رومان تسوي - تالدىقورعان قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى. ول مەكتەپتە بەلسەندى, ساباقتى وتە ۇزدىك وقيتىن العىر جاس. جاقىندا رومان نۇر-سۇلتان قالاسىنداعى نازارباەۆ ۋنيۆەرسيتەتى مەن شەتەلدىڭ تاعى قوس ۋنيۆەرسيتەتىنىڭ وقۋ گرانتىن جەڭىپ الدى.
ياعني, رومان تسويدىڭ ءبىلىم كورسەتكىشى 3 ۇزدىك وقۋ ورىنىنىڭ دا تالابىنان شىعىپ, وقۋ گرانتىن بەرۋگە شەشىم قابىلداپتى. وسىلاي شا تالدىقورعاندىق ۇمىتكەرگە ەلىمىزدەگى نازارباەۆ ۋنيۆەرسيتەتى, امەريكاداعى درەكسەل ۋنيۆەرسيتەتى جانە وڭتۇستىك كورەياداعى ۋلسان ۇلتتىق عىلىم جانە تەحنولوگيا ۋنيۆەرسيتەتىنىڭ ەسىگى ايقارا اشىلعان ەكەن. ال رومان بولاشاقتا مۇناي, فارماتسەۆتيكا جانە تاماق ونەركاسىبى سالاسىنداعى حالىقارالىق كومپانيالاردا جۇمىس ىستەپ, تاجىريبە جيناۋدى جوسپارلاپ قويىپتى. سول سەبەپتەن وڭتۇستىك كورەياداعى وقۋ ورىنىن تاڭدادى. ءارى بۇل ءبىلىم ورداسى وقۋشىنى 100 پايىز گرانتپەن قامتيتىن بولىپتى.
ايتپاقشى, ۋلسانداعى كورەيا ۇلتتىق عىلىم جانە تەحنولوگيا ۋنيۆەرسيتەتى, ياعني UNIST ازيانىڭ ۇزدىك جوعارعى وقۋ ورىندارىنىڭ تىزىمىنە كىرەدى. مۇندا رومان تاڭداعان مۇناي, فارماتسەۆتيكا جانە تاماق ونەركاسىبى سالاسىنا قاتىستى ماماندىق بويىنشا ءبىلىم بەرۋ ءىسى وزىق ەكەن.
الماتى وبلىسى