتىڭ دەنساۋلىعى ءۇشىن ءوز باسىن بايگەگە تىككەن اق حالاتتى ابزال جاندارعا ءساۋىر ايىندا 514,969 ملن تەڭگە بەرۋ جوسپارلانعان. شىمكەنت قالاسىنداعى مەملەكەتتىك مەديتسينالىق ۇيىمداردا جالپى 3226 دارىگەر مەن 8493 ورتا بۋىندى مەديتسينا ماماندارى كۇن-ءتۇن دەمەي جۇمىس ىستەپ جاتىر.
شىمكەنت